އަފްއާނިސްތާން މިހާރު އޮތީ މުޅިން އާ އަހުލީ ހަގުރާމައެއްގެ ތުންންފަތް މަތީގައިކަމަށާއި، އަދި އެގައުމުގެ ބޮޑު ސަރަހައްދެއް މިހާރު ކޮންޓްރޯލް ކުރަމުންދާ ތާލިބާނުންނަކީ، އެކުލެވިގެންވާ އެއް ފިކުރަކަށްވުރެ ބޮޑަށް ތަފާތު އެތައް ފިކުރުތަކެއް މައްޗަށް ބިނާވެގެންވާ ޖަމާއަތެއްކަން ހުޅަގުގެ ގައުމުތަކުން ދަންނަން ޖެހޭނެ ކަމަށް އިނގިރޭސި ޑިފެންސް މިނިސްޓަރ ވިދާޅުވެއްޖެއެވެ.
"1830ގައި އިނގިރޭސިން އަފްއާނިސްތާނުގައި ކުރި ތަޖުރިބާތަކުން އެގެން އޮތްކަމަކީ، އަފްއާނިސްތާނަކީ، އެތަކެއް ހަގުރާމަވެރި ލީޑަރުންނާއި، އަދި ޕްރޮވިންސްތަކުގެ ގަބީލާތަކުން ކޮންޓްރޯލްކުރަމުން އައި ގައުމެއްކަން، ވަރަށް ފަރުވާތެރިކަމާއެކު އެގައުމުގެ ކަންކަން ނުބަލަހައްޓައިފިނަމަ އެގައުމު ދާނީ އަހުލީ ހަގުރާމައެއްގެ ތެރެއަށް، އަދި މިހާރު އެގުމު އެދަނީ އެމިސްރާބަށް،" އިނގިރޭސި ޑިފެންސް ސެކެޓްރީ ބެލް ވެލާސް ބީބީސީއާ ވާހަކަދައްކަމުން ވިދާޅުވެފައި ވެއެވެ.
"ތާލިބާނުންނަކީ، އެންމެ ހަރަކާތެއް ނޫން، އެ ނަމުގެ ފަހަތުގައި ވަނީ އެތައް ބާވަތެއްގެ މަސްލަހަތުތަކެއް،" ވެލާސް ވިދާޅުވެފައި ވެއެވެ.
20 އަހަރުވަންދެން އަފްއާނިސްތާނުގައި ތިބުމަށްފަހު، މީގެ ދެމަސްކުރިން ގައުމުން ބޭރުގެ ސިފައިން އެގައުމުން ފައިބަން ފެށުމާއެކު، ތާލިބާނުންވަނީ އެގައުމުގެ ގިނަ ސަރަހައްދުތަކެއް އެމީހުންގެ ބާރުގެ ދަށަށް ގެނެސްފައެވެ. މިގޮތުން، އަފްއާނިސްތާނުގައި 34 ޕްރޮވިޝަލް ކެޕިޓަލްތައް އޮންނައިރު، މިހާރު ތާލިބާނުންވަނީ 11 ޕްރޮވިންޝަލް ކެޕިޓަލް އެމީހުންގެ ބާރުގެ ދަށަށް ގެނެސްފައެވެ.
ތާލިބާން ހަގުރާމަވެރިން ބޮޑެތި ކުރިއެރުންތައް ހޯދަން ފެށުމާއި ގުޅިގެން، އަދި މުޅި އަފްއާނިސްތާން ތާލިބާނުންގެ ބާރުގެދަށަށް އަތުވެދާނެކަމުގެ ބިރަށް، ވެރިރަށް ކާބުލްގައި ތިބި އެހެނިގެން ގައުމުތަކުގެ ރައްޔިތުން އެގައުމުތަކުން މިހާރުވަނީ ކާބުލްއިން ބޭރަށް ގެންދަން ފަށާފައެވެ.
މިގޮތުން ކާބުލްގައިތިބި އިނގިރޭސި އަދި އެމެރިކާގެ ރައްޔިތުން އެގައުމުން ބޭރަށް ގެންދިއުމަށް ދެގައުމުގެ އެތަކެއް ހާސް ސިފައިން މިހާރުވެސް ދަނީ ހަރަކާތެރި ވަމުންނެވެ.
އިނގިރޭސި ޑިފެންސް ސެކެޓްރީ ވިދާޅުވެފައިވަނީ، އަފްއާނިސްތާނުން އަނެއްކާވެސް އަލުން އަލްޤައިދާއަށް އެގައުމުގައި ހިމާޔަތް ދޭން ފަށައިފިނަމަ، އިނގިރޭސި ސިފައިން އަލުން އަފްއާނިސްތާނަށް އެރުމަކީ އެކަށީގެންވާ ކަމެއް ކަމުގައެވެ.
"އަހަރެން ބޭނުންވަނީ ހުރިހާ ދޮރެއްވެސް ހުޅުވާފަ ބާއްވަން، ކުރިންވެސް އަފްއާނިސްތާނަށް ދިން މެސެޖް ދޭން އޮތީ، އެމީހުން އަލްޤައިދާއަށް ހިމާޔަތްދީ، ހުޅަގުގެ ގައުމުތަކަށް، ނުވަތަ އެފަދަ އެހެން ގައުމުތަކަށްވެސް ހަމަލާ ދޭން ފަށައިފިނަމަ، އަހަރެމެން އެބުރި ދިއުމަކީ އެކަށީގެންވާ ކަމެއް،" އަލުން އަފްއާނިސްތާނަށް ސިފައިން ފޮނުވަފާނެތޯ ކުރެވުނު ސުވާލުގެ ޖަވާބުގައި ވެލާސް ވިދާޅުވިއެވެ.
