މޭމަހުގެ 6 ވަނަ ދުވަހުގެރޭ ރައީސް ނަޝީދު އަވަހާރަ ކޮށްލަން ދިން ހަމަލާއާއި ގުޅިގެން މިހާތަނަށްވެސް ނަޝީދުގެ ބަޔާނެއް ލިބިފައި ނުވާކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ނޫސްވެރިންގެ ބައްދަލްވުމުގައި ޕްރޮސެކިއުޓަރު ޖެނެރަލް ހުސައިން ޝަމީމް ވިދާޅުވީ ރައީސް ނަޝީދުގެ ފަރާތްޕުޅުން އަދިވެސް ބަޔާނެއް ލިބިފައި ނެތް ކަަމަށެވެ. ނަމަވެސް އުންމީދު ކުރައްވަނީ ވަރަށް އަވަހަށް އެމަނިކުފާނުގެ ފަރާތްޕުޅުން ބަޔާނެއް ލިބިވަޑައިގަންނަވާނެ ކަމަށެވެ.
އަދި ބަޔާނެއް ދެއްވާފައި ނެތް. އަޅުގަނޑުމެން މަސައްކަތް އެބަކުރަން ބަޔާނެއް ހޯދަން ނުވަތަ މިކަމާމެދު ދެކެވަޑައިގަންނަވާ ގޮތެއް ހޯއްދެވުމަށް މަސައްކަތްތަކެއް އެބަކުރަން. އަދިއެއް ކާމިޔާބެއް ނުވޭ އަޅުގަނޑުމެންނަކަށް. މި މައްސަލައިގެ ވިކްޓިމެއް ރައީސް ނަޝީދަކީ. އެހެންވީމަ އަޅުގަނޑުމެން ރެސްޕެކްޓް ކުރަން ޖެހޭ އެބޭފުޅާގެ ޝުއޫރުތަކަށްވެސް. އެހެންވީމަ އެވަރަށް ބަލައިގެން އަޅުގަނޑުމެންވެސް އެކަމާއި އުޅޭނީ.
ޕީޖީ ޝަމީމް ވިދާޅުވިއެވެ.
ރައީސް މުހައްމަދު ނަޝީދުގެ ފުރާނަފުޅަށް އަމާޒުކޮށް ދިން ޓެރެރިސްޓު ހަމަލާއާއި ގުޅިގެން ފުލުހުންނަށް ބުނެލަން އޮތް ބަަހަކީވެސް، އަދި ފުލުހުންނަށް ދޭން އޮތް ބަޔާނަކީވެސް ޖާނާއި، ހިތާމޭ ކަމުގައި ރައީސް ނަޝީދު ވަނީ ވިދާޅުވެފައެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒް ވިދާޅުވީ އެ މައްސަލައިގައި ނަޝީދުގެ ބަޔާނެއް މިހާތަނަށް ނަގާފައިނުވާ ކަމަށެވެ. އަދި ބަޔާނެއް ދެއްވުމަށް ދަތިފުޅު ނަމަ ލިޔުމަކުން ނަމަވެސް ބަހެއް ހޯދުމަށް ނަޝީދުގެ އަރިހުން އެދިފައިވާނެ ކަމަށް ވެސް ރިޔާޒް ވިދާޅުވި އެވެ. މުހައްމަދު ރިޔާޒު ވިދާޅުވީ ނަޝީދަށް ހަމަލާދިނީ ފާރަލައިގެން ކަމަށާއި އެމަނިކުފާނުގެ މޫވްމަންޓު ލީކުވެފައިނުވާކަމަށް ޔަގީން ކަމަށެވެ.
އެ ހަމަލާ ދިނުމަށް ބޭނުންވާ ސައިކަލު ފަދަ ތަކެތި ގަތުމުގެ އިތުރުން ހަމަލާ ދިނީތީވެ އިނާމެއްގެ ގޮތުން ފައިސާ ދީފައިވާކަން މިހާތަނަށް ބެލެވެން ނެތް ކަމަށް ވެސް ރިޔާޒު ވަނީ ވިދާޅުވެފައެވެ. ރައީސް ނަޝީދުގެ ބަޔާނާއި ގުޅިގެން އެމަނިކުފާނު ވަނީ ސީޕީ ހަމީދު ޓެގު ކުރައްވައި ޅެންބައިތެއް ފޮނުއްވާފައެވެ. އަދި އެމަނިކުފާނު ދެއްވަން އޮތް ބަޔާނަކީވެސް އަދި ބުނެލަން އޮތް ބަހަކީވެސް އެމަނިކުފާނުގެ ޖާނާއި، ހިތާމޭ ކަމުގައި ނަޝީދު ވަނީ ވިދާޅުވެ، ސީޕީ ހަމީދަށް ޅެންބައިތެއް ހިއްސާ ކުރައްވާފައެވެ.
އަޅުގަނޑުގެ ބަހަކަށްވެސް ބަޔާނަކަށްވެސް ދައްކަން އޮތީ އަޅުގަނޑުގެ ޖާނާއި ހިތާމޭ. ޝާއިރު ވިދާޅުވި ފަދައިން، ހިތާއި، މޭ ހިބައިން ލިޔެ ދިނީމާވެސް ނުވީނޫންތޯ؟
– ނަޝީދު ސީޕީ ހަމީދު ޓެގްކޮށް ކުރެއްވި ޓްވީޓުގައި ވެއެވެ.
ރައީސް ނަޝީދުގެ މާނަފުން މިޅެންބައިތާއެކު، ސާފުވެގެން ގޮސްފައިވަނީ އެމަނިކުފާނަށް ލިބިފައިވާ ޒަހަމްތަކުން އެކަނިވެސް ފުލުހުންނަށް މިކަން ސާފުވާނެކަމަށެވެ. އަދި ހަމަލާއަށްފަހު އެމަނިކުފާނު ބެއްލެވި ޑޮކްޓަރުންވެސް ވަނީ އަނިޔާގެ ތަފްސީލް ވަރަށް ބޮޑަށް ދެއްވާފައެވެ. ރައީސް ނަޝީދަށް ހަމަލާދިނުމަށް ބޭނުންކުރި ބޮން ހަދާފައިވަނީ އެގާއި ގިނަ އަދަދެއްގެ ރޭޒާފުކާއި އެހެނިހެން ގެއްލުންދޭ ތަކެތި ހިމަނައިގެންކަމުން މި ބޮން ގޮއްވާލުމާއި އެކު މިތަކެތިވަނީ ރައީސް ނަޝީދުގެ ހަށިކޮޅުގެ ތެރެއަށް ވަދެފައެވެ. މިތަކެތި ނެގުމަށް ޑޮކްޓަރުންގެ ޓީމުންވަނީ 16 ގަޑިރުވަންދެން ސީރިއަސް އޮޕަރޭޝަންތަކެއް ކޮށްފައެވެ.
ޑޮކްޓަރުންގެ ޓީމުން ވިދާޅުވީ، ގޮއްވާލި ބޮމުން ބުރައިގެންދިޔަ ތޫނު ދަގަނޑު އެތިކޮޅުތަކުގެ ތެރެއިން އެތިކޮޅެއް، އެމަނިކުފާނުގެ ސީދާ ހިތަށް ނުވަދެ ހުރީ އެންމެ ސެންޓިމީޓަރެއްގެ ދުރުމިންކަމަށެވެ. މި އެތިކޮޅު ރައީސް ނަޝީދުގެ ހިތަށް ނުވަދެ ސަލާމަތްވީ އެމަނިކުފާނުގެ މޭކަށިގަނޑުގައި ޖެހި ކަށިގަނޑު ފުނޑުފުނޑުވުމުގެ ސަބަބުން އެ އެތިކޮޅު އެތެރެއަށް ދިޔުން މަތަވެގެންކަމަށްވެސް ޑޮކްޓަރުން ވަނީ ވިދާޅުވެފައެވެ. އެމަނިކުފާނަށް އަމާޒުވި ބޮމުގެ ހަމާލާއަށްފަހު ފުރަތަމަ ފަހަރަށް ރައީސް ނަޝީދު ކުރެއްވި ޓްވީޓުގައިވަނީ ޞިއްހީ ޚިދުމަތްތެރިންނަށް ޝުކުރު އަދާކުރައްވައިފިއެވެ.
މޭއިމަހުގެ 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންވެސް ވަނީ އެކަން ހާމަކުރައްވާފައެވެ.
