20 އަހަރުވަންދެން އެމެރިކާސިފައި އަފްއާނިސްތާނުގައި ތިބުމަށްފަހު، އެގައުމުން ފޭބުމާއެކު، ތާލިބާނުން އަފްއަނިސްތާނުގެ ސަރުކާރާ ދެކޮޅަށް ހޯދަމުންދާ ބޮޑެތި ކާމިޔާބީތަކުގައި އެގައުމުގެ އެންމެ ބޮޑެތި ސިޓީތައް ކަމުގައިވާ ކަންދަހާރާ އަދި ހެރާތު އެ ޖަމާއަތުގެ ބާރުގެ ދަށަށް ގެނެސް، ވެރިރަށް ކާބުލްއާ ދިމާލަށް މިސްރާބު ޖަހާފައިވާކަމަށް މީޑިއާތަކުން ރިޕޯޓު ކުރަން ފަށައިފިއެވެ.
ތާލިބާނުންގެ ބާރުގެ ދަށަށް، ކަންދަހާރާއި އަދި ހެރާތު ދިއުމާއި ގުޅިގެން އެ ދެސިޓީގެ ބައެއް ރައްޔިތުން ބުނެފައިވަނީ، ދެސިޓީ ތާލިބާނުންގެ ބާރުގެ ދަށަށް ގޮސްފައިވަނީ ގަބޫލުކުރަންވެސް ދަތި ގޮތަކަށް ކަމަށެވެ. މިގޮތުން، މި ދެސިޓީ ހިމާޔަތް ކުރުމަށް އެގައުމުގެ އަސްކަރިއްޔާއިން މާބޮޑެތި މަސައްކަތްތަކެއް ކޮށްފައި ނުވާކަމުގައިވެސް މި ދެސިޓީގެ ބައެއް ރައްޔިތުން ބައެއް މީޑިއާތަކާ ވާހަކަ ދައްކަމުން ބުނެފައި ވެއެވެ.
އަފްއާނިސްތާނުގެ އިގްތިސާދީ މައި މަރުކަޒެއްގެ ގޮތުގައި ބެލެވެމުންއައި، ކަންދަހާރު، 20 އަހަރުވަންދެއް ސަރުކާރުގެ ބާރުގެ ދަށުގައި އޮތުމަށްފަހު، އެ ސިޓީ މިހާރު ތާލިބާނުންގެ ބާރުގެ ދަށަށް ގޮސްފައިވާކަން ސަރުކާރުގެ އޮފިޝަލުންވެސް ވަނީ ޔަގީން ކޮށްދީފައެވެ.
"ސިޓީ ފެންނަނީ މުޅިން ހުސްކޮށް އޮތް ސިޓީއެއްގެ ގޮތުގައި،" އިރާން ބޯޑަރު ކައިރީގައި، 600،000 މީހުންގެ އާބާދީއެއް އޮންނަ ކަންދަހާރުގެ ޕްރޮވިންޝަލް ކައުންސިލް މެމްބަރެއް ކަމުގައިވާ ގުމާލް ހާޝިމީ ހަބީބީ ރޮއިޓާސްއަށް މައުލޫމާތު ދެމުން ބުނެފައި ވެއެވެ.
"އާއިލާތަކުން އެމީހުންގެ ގެތައް ދޫކޮށްފަ ދިޔައީ، ނުވަތަ ބިރުން ގެތަކުގައި ފިލާ ތިބީ."
އެމެރިކާގެ ޑިފެންސް އޮފިޝަލުން ބުނަމުންދަނީ، 2001 ވަނަ އަހަރު ސެޕްޓެމްބަރ 11ގައި އެމެރިކާއަށް ދިން ޓެރަރިސްޓް ހަމަލާއަށްފަހު، އެމެރިކާއިން އަފްއަނިސްތާނަށް އަރާ އެގައުމުގެ ވެރިކަމުން ބޭރުކޮށްލި ތާލިބާނުން، 20 އަހަރުފަހުން، ކާބުލް ހިފުމަށްޓަކާ މަދު ދުވަސްކޮޅެއްގެ ތެރޭގައި ކާބުލްއަށް ހަމަލާ ދޭން ފަށާނެކަމަށް މިހާރު ބެލެވެއެވެ.
އެމެރިކާގެ ރައީސް ޖޯ ބައިޑްންވަނީ، އަފްއާނިސްތާނުގައި ހުންނަ އެގައުމުގެ އެމްބަސީގެ މުވައްޒަފުން ގައުމުން ބޭރަށް ގެންދިއުމަށް އެމެރިކާގެ 3،000 ދިފައިން މި ހަފްތާ ބަދުގައި އަފްއާނިސްތާނަށް ދަތުރު ކުރާނެކަން ހާމަ ކުރައްވާފައެވެ. އަދި އިނގިރޭސިވިލާތުންވެސްވަނީ، އަފްއާނިސްތާނުގައި ތިބި އެގައުމުގެ ރައްޔިތުން ގައުމުން ބޭރަށް ގެންދިއުމަށް ހިންގާ ޚާއްސަ އޮޕަރޭޝަނެއް މިހާރު ކުރިޔަށްދާކަން ހާމަކޮށްފައެވެ.
ޔޫއެންއިން ބުނެފައިވަނީ އަފްއާނިސްތާނުގައި ތިބި އެ މުވައްސަސާގެ މުވައްޒަފުން އަދި އެގައުމުން ބޭރު ނުކުރާނެ ކަމަށާއި އެހެންނަމަވެސް، އަފްއާނިސްތާނުގެ އެހެން ސަރަހައްދުގައި ތިބި ޔޫއެންގެ މުވައްޒަފުން މިހާރު، ވެރިކަންކުރާ ސިޓީ ކާބުލްއަށް ބަދަލުކުރަމުންދާ ކަމުގައެވެ.
"އަފްއާނިސްތާނު އެދަނީ ކޮންޓްރޯލުން ނެއްޓެމުން، ހުރިހާ ފަރާތަކުންވެސް އާންމު ރައްޔިތުންގެ ރައްކާތެރިކަމަށް ސަމާލުކަން ދިނުމަށް އިލްތިމާސްކުރަން،" ޔޫއެންގެ ސެކެޓްރީ ޖެނެރަލް ވިދާޅުވެފައި ވެއެވެ.
