ގެެއްލުވާލާފައިވާ ނޫސްވެރިޔާ އަހްމަދު ރިލްވާންގެ މައްސަލަ ނުބަލަން ރައީސް ޔާމީން ދުވަހަކުވެސް އޭރުގެ ހޯމް މިނިސްޓަރ އުމަރު ނަސީރަށް ނާންގާކަމަށް އޭނާ ވިދާޅުވެެއްޖެއެވެ.

ރާއްޖެ އެމްވީގައި ގެެއްލުވާލާފައިވާ ނޫސްވެރިޔާ އަހްމަދު ރިލްވާންގެ މައްސަލަ ނުބަލަން ރައީސް ޔާމީން އުމަރު ނަސީރަށް މެސެޖް ކުރެއްވިކަން ހާމަވެއްޖެކަމަށް ބުނެ ލިޔެފައިވާ ޚަބަރާއި ގުޅިގެން އުމަރު ވިދާޅުވީ މިއީ ކަނޑައެޅިގެން ހަގީގަތާއި ޚިލާފް ދޮގުވާހަކައެއް ކަމަށެވެ. ރައީސް ޔާމީން ދުވަހަކުވެސް ރިލުވާންގެ މައްސަލަ ނުބެލުމަށް އަންގަވާފައި ނުވާކަމަށް އުމަރު ވަނީ ވިދާޅުވެފައެވެ.

މިމައްސަލަ ނުބެލުމަށް ނުވަތަ ހުއްޓުވުމަކަށް ރައީސް ޔާމީން ދުވަހަކުވެސް އަޅުގަނޑުގެ ކައިރީ ވިދާޅުވެފައެއްނުވޭ. މިއީ ކަނޑައެޅިގެން "އޯވާވެލްމް"ގެ މާނަ އޮޅޭގޮތަށް ލިޔެފައިވާ ޚަބަރެއް.

– ރާއްޖެ އެމްވީގައި ލިޔެފައިވާ ޚަބަރާއި ގުޅިގެން އުމަރު ވިދާޅުވިއެވެ.

ރިލުވާން ގެއްލުނު މައްސަލައިގެ ތަހުގީގަށް މަރާލާފައިވާ މީހުންނާއި ގެއްލިފައިވާ މީހުންގެ މައްސަލަތައް ބަލާ ކޮމިޝަނަށް އިއްޔެ ރައީސް ޔާމީން ވަނީ ހާޒިރުކޮށްފައެވެ. ރިޔާސީ ކޮމިޝަނުގެ މެމްބަރު މިސްބާހު އައްބާސް ވިދާޅުވީ ރައީސް ޔާމީން ކޮމިޝަނަށް ހާޒިރުކުރީ އެމަނިކުފާނުގެ މައްޗަށް ތުހުމަތުކުރެވޭ ކަންކަމަށް ޖަވާބުދާރީވުމުގެ ފުރުޞަތު ދެއްވުމަށްކަމަށެވެ. ނަމަވެސް އެމަނިކުފާނަށް އެފުރުޞަތު ތަކުރާރުކޮށް އެރުވުމުންވެސް ހުންނެވީ ހަނުކަމަށް މިސްބާހު ވިދާޅުވިއެވެ.

މިސްބާހު ވިދާޅުވީ ރައީސް ޔާމީން ރިޔާސީ ކޮމިޝަނަށް ހާޒިރުކުރިއިރު ޤާނޫނީ ވަކީލެއްގެ ފުރުޞަތު ނުދެއްވާކަމަށް ބުނެ އެމަނިކުފާނުގެ ވަކީލު ޑރ. މުހައްމަދު ޖަމީލު ހެއްދެވީ އިތުރުފުޅުކަމަށެވެ. އަދި ޤާނޫނުގައި ކަނޑައަޅާފައިވާ މިންވަރަށް އެ ފުރުޞަތުވެސް އެމަނިކުފާނަށް ދެއްވިކަމަށް މިސްބާހު ވިދާޅުވިއެވެ.

މިސްބާހު ވިދާޅުވީ ރިޔާސީ ކޮމިޝަނަށް ރައީސް ޔާމީން އިތުރަށް ހާޒިރުކުރުމާއި މެދު ކޮމިޝަނުގައި މަޝްވަރާކުރުމަށްފަހު ގޮތެއް ނިންމާނެކަމަށެވެ.

މިނިވަން ނޫހުގެ ނޫސްވެރިޔާ އަޙްމަދު ރިޟްވާން ޢަބްދުﷲ ގެއްލުވާލިތާ 6 އަހަރަށްވުރެ ގިނަ ދުވަސްވެފައިވާއިރު، އެ މަރުގެ މައްސަލައަށް އިންސާފް ހޯދައިދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެކެވެ. އެގޮތުން ރިޟްވާން ގެއްލުވާލި މައްސަލަ ރިޔާސީ ކޮމިޝަނުން މިހާރު ތަހުޤީޤްކުރަމުންދަނީ ބޭރުގެ އިންވެސްޓިގޭޓަރެއްގެ އެހީއާއިއެކުކަމަށްވެސް އެކޮމިޝަނުން ވަނީ ހާމަކޮށްފައެވެ.

ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބެލުމަށް ރައީސުލްޖުމްހޫރިއްޔާ އެކުލަވާލާފައިވާ ކޮމިޝަނުން ވަނީ ބައެއް މީހުންގެ މައްސަލަތައް ދައުވާކުރުމަށް ޕީޖީ އޮފީހަށްވެސް ވަނީ ފޮނުވާފައެވެ. ނަމަވެސް ތަޙްޤީޤަށް ބޭނުންވާ ބައެއް ކަންކަން ފުރިހަމަ ނުވުމުން ޕީޖީ އޮފީހުން ވަނީ އެކަންކަން ފުރިހަމަ ކުރުމަށްފަހު ދައުވާކުރުމަށް މައްސަލަ އަބުރާ ކޮމިޝަނަށް ފޮނުވާފައެވެ.