ދިއެފްއެމްގެ ކުރީގެ ސީއީއޯ މަސްއޫދު ހިލްމީ އަށް ހަމަލާދިން މީހާ ފުލުހުން ހައްޔަރުކޮށްފިއެވެ.
މަސްއޫދަށް ހަމަލަދިނީ އަނބިކަނބަލުންނާއެކު (ލ.ފޮނަދޫ) ރަށުގެ ބޯޅަދަނޑު ކައިރިން ސައިކަލްގައި ރޭ ނުވައެއް ޖަހާކަންހާއިރު ވަޑައިގަންނަވަނިކޮށެވެ.
ފުލުހުން ބުނެފައިވަނީ މިހަމަލާއި ގުޅިގެން މަސްއޫދަށް އެކިވަރުގެ އަނިޔާވެގެން ފޮނަދޫ ސިއްޚީ މަރުކަޒުން ފަރުވާ ހޯދާފައިވާކަމަށެވެ. މިމާރާމާރީއާއި ގުޅިގެން ރޭ ދަންވަރު 2:18 ކަންހާއިރު 36 އަހަރުގެ ދިވެހި ފިރިހެނަކު ކޯޓު އަމުރުގެ ދަށުން ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ.
މަސްއޫދުގެ ކާރުގައި ވެސް މިދިޔަ އަހަރުގެ ފަހުކޮޅު ރޯކޮށްލާފައިވާއިރު، ރޭ ހަމަލަދިނީ ވެސް ކާރު ރޯކޮށްލި މައްސަލައިގެ ތުހުމަތު ކުރެވޭ މީހާކަމަށް ބައެއް މިޑިއާތަކުގައި މަސްއޫދު ބުނެފައިވެއެވެ. އެ މައްސަލައިގެ ތަހުގީގު އަދިވެސް ފޮނަދޫ ޕޮލިސް ސްޓޭޝަނުން ކުރިއަށް އެބަގެންދެއެވެ.
