"މިނިވަންކަމުގެ ދިފާއުގައި ދިވެހީން"ގެ ނަމުގައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ކެމްޕެއިނެއް ފަށައިފިއެވެ.
މި ކެމްޕެއިން ފެށުމަށް ޕީޕީއެމްގެ އޮފީހުގައި މިރޭ ކުރިއަށްގެންދިޔަ ޖަލްސާގައި އެކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ދިވެހިންގެ މިނިވަންކަން ދިވެހިންގެ އަތުން ބީވެގެން ދާތަން މިހާރު ފެންނަ ކަމަށާއި މިކަމާ ދެކޮޅަށް ކޮންމެ ދިވެހި ރައްޔިތެއްވެސް ބަސްބުނަން ޖެހޭކަމަށެވެ. އަދި މިފަދަ ކެމްޕެއިނެއް އިދިކޮޅު ކޯލިޝަނުން ފަށާފައި ވަނީ އިދިކޮޅު ލީޑަރު ރައީސް ޔާމީންގެ އިސްނެންގެވުމުގެ މަތިން ކަމަށްވެސް އަބްދުއްރަހީމް ވިދާޅުވި އެވެ.
އަބްދުއްރަހީމް ވަނީ ސަރުކާރު ކޯލިޝަންގައި ހިމެނޭ ލީޑަރުން ކަމަށްވާ ޖުމްހޫރީ ޕާޓީގެ ލީޑަރު ގާސިމް އިބްރާހީމާއި، އެމްއާރްއެމްގެ ރައީސް، ރައީސް މައުމޫނާއި، އަދާލަތު ޕާޓީގެ ރައީސް އިމްރާން އަބްދުﷲ އަށްވެސް މި ގައުމީ ހަރަކާތުގައި ބައިވެރިވުމަށް ދައުވަތު އަރުވާފަ އެވެ. މީގެ އިތުރުން ރާއްޖޭގެ މިނިވަންކަމާގުޅޭގޮތުން ވަކާލާތުކުރައްވާ ކުރީގެ ހޯމް މިނިސްޓަރ އުމަރު ނަސީރާއި، އެމްއެންޕީގެ ނަމުގައި އައު ސިޔާސީ ޕާޓީއެއް އުފެއްދެވުމަށް މަސައްކަތްކުރައްވާ، މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމަށްވެސް މި ކެމްޕެއިންގައި ބައިވެރިވުމަށް އަބްދުއްރަހީމް ވަނީ ދައުވަތު އަރުވާފައެވެ.
އަބްދުއްރަހީމް ވިދާޅުވީ ރާއްޖޭގައި ވެރިކަން ކުރަން ބޭނުންފުޅުވާ އެންމެހާ ބޭފުޅުންވެސް މި ހަރަކާތުގައި ބައިވެރިވެ ރާއްޖޭގެ މިނިވަންކަން ދިފާއުކުރުމަށް މަސައްކަތްކުރަން ޖެހޭ ކަމަށެވެ.
"ސިޔާސީ މަސައްކަތްކޮށްގެން ވެރިކަމަށް އާދެވޭނީ އަޅުގަނޑުމެންގެ ގައުމު އަޅުގަނޑުމެންގެ އަތުގައި އޮވެގެން. އަޅުގަނޑުމެންގެ ގައުމު އަޅުގަނޑުމެންގެ އަތުގައި އޮންނާނީ މިނިވަންކަން އޮވެގެން"
– އަބްދުއްރަހީމް
އަބްދުއްރަހީމް ވިދާޅުވީ ވެރިކަމަށް ވަޑައިގެންނަވަން ބޭނުންފުޅުވާ ހުރިހާ ބޭފުޅުންވެސް ފުރަތަމަ އެއް ޕްލެޓްފޯމަކަށް އައިސް ގައުމު އަޅުވެތިކަމުން ސަލާމަތްކޮށް ކާބަފައިން ހޯދައިދިން މިނިވަންކަން އަންނަން އޮތް ޖީލުތަކަށް ފޯރުކޮށްދޭން ޖެހޭ ކަމަށެވެ. އަދި ވެރިކަން ކުރެވޭނީ އޭރުން ކަމަށް އަބްސުއްރަހީމް ވިދާޅުވި އެވެ.
ދިވެހި ހުރިހާ ރައްޔިތުންވެސް މި ކެމްޕެއިނުގައި ބައިވެރިވުމަށް ޕީޕީއެމުން އެދެއެވެ. މިހަރަކާތް ކުރިއަށްގެންދާނެ ގޮތާއި ހަރަކާތުގެ ލޯގޯއާއި ހަރަކާތުގެ ތަފްސީލްތަށް ކުރިއަށްއޮތް ދުވަސްތަކުގައި ހާމަކުރަމުން ގެންދާނެ ކަމަށް ޕީޕީއެމުން ބުނެއެވެ.
