ސެމީގެ ފުރަތަމަ ޖާގަ ހޯދައި ކްލަބް 010 ދެވަނަ ޑިވިޝަނަށް ޕްރޮމޯޓްވެއްޖެ

މިހާރު ކުރިޔަށްދާ ތިންވަނަ ޑިވިޝަން ފުޓްބޯޅަ މުބާރާތުގެ ސެމީ ފައިނަލުގެ ފުރަތަމަ ޖާގަ ކުލަބް އޮންލީ ވަން އޮޕޮޗޫނިޓީ (ކްލަބް 010) ހޯދައިފިއެވެ.

މުބާރާތުގެ ސެމީ ފައިނަލުން ކްލަބް 010 ޖާގަ ހޯދުމާއެކު އެ ކްލަބް ވަނީ އެފްއޭއެމް ދެވަނަ ޑިވިޝަން ފުޓްބޯޅަ މުބާރާތައް ޕްރޮމޯޓްވެފައެވެ.

އެއް ނަންބަރު ޓާފް ދަނޑުގައި މިއަދު ހަވީރު ކުޅުނު ތިންވަނަ ޑިވިޝަންގެ ކުއާޓާ ފައިނަލުގެ ފުރަތަމަ މެޗުގައި ކްލަބް 010 ނުކުތީ ޓެންޓް ސްޕޯޓްސް ކްލަބާއި ދެކޮޅަށެވެ. މި މެޗު ކްލަބް 010 އިން ކާމިޔާބުކުރީ 0-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑު ޖަހާނެ ގިނަ ފުރުޞަތުތައް ތަނަވަސްކުރީ ކްލަބް 010 އިންނެވެ. އެގޮތުން އެޓީމުން ފޮނުވާލި ގިނަ ހަމަލާތައް ޓެންޓް ސްޕޯޓްސް ކްލަބުގެ ކީޕަރ ވަނީ ދިފާޢުކޮށްފައެވެ. ނަމަވެސް ފުރަތަމަ ހާފް ނިމެން ކުޑަތަން ވެފައިވަނިކޮށް ކްލަބް 010 އިން ލަނޑެއް ޖަހާ ލީޑު ނަގަން ކުރި މަސައްކަތް ވަނީ ކާމިޔާބުކޮށްފައެވެ. އެގޮތުން އެ ކްލަބަށް ލީޑު ނަގައިދިން ލަނޑު ކާމިޔާބުކޮށްދިނީ، ޝަހީމް އަބްދުލް ގާދިރުއެވެ.

ދެވަނަ ހާފް ފަށައިގެން ދެ ޓީމުގެ ފަރާތުންވެސް ފެނިގެންދިޔައީ ދާދި ހަމަހަމަ ކުޅުމެކެއެވެ. މެޗުގައި ކްލަބް 010 ގެ ދެވަނަ ލަނޑު ދެވަނަ ހާފު ނިމެން އުޅެނިކޮށް ކާމިޔާބުކޮށްދިނީ ގޮޑްފްރޭ ވެސްޓް އޮމޮޑޫއެވެ.

ކުއާޓާގެ ދެވަނަ މެޗުގައި މިރޭ 9 ޖަހާއިރު ބައްދަލުކުރާނީ ބުރު ސްޕޯޓްސް ކުލަބާއި ކެޕިޓަލް ސިޓީ ސްޕޯޓްސް ކުލަބެވެ.