ކުރީގެ ހޯމް މިނިސްޓަރ އުމަރު ނަސީރު އިސްކޮށް ހުންނަވައިގެން ހިންގަމުން އަންނަ ދިވެހި ނެޝެނަލް އެކްޝަން، (ޑީއެންއޭ) އިން ކުރިއަށް އޮތް ރިޔާސީ އިންތިހާބަށް ކެންޑިޑޭޓަކު ނެރެން ނިންމައިފިއެވެ.
ޑީއެންއޭއިން ރޭ ނެރުނު ބަޔާނެއްގައި ބުނީ 2023 ގައި ބާއްވާ ރިޔާސީ އިންތިހާބުގައި ޑީއެންއޭގެ ފަރާތުން ވާދަކުރުމަށް ރިޔާސީ ކެންޑިޑޭޓަކު ނެރުމަށް އިއްޔެ ބޭއްވި އިންޓަރިމް އެގްޒެކްޓިވް ކައުންސިލް (އެކްސްކޯ)ގެ 20 ވަނަ ބައްދަލްވުމުގެ އިއްތިފާގުން ފާސްކޮށްފައިވާ ކަމަށެވެ.
Riyaasee 2023 pic.twitter.com/6HudVxJ7Df
— Dhivehi National Action (@DNAmaldives) August 7, 2021
ޑީއެންއޭ އުފެއްދުމުގައި އިސްކޮށް ހުންނެވި އުމަރު ނަސީރު 2023 ވަނަ އަހަރުގެ ރިޔާސީއިންތިޚާބުގައި ވާދަކުރައްވަން މީގެކުރިން ޝައުގުވެރިކަން ފާޅުކޮށްފައި ވީނަމަވެސް ޑީއެންއޭ އިފްތިތާހު ކުރުމަށް މާރިޗު މަހުގެ ތިންވަނަ ދުވަހުގެ ރޭ ބޭއްވި ހަފްލާގައި އުމަރު ވިދާޅުވީ ޑީއެންއޭ އަކީ ކުރިއަށް އޮތް ރިޔާސީ އިންތިހާބަށް ތާއްޔާރުވާން އުފެއްދި ހަރަކާތެއް ނޫން ކަަމަށެވެ.
އުމަރު އެދުވަހު ވިދާޅުވީ ޑީއެންއޭއަކީ ދިވެހި ވަތަން ދިވެހިންނަށް އަނބުރާ ހޯދައިދިނުމަށް ފަށާ ހަރަކާތެއް ކަމަށެވެ. އަދި އެއީ ކޮރަޕްޓް ޕޮލިޓީޝަނުންގެ އަތުން ޤައުމު އަނބުރާ އަތުލައި ޤައުމުގައި ހުރި ބޮޑެތި މައްސަލަތައް ހައްލުކޮށް ރާއްޖެ އަމިއްލަ ފައިމައްޗަށް ނެގުމަށް ފަށާ ގައުމީ މަސައްކަތެއް ކަމަށް އުމަރު އޭރު ވިދާޅުވިއެވެ.
މީގެއިތުރުން ރާއްޖެ އާ މިސްރާބަކަަށް ގެންދަން ލިބޭނެ އެންމެ ރަނގަޅު ފުރުސަތަކީ ރިޔާސީ އިންތިހާބު ކަމަށާއި، އިންތިހާބު ގާތްވުމުން ޑީއެންއޭއިން އެކަމުގައި ގޮތެއް ނިންމާނެކަމަށް އުމަރު އޭރު ވަނީ ވިދާޅުވެފައެވެ.
ޑީއެންއޭގެ ސްޕޯކްސް ޕަރސަން އަބްދުﷲ ޝުޖާއު ވިދާޅުވީ އެ ހަރަކާތުގެ ފަރާތުން އިންތިހާބަށް ނެރޭނެ ވަކި ކެނޑިޑޭޓަކު އަދި ނިންމާފައިނުވި ނަމަވެސް ޑީއެންއޭގެ ތެރޭގައި މިހާރުވެސް އިންތިހާބުގައި ވާދަކުރައްވަން ޝައުގުވެރިކަން ހުންނެވި ބޭފުޅުން ތިއްބެވި ކަމަށެވެ.
ނަމަވެސް ޑީއެންއޭގެ ފަރާތުން ރިޔާސީ އިންތިޚާބުގައި ވާދަކުރާނެ ކެނޑިޑޭޓެއް ކަނޑައަޅާނީ ސީދާކޮންގޮތަކަށް ކަމެއް އެހަރަކާތުން އަދި ހާމައެއް ނުކުރެއެވެ.
އުމަރު ނަސީރުގެ އިތުރުން ކުރީގެ ފޮރިން މިނިސްޓަރ އަދި ރައީސް މައުމޫންގެ ދަރިކަނބަލުން ދުންޔާ މައުމޫނަކީވެސް ޑީއެންއޭގެ ހަރަކާތްތަކުގައި އިސްކޮށް ފެންނަ ބޭކަނބަލެކެވެ.
