މާލެ ސިޓީގެ ގޯތިގެދޮރާބެހޭގޮތުން މާލޭގެ ހުރިހާ ރައްޔިތުންގެ ހިޔާލުހޯދުމަށް ރައްޔިތުންނަށް ހުޅުވާލައިގެން ބައްދަލުވުމެއް ބާއްވަން ނިންމާފައި ވާކަމަށް މާލެ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭ ސިޓީގެ ތަރައްޤީގެ ޕްލޭނާއި، ފައިނޭންޝަލް ޕްލޭނާއި، އަންނަ އަހަރަށް ލަފާކުރާ ބަޖެޓާއި، އެކްޝަން ޕްލޭނަށް ޚިޔާލު ހޯދުމަށް ހެންވޭރު ރައްޔިތުންނަށް ހާއްސަކޮށް ބޭއްވި ބައްދަލުވުމުގައި ރައްޔިތުންނާ މުޚާޠަބްކުރައްވައި މޭޔަރ ޑރ. މުޢިއްޒު ވިދާޅުވީ ގޯތިގެދޮރާބެހޭގޮތުން ވާހަކަދެއްކުމަށް މާލޭގެ ހުރިހާ ރައްޔިތުންނަށް ހުޅުވާލައިގެން ބައްދަލުވުމެއް ބާއްވަން ހަމަޖައްސާފައި ވާކަމަށާއި މި ބައްދަލުވުން މިމަހުގެ 26 ވަނަ ދުވަހުގެރޭ ކާނިވާ ސަރަޙައްދުގައި އޮންނާނެކަމަށެވެ.
މޭޔަރ ވިދާޅުވީ ސިޓީ ކައުންސިލްގެ ފަރާތުން މިހާތަނަށް އެންމެ ގިނަ މަސައްކަތްތަކެއް ކުރެވިފައިވާ އެއްކަމަކީ މާލޭ ރައްޔިތުންގެ ގެދޮރުގެ މައްސަލަ ހަމަޖެއްސުންކަމަށެވެ. އެހެންނަމަވެސް މި މަސައްކަތްތަކަށް ސަރުކާރުން އެދެވޭގޮތުގައި މިހާތަނަށް އެއްބާރުލުން ލިބިފައިނުވާކަންވެސް މޭޔަރު ފާހަގަކުރެއްވިއެވެ.
ގުޅީފަޅަކީ މާލޭ ރައްޔިތުންގެ ގެދޮރުގެ މަންޒިލެއްކަމުގައި ހެދުމަށް ހުއްޓުމެއްނެތި މަސައްކަތްކުރުމަށް ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމަނައި މިހާތަނަށް ކަމާބެހޭ ފަރާތްތަކަށް މިކަން ހުށަހަޅައި، ކަމާބެހޭ ފަރާތްތަކާއެކު ބައްދަލުވުންތަކުގައިވެސް މޭޔަރ ވަނީ މިކަން މިގޮތަށް ހަމަޖެއްސުމަށް ހުށަހަޅުއްވާފައެވެ.
ސިޓީ ކައުންސިލްގެ ފަރާތުން ބާއްވަމުން ގެންދާ އަވަށު ބައްދަލުވުންތަކުގައި، ރައްޔިތުން އެންމެ ގިނައިން ހުށަހަޅާފައިވަނީވެސް ބިމާއި ގޯތިގެދޮރުގެ މައްސަލަ ތަކާއި ޝަކުވާތަކެވެ. މާލޭ ރައްޔިތުންގެ އެތައް ހައްގެއް މިކަމުގައި ގެއްލިފައިވާކަން ރައްޔިތުންވަނީ ފާހަގަކޮށްފައެވެ.
މުޅި މާލެ ސިޓީއަށް ހުޅުވާލައިގެން ގެދޮރުގެ ވާހަކަދެއްކުމަށް ބާއްވާ ބައްދަލުވުމުގައި ގެދޮރުގެ މައްސަލާގައި ދިމާވެފައިވާ ދަތިތައް ހާމަކޮށް ޝުޢޫރުތައް ފާޅުކުރުމުގެ ފުރުޞަތު ލިބޭނެ ކަމަށް މޭޔަރ ވިދާޅުވިއެވެ.
