މިހާރު ކުރިޔަށްދާ އެފްއޭއެމް ތިންވަނަ ޑިވިޝަން ފުޓްބޯޅަ މުބާރާތުގެ ކުއާޓާ ފައިނަލަށް ދަތުރުކުރި ޓީމުތައް ކަށަވަރުވެއްޖެއެވެ.
މުބާރާތުގެ ކުއާޓާ ފައިނަލަށް ދަތުރުކުރި ޓީމުތައް ކަށަވަރުވީ ގްރޫޕް ސްޓޭޖުގެ ފަހު މެޗުތައް އިއްޔެ ނިމުމާއެކުއެވެ.
މުބާރާތުގައި އިއްޔެ ހަވީރު ކުޅުނު މެޗުގައި ބައްދަލުކުރީ، އެލްޓީ ސްޕޯޓްސް ކުލަބާއި ބުރު ސްޕޯޓްސް ކްލަބެއެވެ. މި މެޗް 5-1 އިން ކާމިޔާބު ކުރީ ބުރު ސްޕޯޓްސް ކުލަބެވެ. މި މެޗުގައި ބުރު ސްޕޯޓްސް ކްލަބުގެ ލަނޑުތައް އެޓީމަށް ކާމިޔާބުކޮށްދިނީ، ސޮބޮލް އިލިއާ މުހައްމަދު އަތީފް އަދި ކެޕްޓަން އިބްރާހިމް މައިސާން އެވެ. އަދި ބުރު ޓީމުގެ އެއް ލަނޑަކީ އެލްޓީ ސްޕޯޓްސް ކުޅުންތެރިއެއް އަތުން ބައިކޮޅަށް ވަން ލަނޑެކެއެވެ. މެޗުގައި އެލްޓީ ސްޕޯޓްސް ކްލަބުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ، އިބްރާހިމް ހާރޫންއެވެ.
ތިންވަނަ ޑިވިޝަން ފުޓްބޯޅަ މުބާރާތުގެ ގްރޫޕް ސްޓޭޖުގައި ކުޅެން ޝެޑިއުލްކޮށްފައި އޮތް ފަހު މެޗުގައި ރޭ ބައްދަލުކުރަން އޮތީ ކްލަބް އޯވަންއޯ އާއި ރޭޖް ސްޕޯޓްސް ކްލަބެއެވެ. ނަމަވެސް ރޭޖް ސްޕޯޓްސް ކްލަބުގެ ކުޅުންތެރިން ހަމަ ނުވުމުން ކްލަބް އޯ ވަން އޯ އަށް ވަނީ ފައިދާ ދެ ގޯލާއެކު ތިން ޕޮއިންޓް ލިބި ކުއާޓާ ފައިނަލަށް ދަތުުރުކޮށްފައެވެ. މި މެޗު ކުޅެގެން މޮޅުވި ނަމަ، ރޭޖް ސްޕޯޓްސް ކްލަބަށް ގުރޫޕް 4 ގެ ދެ ވަނަ ޓީމުގެ ގޮތުގައި ކުއާޓާގެ ޖާގަ އެޓީމަށް ކަށަވަރު ވީހެވެ.
މި ނަތީޖާއާއެކު މި މުބާރާތުގެ ކުއާޓާ ފައިނަލަށް ދަތުރުކުރި ޓީމު ތަކަކީ، ޓެންޓް ސްޕޯޓްސް ކްލަބް، ކްލަބް އޯވަންއޯ، ބުރު ސްޕޯޓްސް ކްލަބް، ކެޕިޓަލް ސިޓީ ސްޕޯޓްސް ކްލަބް، ލޮރެންޒޯ ސްޕޯޓްސް ކްލަބް، އެލްޓީ ސްޕޯޓްސް ކްލަބް އަދި ކްލަބް ޓީނޭޖްގެ އިތުރުން ބިސްބުރު ސްޕޯޓްސް ކްލަބެއެވެ.
15 ޓީމު ވާދަކުރާ މި މުބާރާތުގެ ކުއާޓާ ފައިނަލުގެ މެޗުތައް ކުޅުމަށް ހަމަޖެހިފައިވަނީ ބުދަ އަދި ބުރާސްފަތި ދުވަހު އެފްއޭއެމް ޓާފް ދަނޑުގައެވެ.
ކޮމެންޓު ފޮނުވާ