ފަހަކަށް އައިސް، ބާޒާރުމަތީގެ ވިޔަފާރިތަކަށާއި އަދި ގެސްޓުހައުސް ވިޔަފާރިތަކަށް އާދަޔާ ޚިލާފަށް ގިނަ އަދަދަކަށް ބިދޭސީން ކަންބޮޑުވާ މިންވަރަށް ވަންނަމުން ދާކަމަށާއި، މިއީ ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ކުރިމަތިވެގެންދާނެ ވަރަށް ބޮޑު ގޮންޖެހުމެއް ކަމުގައި، ޓްރޭޑް ޔޫނިއަންގެ ނާއިބުރައީ ސައުﷲ އަހުމަދު ވިދާޅުވެއްޖެއެވެ.
ވީޓީވީގެ ފަސްމަންޒަރު ޕްރޮގްރާމްގައި ވާހަަކަ ދައްކަވަމުން ސައުދު ވިދާޅުވީ، މިއީ ހަގީގަތުގައި ރާއްޖޭގެ އިގުތިސާދަށްވެސް، އަދި ރާއްޖޭގެ ކުދި އަދި މެދުފަންތީގެ ވިޔަފާރިތަކަށްވެސް ލިބިގެންދާނެ ވަރަށް ބޮޑު ގެއްލުމަކަށް ވެގެންދާނެ ކަމަށާއި، މިއީ ރެގިއުލޭޓަރީ އޮތޯރިޓީތަކުން ޚާއްސަ ސަމާލުކަމެއް ދީގެން ހުއްޓުވަން ޖެހޭ ކަމެއްކަށެވެ.
ސައުދު ވިދާޅުވި ގޮތުގައި، ކަންމަތީ ފިހާރަތަކަށް ބެލިކަމުގައި ވިނަމަވެސް، ބަންގްލަދޭޝް އިންޑިއާ ނުވަތަ އެފަދަ ކޮންމެވެސް ގައުމެއްގެ ބަޔަކު ވިޔަފާރި ކުރާތަން ފެންނަކަމަށާއި، ބާޒާރުމަތީގައި ފިޔާ އަލުވި، ބިސް ތަރުކާރީ ގެނެސްގެން އެ ވިޔަފާރިވެސް ކުރަމުންދާ ހުރިހާ ފަރާތްތަކަކީ ދިވެހިން ނޫން ކަމަށާއި، މީގެ ނަތީޖާއެއްގެ ގޮތުން ދައުލަތަށްވެސް ގެއްލުންވެގެން ދާނެކަމުގައެވެ.
ސަބަބެއްކަމުގައި ސައުދު ވިދާޅުވީ، ބީދޭސީންގެ އަތްމައްޗަށް މިވަޔަފާރިތައް ދިއުމުގެ ނަތީޖާއަކަށް ވެގެންދާނީ، ބަރާބަރަށް ޓެކްސްގެ މުއާމަލާތްތައްވެސް ނުކުރުން ކަމަށާއި، މީގެ ނަތީޖާއެއްގެ ގޮތުން، ޓެކްސްގެ ނިޒާމު ރެގިއުލޭޓް ކުރާ ފަރާތްތަކަށްވެސް ވަރަށް ބޮޑެތި ގޮންޖެހުންތަކާ ކުރިމަތިލާން ޖެހޭނެ ކަމަށެވެ.
އެހެންކަމުން މިއީ ހަގީގަތުގައިވެސް ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ކުރިމަތިވެގެން ދާނެ ވަރަށްބޮޑު ގޮންޖެހުމެއް ކަމަށާއި، މި ގޮންޖެހުން މިހާރަކަށް އައިސް ގެސްޓު ހައުސްތަކަށްވެސް ވަރަށް ބޮޑަށް ކުރިމަތިވަމުންދާ ކަމަށެވެ. މިގޮތުން ސައުދު ވިދާޅުވި ގޮތުގައި، ހުޅުމާލެ އަދި މާލޭގެ ގެސްޓު ހައުސްތައްވެސް ބިދޭސީން މިހާރު ހިންގަމުންދާ ކަމަށާއި، ޚާއްސަކޮށް ލޯކަލް ޓުއަރިޒަމް ބިދޭސީންގެ އަތްމައްޗަށް މަޑުމަޑުން ދާތަން ފެންނަމުން ދާކަމަށާއި، މީގެ ސަބަބުން އާންމު ފަރުދުންގެ އަމްދަނީތަކަށް ބޮޑެތި ގެއްލުންތަކެއް ލިބި، ދައުލަތަށް ލިބެންޖެހޭ ޓްކްސްވެސް މިތަންތަނުން ލިބުމުގައި ގޮންޖެހުންތަކާ މުސްތަގުބަލުގައި ކުރިމަތިލާން ޖެހޭނެ ކަމުގައެވެ.
ސައުދު ވިދާޅުވި ގޮތުގައި މިމައްސަލައަކީ ސަރުކާރުން އެޑްރެސް ކުރަން ޖެހޭ މައްސަލައެއް ކަމަށާއި، ފަތުރުވެރިކަމުގައި ސިނާއަތު ރެގިއުލޭޓް ކުރާ ފަރާތްތަކުން މިއަށްވުރެ ބޮޑަށް ޒިންމާދާރު ކަމާއެކީގަ، ހެދިފައިވާ ގަވާއިދާ ގާނޫނުގެ ތެރެއިން މިކަންކަން ބެލެހެއްޓޭނަމަ، މިހިސާބަށް މިމައްސަލަ ނައީސްކަމުގައިވެސް ސައުދު ވިދާޅުވިއެވެ.
ސައުދު ވިދާޅުވި ގޮތުގައި ޑޮކްޓަރުންގެ ގޮތުގައި ރާއްޖޭގައި މަސައްކަތް ކުރާ ބިދޭސީންވެސ،ް ޓީޗަރުންގެ ގޮތުގައި ރާއްޖޭގައި މަސައްކަތް ކުރަމުންދާ ބިދޭސީންވެސް ކޮންމެވެސް ދިވެއްސަކާ ގުޅިގެން މިވިވިޔަފާރިތައް ކުރަމުންދާ ކަމަށާއި، މިހާލަތުގައި މިވިޔަފާރިތަކުން ލިބޭ އާމްދަނީ ވަންނަނީ ދިވެހި މީހާގެ އެކައުންޓަށްކަމެއް ނުވަތަ ބޭރުމީހުންގެ އެކައުންޓަށްކަމެއްވެސް ޔަގީންކުރެވޭނެ ގޮތެއް ނެތްކަމުގައެވެ.
ސައުދުވިދާޅުވި ގޮތުގައި، ރާއްޖޭގެ ކުދި އަދި މެދުފަންތީގެ ވިޔަފާރިތަކަށް މިއުސޫލުން ބޭރު މީހުންނަށް ވަނުމުގެ ފުރުސަތު ލިބިގެންދަނީ، ހެދިފަ ހުރިހާ ގާނޫނުތަކާއި ގަވާއިދުތައް ތަންފީޒު ނުކުރެވިގެން ކަމަށާއި، މިއީ ސަރުކާރުން ޚާއްސަ ސަމާލުކަމެއް ދީގެން ހައްލު ހޯދަން ޖެހިފައިވާ މައްސަލައެއް ކަމަށެވެ.
ސައުދު އިތުތރަށް ވިދާޅުވި ގޮތުގައި، މިމައްސަލަތައް ހައްލުކުރުމަށް ޓްރޭޑް ޔޫނިއަންއިން ސަރުކާރުގެ ކަމާގުޅުންހުރި ފަރާތްތަކާ ގުޅިގެން އަބަދުވެސް މަސައްކަތް ކުރައްވަމުން ގެންދަވާ ކަމަށާއި، މިހާރުގެ އިކޮނިމިކް މިނިސްޓަރ ފައްޔާޒު އިސްމާއިލްގެ ފަރާތުން މިމައްސަލަަތައް ހައްލުކުރުމުގައި އެކަށީގެންވާ އެއްބާރުލުން ލިބެމުންދާ ކަމުގައެވެ.
