ނޭޝަނަލް ޑްރަގް އެޖެންސީ (އެންޑީއޭ) ބޯޑުގެ ޗެއާމަނަކަށް، ހެލްތު މިނިސްޓްރީގެ ޑެޕިއުޓީ މިނިސްޓަރު ޝަމާއު ޝަރީފު ހަމަޖައްސައިފިއެވެ.
ސަމާއު ބޯޑުގެ ޗެއާމަނަކަށް އައްޔަން ކުރި ނަމަވެސް، ތިން މަސް ވެގެންދިޔައިރު ވެސް އެ ތަން ހިންގުމުގައި އެންމެ އިސް ދައުރު އަދާކުރާ ސީއީއޯއެއް އަދިވެސް އައްޔަނެއް ނުކުރެއެވެ. އެންޑީއޭގެ ސީއީއޯގެ މަގާމުގައި އެންމެ ފަހުން ހުންނެވީ މުހައްމަދު ހަބީބް އެ މަގާމުން ވަކިކުރީ މިދިޔަ މެއި މަހުގެ 16 ވަނަ ދުވަހުއެވެ.
އެންޑީއޭގެ ބޯޑަށް ވެސް މިހާރު ވަނީ ބައެއް ބަދަލުތައް ގެނެސްފައެވެ. އެގޮތުން ކުރިން ބޯޑުގައި ތިއްބެވި 10 ބޭފުޅެއްގެ ތެރެއިން ފަސް ބޭފުޅަކު ވަކިކޮށް މުޅިން އަލަށް ބޯޑަށް ވަނީ ފަސް ބޭފުޅަކު ހަމަޖައްސާފައެވެ. އަލަށް ބޯޑަށް ހަމަޖެއްސެވި ބޭފުޅުންގެ ތެރޭގައި ޔޫތު މިނިސްޓްރީ، އެޑިއުކޭޝަން މިނިސްޓްރީ، ހެލްތު މިނިސްޓްރީ، ހޯމް މިނިސްޓްރީ އަދި ރައީސް އޮފީހުގެ ބޭފުޅުން ހިމެނެއެވެ.
އެންޑީއޭ ކުރިން ހިންގަމުން ދިޔައީ ޖެންޑާ މިނިސްޓްރީގެ ދަށުންނެވެ. ނަމަވެސް އެންޑީއޭގެ ހިންގުން ހަރުދަނާ ކުރުމުގެ ބޭނުމުގައި މިދިޔަ މެއި މަހުގެ ފަސްވަނަ ދުވަހު ހެލްތު މިނިސްޓްރީގެ ދަށަށް ބަދަލުކުރި ނަމަވެސް އެތަނުގެ ހިންގުމަކަށް އެދެވޭ ބަދަލެއް ގެނެވިފައެއް ނުވެއެވެ.
މަސްތުވާތަކެތީގެ ގާނޫނުގައިވާ ގޮތުން އެންޑީއޭ ބޯޑުގެ މަސައްކަތަކީ އެކި ކަންކަމުގައި ލަފަ އާއި އިރުޝާދު ދިނުމެވެ. އެ ކަންކަމަށް ރިއާޔަތްކޮށް ތަން ހިންގުމުގައި އިސްކޮށް ހަރަކާތްތެރިިވާނީ ސީއީއޯއެވެ.
