ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން މިހާރު ދައުވާ އުފުލާފައިވާ ރ. ފުއްގިރީގެ މައްސަލައިގައި އެމަނިކުފާނު ފުލުހުންނަށް ދެއްވި ބަޔާނުގައިވާ މައުލޫމާތު ތަކެއްކަމަށްބުނެ އޮންލައިން ނޫހެއްގައި ޝާޢިއުކޮށްފައިވާ މައުލޫމާތުތަކެއްގެ މައްސަލަ ބަލައިދިނުމަށް އިދިކޮޅު، ޕްރޮގްރެސިވް ކޮންގްރެސް ކޯލިޝަނުން ގޮވާލައިފިއެވެ.
ޕީޕީއެމުން ރޭ ނެރެފައިވާ ބަޔާނެއްގަައި ބުނެފައިވަނީ އޮންލައިން ނޫސް "އަދަދު"ގައި ޝާއިއުކޮށްފައިވާ ހަބަރުގައި ކަންބޮޑުވާ އެތައް ކަމެއް ހުރި ކަމަށާއި އެކަން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އެ މައުލޫމާތުތަކަކީ ކަމުގެ ހަގީގަތް ރައްޔިތުންނަށް އޮޅުވާލުމާއެކު ޝަރީއަތަށް ނޫފޫޒު ފޯރުވުމަށް ސަރުކާރު އަޑީގައި އޮވެގެން ހިންގާފައިވާ ޖަރީމާއެއް ކަމަށް ބަޔާނުގައިވެއެވެ.
އެ ޚަބަރުގައި ރައީސް ޔާމީނާއި އެމަނިކުފާނުގެ ވަކީލުންގެ ފަރާތްޕުޅުން ކޯޓުގައި ދައްކަވާފައިވާ ވާހަކަ ތަކެއްގެ އިތުރުން، އެމަނިކުފާނުގެ ފަރާތްޕުޅުން ތަޙުޤީޤީ އިދާރާއަކަށް ދެއްވާފައިވާ ކަމަށް ބުނާ ޞައްޙަކަން ކަށަވަރު ނުވާ އެތައް މަޢުލޫމާތެއް ހުރިކަން ފާހަގަވެފައި ވާކަމަށްވެސް އިދިކޮޅުގެ ބަޔާނުގައި ބުނެފައި ވެއެވެ.
"ކޯޓެއްގައި ހިނގަމުން ދާ މައްސަލައަކާ ގުޅިގެން، ތަޙުޤީޤީ އިދާރާއަކަށް ޢާންމު ފަރުދަކު ދީފައިވާ މަޢުލޫމާތުތަކެއް ނޫހެއްގައި ޝާއިޢުކޮށް ހެދުމަކީ ޝަރީޢަތަށް ސީދާ ގޮތުން ނުފޫޒު ފޯރުވުމުގެ ޢަމަލެއްކަމުގައި ބެލެވޭއިރު، އެފަދަ މަޢުލޫމާތެއްގެ ތެދު ދޮގު ސާފު ކުރުމެއް ނެތި ޝާއިޢުކުރި ފަރާތުން އެކުރަނީ ޖިނާޢި ކުށެއްގެ ގޮތުގައި މިކޯލިޝަނުން ސިފަ ކުރަމެވެ."
– ޕްރޮގްރެސިވް ކޯލިޝަން
އެހެންކަމުން އެ ނޫހުގެ މައްސަލަ ބަލައި، އެ ޚަބަރު ލިޔެފައިވާ ފަރާތަށާއި، އެ ނޫހުގެ އެޑިޓަރު އަދި މަސްއޫލުވެރިންނާއި މެދު ފިޔަވަޅު އެޅުމަށް ދައުލަތުގެ ކަމާ ބެހޭ މުއައްސަސާތަކަށް އިދިކޮޅުން ވަނީ ގޮވާލާފައެވެ. ހަމައެއާއެކު ތަޙުޤީޤީ ބަޔާނެއްގައި ހުރި ވާހަކަތަކެއް ކަމަށް ބުނެފައި ވާއިރު އެއީ އެބަޔާނުގައި ހުރި ވާހަކަތަކެއްނަމަ، އެ ބަޔާނެއް ނުވަތަ އެ ބަޔާނެއްގައި ވާ ވާހަކަތަކެއް އެ ނޫހަކަށް ލިބިފައިވާ ގޮތެއްވެސް ހޯދާ އެ ކަން ކުރި ބަޔަކާމެދުވެސް ފިޔަވަޅު އެޅުމަށް އިދިކޮޅުން ވަނީ ގޮވާލާފައެވެ.
"އެ ޚަބަރު ކިޔާލުމުން އެޚަބަރުގައި ވާ މައުލޫމާތުތަކުން ކުށެއް ނެތް މައުސޫމް ބޭފުޅަކު ރައްޔިތުންގެ ކުރިމަތީ ބަދުނާމު ކުރުމަށް މަސައްކަތް ކޮށްފައިވާކަމަށް ބެލެވޭތީ، މިކަމަކީ ސަރުކާރާއި ޕްރޮސެކިއުޓަރ ޖެނެރަލް އާއި ފުލުހުންގެ އިދާރާ ގުޅިގެން ހިންގާފައިވާ ޖަރީމާއެއްކަމަށްވެސް ބެލުމުގެ ޖާގަ އޮތްކަމަށް ފެންނާތީ، އެކަންވެސް ސަރުކާރުގެ ނުފޫޒުތަކުން އެކަހެރިވެފައިވާ ދައުލަތުގެ މިނިވަން މުއައްސަސާއަކުން ބަލާ ފިޔަވަޅު އެޅުމަށް މިކޯލިޝަނުން ގޮވާލަމެވެ." އިދިކޮޅުގެ ބަޔާނުގައި ބުނެފައިވެއެވެ.
ރ. ފުއްގިރި ތަރައްގީކުރަން ކުއްޔަށް ދޫކުރުމުގެ މުއާމަލާތުގައި މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލާގައި ރައީސް ޔާމިންގެ މައްޗަށް ވަނީ، މަނީ ލޯންޑްރިންގއާއި ރިޝްވަތު ޤަބޫލުކުރުމުގެ ކުށުގެ ދައުވާ އުފުލާފައެވެ.
