ދެކުނު އޭޝިއާގެ ގައުމުތަކުގެ މެދުގައި ބާއްވާ އެންމެ ބޮޑު ފުޓްބޯޅަ މުބާރާތް ކަމަށްވާ ސާފް ޗެމްޕިއަންޝިޕް ފުޓްބޯޅަ މުބާރާތް ބާއްވަން ރާއްޖެއިން ކުރި ބިޑް ކާމިޔާބުކޮށްފިއެވެ.
ރާއްޖޭއިން މި މުބާރާތް ބާއްވަން ކުރި ބިޑް ކާމިޔާބުކުރީ ނޭޕާލާ ވާދަކޮށެވެ. މުބާރާތް ކުރިޔަށްދާނީ އޮކްޓޯބަރ މަހުގެ 1 އިން 14 ގެ ނިޔަލަށެވެ.
ރާއްޖެ އަށް މުބާރާތް ބޭއްވުމުގެ ފުރުސަތު ލިބުނުކަން ޔަގީންވީ މިއަދު ކުރިއަށްދިޔަ ސާފްގެ މެމްބަރު ގައުމުތަކުގެ ބައްދަލުވުމުގައެވެ. ނޭޕާލަށް ވުރެ ބޮޑަށް ރާއްޖެ އަށް ފުރުސަތު ފަހިވީ މިވަގުތު ކޮވިޑްގެ ހާލަތު ރާއްޖޭގައި ރަނގަޅުވުމުންނެވެ.
މީގެ ކުރިން 2008 ވަނަ އަހަރު ރާއްޖެއިން ވަނީ ސްރީލަންކާ އާ ގުޅިގެން ސާފް ޗެމްޕިއަންޝިޕް ހޯސްޓް ކޮށްފައެވެ. ނަމަވެސް މިއީ މި މުބާރާތް ރާއްޖޭގައި އެކަނި ހޯސްޓްކުރާ ފުރަތަމަ ފަހަރެއެވެ.
މި ފަހަރުގެ ސާފް ޗެމްޕިއަންޝިޕަކީ އެންމެ ފުރަތަމަ މިދިޔަ އަހަރު ބަންގްލަދޭޝްގައި ބާއްވަން ނިންމި މުބާރާތެެކެވެ. އެކަމަކު، ކޯވިޑް-19ގެ ހާލަތު މިދިޔަ އަހަރު ގޯސްވެފައި އޮތުމުން މި އަހަރަށް ފަސްކުރީއެވެ. ކޯވިޑްގެ އުނދަގޫ ހާލަތާ އެކު ސްޕޮންސަރުން ލިބުން ދަތިވުމާއި ސަރުކާރުގެ އެއްބާރުލުން އެންމެ ރަނގަޅަށް ނުލިބުމުން ބަންގްލަދޭޝުން މުބާރާތް ނުބާއްވަން ނިންމީ އެވެ.
ސާފް ޗެމްޕިއަންޝިޕް ހޯސްޓްކުރަން ރާއްޖެއަށް ފުރުޞަތު ލިބުމާއެކު މިއަހަރު ރާއްޖޭގައ ބައިނަލްއަޤްވާމީ ދެ މުބާރާތް އޮންނާނެއެވެ. އެއީ މިމަހު ރާއްޖޭގައި ބާއްވަން ފުރުޞަތު ލިބިފައިއޮތް އޭއެފްސީ ކަޕް ފުޓްބޯޅަ މުބާރާތް ހިމަނައިގެންނެވެ.
ކޮމެންޓު ފޮނުވާ