ކޯވިޑް-19 އާއި ގުޅިގެން ލާމަރުކަޒީ ޤާނޫނުގައި ބުނާ ތިން މަސް ދުވަހުގެ ތެރޭގައި ކައުންސިލްތަކުން އެކުލަވާލަން ޖެހޭ ތަރައްޤީގެ ޕްލޭންއާއި ލޭންޑްޔޫސް ޕްލޭން އެކުލަވާނުލެވުނު ކަމުގައި ވީނަމަވެސް އާންމު ޞިއްހަތުގެ ކުއްލި ނުރައްކަލުގެ ޤާނޫނުގެ ދަށުން ޕްލޭން އެކުލަވާލުމަށް ފުރުސަތު ލިބިދޭކަމަށް ލޯކަލް ގަވަރުމަންޓް އޮތޯރިޓީން ވިދާޅުވެއްޖެއެވެ. ޤާނޫނީ ގޮތުން އުފެދިފައިވާ ސުވާލުތަކާއި ގުޅިގެން މަޖިލީހުގެ ލާމަރުކަޒީ ކޮމިޓީން ވަނީ މިކަމުގައި މިއަދު މަޝްވަރާ ކުރައްވާފައެވެ.
ތަރައްޤީގެ ޕްލޭންއާއި ލޭންޑްޔޫސް ޕްލޭން އެކުލަވާލުމަށްޓަކައި ޤާނޫނުގައި ބުނާ މުއްދަތުގައި ޕްލެއިންތައް އެކުލަވާ ލެވިފައި ނުވަނީ 43 ރަށެއްގައެވެ. ކޮމެޓީގެ މިއަދުގެ ބައްދަވުމުގައި ވަނީ ލޯކަލްގަވަރުމަންޓް އޮތޯރިޓީގެ މަޝްވަރާވެސް މިކަމުގައި ހޯދާފައެވެ. އެލްޖީއޭގެ ޤާނޫނީ ޓީމުންވެސް ލަފާދީފައިވަނީ އާންމު ޞިއްޚަތުގެ ކުއްލި ނުރައްކަލުގެ ޤާނޫނުގެ 43 ވަނަ މާއްދާގެ ދަށުން މުއްދަތު ހަވިޔަސް ޕްލޭންތައް އެކުލަވާލުމުގެ ފުރުސަތު އޮތްކަމަށެވެ.
އެލްޖީއޭގެ ސީއީއޯ އަފްޝަން ލަތީފް ވިދާޅުވީ، ކޯވިޑްގެ ހާލަތުގައި ގިނަ ރަށްތަކެއް މޮނިޓަރުންގައި އޮވެ ރައްޔިތުންނާއި ބައްދަލުކުރުމަށް ދަތިތަކެއް ހުރުމުން، ޕްލޭން އެކުލަވާލުމަށް ދަތިވާކަމުގެ ޝަކުވާ ލިބިފައިވާކަމަށެވެ. ކައުންސިލްތަކުން މީގެ ކުރިން ރަނގަޅު ޕްލެއިންތަކެއް އެކުލަވާލާފައި ނުވުމުން، މިހާރު އޮތް ކައުންސިލްތަކުން ރަށްރަށުގެ ޕްލޭން ހަދާއިރު އެއްޗަކަށް އެއްޗެއް ހެދުމަށްވުރެ ފުރުސަތު ދީގެން ރަނގަޅު ޕްލޭނެއް ހެދުމަށް ވަގުތު ދިނުމަކީ މުހިންމު ކަމެއްކަމަށް އަފްޝަން ވިދާޅުވިއެވެ.
މިބައްދަލުވުމުގައި ލާމަރުކަޒީ ކޮމެޓީގެ މުޤައްރިރު އަލީ ނިޔާޒު ވިދާޅުވީ އެއްވެސް ގޮތެއް ނެތިގެން ނޫނީ ޤާނޫނަށް ބަދަލު ގެންނައުމަކީ ތައީދު ކުރައްވާ ކަމެއްކަމެއް ނޫންކަމަށެވެ. މިކަމުގައި ޤާނޫނީ ގޮތުން ހުރި ހުރަސްތަކަކީ ކޮބައިތޯ ބަލައި، ކައުންސިލާ ޖެނެރަލްއާއި، އަދި އެނޫން އިދާރާތަކުގެ މަޝްވަރާވެސް ހޯދުމަށް ނިންމާފައިވާކަމަށެވެ.
މިބައްދަލުވުމުގައި މެމްބަރުންވެސް އަދި އެލްޖީއޭގެވެސް އެންމެ ބޮޑު ކަންބޮޑުވުމަކަށް އޮތީ ޕްލޭން އެކުލަވާ ނުލާ އޮތް ރަށްރަށުން ކުރީގެ ޤަނޫނުގެ ދަށުން ބިންތައް ބޭނުން ކުރެވިދާނެތޯ އޮތް ސުވާލެވެ. މިކަމުގައިވެސް މަޖިލިސް ހުޅުމުގެ ކުރިން ހައްލުތަކެއް ހޯދުމަށް ކޮމެޓީން މަސައްކަތް ކުރައްވާނެކަމަށް މުޤައްރިރު ވިދާޅުވިއެވެ. އަދި މިހާރުވެސް ބައެއް ރަށްތަކުގައި ސަރުކާރުން ހިންގާ މަޝްރޫޢުތައް ހިންގުމުގައި ޤާނޫނީ ފުށޫއެރުންތަކެއް އުޅޭތީ އެކަމަށް އަވަސް ހައްލުތަކެއް ހޯދުމަކީ ކޮންމެހެން ކުރަންޖެހޭ ކަމެއްކަމަށް އަލީ ނިޔާޒު ވިދާޅުވިއެވެ.
ލާމަރުކަޒީ ޤާނޫނުގައި ބުނާގޮތުން މިމަހުގެ 17 ވަނަ ދުވަހުގެ ކުރިން ރަށްރަށުގެ ލޭންޑް ޔޫސް ޕްލޭންނާއި ތަރައްޤީގެ ޕްލޭން އެކުލަވާލައި، ލޯކަލް ގަވަރުމަންޓް އޮތޯރިޓީއަށް ހުށަހަޅަންޖެހެއެވެ. ނަމަވެސް ކޯވިޑް-19ގައި ގިނަ ރަށްތަކެއް މޮނިޓަރިންގައި އޮތުމުން މިމަސައްކަތް ވަނީ އެންމެ އެކަށީގެންވާ ގޮތަށް ނުކުކުރެވިފައެވެ.
