މާލެ ސިޓީގެ ރައްޔިތުންގެ އެދުމާއި އެއްގޮތަށް ގުޅީފަޅު ބޯހިޔާވަހިކަމަށް ޚާއްޞަ ތަނަކަށް ހެދުމަށްޓަކައި ސަރުކާރާއިއެކު ކުރެވުނު މަޝްވަރާތަކުން އެއްވެސް ކުރިއެރުމެއް ނުލިބޭކަމަށާއި، ނަމަވެސް އަދިވެސް އުންމީދު ގެއްލުވާ ނުލާކަަމަށް ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މޭޔަރު މުއިއްޒު ވިދާޅުވީ މާލެ ސިޓީގައި ދިރިއުޅޭ ރައްޔިތުންގެ އަޑު އަހައި ސަރުކާރުން ކަންކަން ނިންމުމުގައި އިސްކަން ދެއްވާނެކަމަށް އުންމީދުކުރާކަމަށެވެ. ގުޅީފަޅަކީ މާލޭގެ ރައްޔިތުންނަށް ބޯހިޔާވަހިކަމަށް ފަސޭހަކަމާއިއެކު ހަމަޖެއްސޭނެ ތަނަކަށްވާއިރު އެކަން ނުކުރަން އުޅޭ އުޅުމަކީ ރަނގަޅު ގޮތެއް ނޫންކަމަށް މުއިއްޒު ވިދާޅުވިއެވެ.
ގުޅީފަޅަކީ މާލެ ސިޓީގެ ރައްޔިތުންނަށް ފަސޭހައިން ބޯހިޔާވަހިކަން ހަމަޖައްސައިދިނުމަށް އޮތް ތަނަވަސް ތަނުގެ ގޮތުގައި މާލެ ސިޓީގެ ގިނަ ރައްޔިތުން ދަނީ ބުނަމުންނެވެ. ނަމަވެސް މިސަރުކާރުން ނިންމާފައިވަނީ އެތަނުގައި ޕޯޓެއް އެޅުމަށެވެ. މުޢިއްޒުގެ އެދިވަޑައިގަތުމަކީ މާލޭ ޕޯޓް ތިލަފުއްޓަށް ބަދަލުކުރުމެވެ. އަދި އެމަސައްކަތް މިހާރުވެސް ކުރެވެމުންދާކަމަށް ސަރުކާރުން ވަނީ ހާމަކޮށްފައެވެ. ގުޅީފަޅުގައި މާލޭގެ ރައްޔިތުންނަށް ބޯހިޔާވަހިކަން ލިބޭނެ ގޮތެއް ހޯދުމަށް މާލެ ސިޓީ ކައުންސިލްގެ މޭޔަރު ޑރ.މުއިއްޒު ދަނީ މޭޔަރުގެ މަޤާމާއި ހަވާލުވިފަހުން ގިނަ މަސައްކަތްތަކެއް ކުރަނުންނެވެ.
އެގޮތުން ރައީސް އިބްރާހިމް މުހައްމަދު ޞާލިހުއާއިއެކު ބޭއްވުނު ބައްދަލުވުމުގައި މުއިއްޒު ވަނީ ގުޅީފަޅަކީ ބޯހިޔާވަހިކަމަށް އެކަނި ޚާއްޞަ ތަނަކަށް ހެދުމަށާއި، އެތަނުގައި ޕޯޓް އެޅުމަށް ކޮށްފައިވާ ޕްލޭނަށް ބަދަލު ގެނައުމަށް އެދިވަޑައިގެންފައެވެ. މުޢިއްޒު ވިދާޅުވީ، ރައީސްއާއި ކުރެވުނު މަޝްވަރާތަކުގައި އެންމެ ބޮޑަށް އެދިވަޑައިގަތީ މާލޭގެ ރައްޔިތުންނަށް ބޯހިޔާވަހިކަން ލިބޭނެ ގޮތްތައް މަގުފަހިކޮށްދިނުމާއި ގުޅޭގޮތުންކަމަށެވެ. އެކަމަށް މާލެއާއި އެންމެ ކައިރިން ގުޅިފަޅު ޚާއްޞާކޮށް، އެތަނުން ގޯތި ދޫކުރުން ނުވަތަ ފްލެޓް ދިނުމަށާއި، އެއީ މާލޭގެ ރައްޔިތުން އެދޭގޮތްކަމަށް ދެންނެވިކަމަށެވެ.
މުޢިއްޒު ވިދާޅުވީ ގުޅީފަޅުން ފަސް ހާހެއްހާ ގޯތި ދޫކުރެވޭނެކަމަށެވެ. އެހެންކަމުން ގުޅީފަޅަކީ ގެދޮރުވެރިިކަމުގެ މަންޒިލަކަށް ބަދަލުކޮށް ތިލަފުށި ޕޯޓަށް ބަދަލުވާނެކަމުގެ އުއްމީދު އެބައޮތްކަމަށް މުޢިއްޒު ވަނީ މީގެ ކުރިންވެސް ތަކުރާރުކޮށް ވިދާޅުވެފައެވެ.
