ގެއްލުވާލާފައިވާ މީހުންނާއި މަރުތައް ތަހުގީގު ކުރާ ރިޔާސީ ކޮމިޝަނަށް ކުރީގެ ރައީސް އަބްދުﷲ ޔާމީން ހާޒިރުކުރުމުން، މައުލޫމާތު ދެއްވާފައި ނުވަނީ، ތުހުމަތުތައް ސާފުކޮށްނުދިނުމުން ކަމަށް އެމަނިކުފާނުގެ ގާނޫނީ ވަކީލުންގެ ވިދާޅުވެއްޖެއެވެ.
މަރާލާފައިވާ ނޫސްވެރިޔާ އަހުމަދު ރިލްވާން އަބްދުﷲ ގެ މައްސަލާގައި މަރުކޮމިޝަނަށް ރައީސް ޔާމީން ހާޒިރުކޮށް ސުވާލުކުރުމުން ޖަވާބުނުދެއްވައި ހަނުހުންނެވީކަމަށް އެކިމިޝަނުން ވިދާޅުވެފައި ވާތީ އެމަނިކުފާނުގެ ގާނޫނީ ވަކީލުންގެ ޓީމުން ނެރުއްވި ބަޔާނެއް ގައި ބުނެފައި ވަނީ މަރު ކޮމިޝަނަށް، އިއްޔެ ރައީސް ޔާމީން ހާޒިރުކޮށް، ސުވާލު ކުރެވުނު މައްސަލާގައި، އެމަނިކުފާނުގެ މައްޗަށް ކޮމިޝަނުން ކުރާ ތުހުމަތަށް އެމަނިކުފާނު އިންކާރު ކުރައްވާފައިވާ ކަމަށެވެ. އަދި އެއީ އުފައްދާފައިވާ ތުހުމަތެއް ކަމަށް ގަބޫލުކުރެވޭތީ އާއި ރައީސް ޔާމީން އެކަމުގައި އަޅާފައިވަނީ ކޮން ހުރަހެއް ކަން ސާފުނުކޮށްދެވޭތީ މައުލޫމާތު ނުދެއްވާނެ ކަމަށް ޔާމީން ވިދާޅުވިކަން އެ ބަޔާނުގައިވެއެވެ.
އަދި، ރައީސް ޔާމީން އެ ކޮމިޝަނަށް ހާޒިރުކޮށްފައި ވަނީ އެއްވެސް ހާލެއްގައި ހަރުދަނާ އެއްވެސް ހެއްކެއް ހުރެގެނެއް ނޫން ކަަމަށް ވެސް އެ ވަކީލުންގެ ބަޔާނުގައި ވަނީ ވިދާޅުވެފައެވެ.
"އެ މައްސަލާގައި އިތުރަށް ކޮމިޝަނަށް ދޭންޖެހޭ މަޢުލޫމާތެއް ނުވަތަ ދައްކަންޖެހޭ ވާހަކައެއް ނެތްކަމުގައި ކޮމިޝަނުގެ ތަހުޤީޤުގައި ވަނީ ދަންނަވާފައެވެ"
– ވަކީލުން
ވަކީލުންގެ ބަޔާނުގައި ބުނެފައި ވަނީ، ރައީސް ޔާމީންގެ މައްޗަށް ސަރުކާރުގެ ސިޔާސީ ފަރާތްތަކާއި އަދި ސަރުކާރާއި ބައިއަތު ހިފާފައިވާ، އެމަނިކުފާނާއި ވާދަވެރި ސިޔާސީ ފަރާތްތައް، އަޑީގައި ތިބެގެން އެކިއެކި ތަހުގީގު އިދާރާތައް މެދުވެރިކޮށް، އަސްލެއްނެތް ތުހުމަތުތައް އުފައްދައިގެން ތަހްގީގު ކުރުމުގެ ނަމުގައި ސުވާލުކުރުމަށް ހާޒިރު ކުރަމުންގެންދަނީ ސިޔާސީ ގޮތުން ގޯނާ ކުރުމަށް ކަމަށެވެ.
އަދި ގާނޫނު ތަންފީޒުކުރާ އިދާރާތަކާއި ތަހްގީގު އިދާރާ ތަކުގެ އޮފިޝަލުން މިފަދަ ނޭއްގާނީ އަދި ގާނޫނާއި ޚިލާފު ޢަމަލުތަކުގައި ބައިވެރިވުމަކީ އެފަރާތްތަކުގެ ޢަމަލުތަކަށް މުސްތަޤްބަލުގައި ޒިންމާނަގަންޖެހޭނެ ޢަމަލުތަކެއްކަމުގައި ހަނދާންކޮށްދޭ ކަމަށްވެސް ރައީސް ޔާމީންގެ ގާނޫނީ ޓީމުގެ ބަޔާނުގައި ބުނެފައި ވެެއެވެ.
ރައީސް ޔާމީން އިއްޔެ ކޮމިޝަނަށް ހާޒިރުކުރުމާގުޅޭގޮތުން ކޮމިޝަނުގެ މެމްބަރު މިސްބާހު އައްބާސް ވިދާޅުވީ ރައީސް ޔާމީން ކޮމިޝަނަށް ހާޒިރުކޮށް ނޫސްވެރިޔާ އަޙްމަދު ރިޟްވާން ޢަބްދުﷲގެ މަރުގެ މައްސަލާގައި އެމަނިކުފާނުގެ މައްޗަށް ކުރެވިފައިވާ ތުހުމަތުތަކާ ގުޅިގެން ޖަވާބުދާރީވާން ތަކުރާރުކޮށް ފުރުސަތު އެރުވިކަމަށެވެ. ނަމަވެސް ކޮމިޝަންގެ ސުވާލުތަކަށް ޖަވާބުނުދެއްވައި ހަނުހުންނެވީ ކަމަށް މިސްބާހް ވިދާޅުވިއެވެ.
މިސްބާހް ވިދާޅުވީ ރިލްވާންގެ އާއިލާ އާއި އެހެނިހެން އާއިލާތަކާއި ރައްޔިތުން ވެސް ބޭނުންވާނެ ގޮތަކީ ކޮމިޝަނުން ކޮށްފައިވާ ތުހުމަތުތަކަށް ރައީސް ޔާމީން ފުރިހަމައަށް ޖަވާބުދާރީވެވަޑައިގަތުން ކަމަށެވެ.
