ފުރަތަމަ ދުވަހުން ފެށިގެންވެސް އަފްއާނިސްތާނުގައި އެމެރިކާ ދިޔައީ ފެއިލްވަމުންކަމުގައި، އަފްއާނިސްތާނަށް 9 އަހަރުވަންދެން އަތްގަދަ ކޮށްގެން އޮތުމަށްފަހު، އަފްއާނިސްތާނުގައި ކުރަމުންދިޔަ ހަގުރާމަ ނާކާމިޔާބު ވުމާއި ގުޅިގެން، ކުރީގެ ސޯވިއެޓް ޔޫނިއަންއިން 1989ވަނަ އަހަރު، އަފްއާނިސްތާން ދޫކޮށް ދިޔައިރު، ސޯވިއެޓް ޔޫނިއަން ލީޑަރަކަށް ހުންނެވި މިޚައިލް ގަރުބަޗޯވް ވިދާޅު ވެއެޖެއެވެ.

ގަރުބަޗޯވް ވިދާޅުވެފައިވަނީ، ނޭޓޯއިންވެސް އަފްއާނިސްތާނުގައި ކުރިޔަށް ގެންގޮސްފައިވަނީ، ފުރަތަމަ ދުވަހުން ފެށިގެންވެސް، ނާކާމިޔާބީއާ ދިމާލަށް ދަތުރު ކޮށްފައިވާ ކެމްޕޭނެއް ކަމުގައެވެ.

އުމުރުފުޅުން މިހާރު 90 އަހަރުގެ، ސޯވިއެޓް ޔޫނިއަންގެ ކުރީގެ ލީޑަރު ގަރުބަޗޯވް ވިދާޅުވެފައިވަނީ، ސޯވިއެޓްއިން އަފްއާސިންތާނަށް އެރުމަކީ ސިޔާސީ ގޮތުން އޭރު އެޅުނު ޅައެއްޗެއް ކަމަށާއި، އަދި އޭގެ ނާތީޖާއެއްގެ ގޮތުން، ސޯވިއެޓް ޔޫނިއަންގެވެސް ދެމިއޮތުން ފަނޑުވަމުން ދިޔަ ދުވަސްވަރެއްގައި، މުހިންމު އެތަކެއް ވަސީލަތްތަކެއް ދިޔައީ އޭރު އަތުން ބީވަމުން ކަމުގައެވެ.

ސޯވިއެޓް ޔޫނިއަންގެ ބާރުތަކުން އަފްއާނިސްތާން ދޫކޮށް ދިއުމަށްފަހު، ސޯވިއެޓްއިން ތާއިދުކުރި މުވައްސަސާތަކަށް އަފްއާނިސްތާނުގައި ދެމި އޮވެވުނީ އެންމެ 3 އަހަރުގެ މުއްދަތަކަށެވެ. އަދި 1992 ވަނަ އަހަރުގެ ޖެނުއަރީ މަހުން ސޯވިއެޓް ސަރުކާރު ވެއްޓި އަދި އެއަހަރު ފަހުކޮޅު ސޯވިއެޓް ޔޫނިއަން ރޫޅިގެން ދިއުމަށްފަހު، އަފްއާނިސްތާނަށް ދެމުން އައި އެހީތެރިކަން ރަޝިއާގެ ސަރުކާރުން ހުއްޓާލިފަހުން، އަފްއާނިސްތާނަށް ރަޝިއާއިން އެއްވެސް އެހީތެރިކަމެއް ފޯރުކޮށްދީފައެއް ނުވެއެވެ.

ގަރުބަޗޯވް އާއި ހަވާލާދީ ރަޝިއާގެ ރަސްމީ ނޫސް އޭޖެންސީ، ރިއާއިން ރިޕޯޓު ކޮށްފައިވަނީ، ނޭޓޯ އަދި އެމެރިކާއަށް އަފްއާނިސްތާނުގައި ކާމިޔާބުވެދިއުމުގެ އެއްވެސް ފުރުސަތެއް ނެތްކަމުގައެވެ. އެގައުމުގައި ނޭޓޯއާއި އެމެރިކާއިން ކުރި ހުރިހާ ކެމްޕޭނެއްވެސް ކުރިޔަށް ގެންގޮސްފައިވަނީ އެއްވެސް ރޭވުންތެރިކަމެއް ނެތިކަމުގައިވެސް ގަރުބަޗޯވް އާއި ހަވާލާދީ ރިއާ ނޫސް އޭޖެންސީން ރިޕޯޓު ކޮށްފައި ވެއެވެ.

"އެމީހުން (ނޭޓޯ އާއި އެމެރިކާ) އަފްއާނިސްތާނުގައި ނާކާމިޔާބު ވެއްޖެކަން އަމިއްލަައަށް މީގެ މާކުރިން ދެނެގަންނަން ޖެހޭނެ. މިހާރު އެންމެ މުހިންމު ކަމަކީ ފާއިތުވެދިޔަ ތަނުން އިބުރަތް ހާސިލްކޮށް، މިަފދަ ދެވަނަ ގޯހެއް ތަކުރާރު ނުކުރުން،" ގަރުބަޗޯވް ވިދޅޫވިކަމަށް ރިއާ ނޫސް އޭޖެންސީން ރިޕޯޓު ކޮށްފައި ވެއެވެ.

ގަރުބަޗޯވް އަކީ، ސޯވިއެޓް ޔޫންއަންގެ 8ވަނަ އަދި އެންމެ ފަހު ލީޑަރެވެ. އަދި އޭނާއަކީ ސޯވިއެޓް ޔޫނިއަންގައި އޭރި ވެރިކަން ކުރަމުން ދިޔަ ކޮމިއިނިސްޓް ޕާޓީގެ ސެކެޓްރީ ޖެނެރަލްވެސް މެއެވެ. އޭނާ ސޯވިއެޓް ޔޫނިއަންގެ ލީޑަރުކަން ކޮށްފައިވަނީ 1988 އިން ފެށިގެން 1991 ވަނަ އަހަރާއި ހަމައަށެވެ. ސޯވިއެއްޓް ޔޫނިއަން ރޫޅިގެން ދިޔައީ 1992 ވަނަ އަހަރުއެވެ.

ފުރަތަމަ ދުވަހުން ފެށިގެންވެސް އަފްއާނިސްތާނުގައި އެމެރިކާ ދިޔައީ ފެއިލްވަމުން: މިޚައިލް ގަރުބަޗޯވް