އިސްރާއީލުން ހިފާފައިވާ ހުޅަގު އައްސޭރީގައާއި އަދި އިސްރާއީލުގައި ހިންގާފައިވާ އިންސާނިއްޔަތާ ޚިލާފު އަމަލްތައް ތަހުގީގު ކުރާ އެންމެ އިސްފަރާތަކަށް، ޔޫއެންގެ އިންސާނީ ޙައްގުތަކާބެހޭ ކުރީގެ އެންމެ އިސްވެރިޔާ ނަވީ ޕިއްލޭ ހަމަޖައްސައިފިއެވެ.

ޔޫއެންގެ ހިއުމަން ރައިޓްސް ކައުންސިލްގެ ރައީސް ބުރާސްފަތި ދުވަހު ވިދާޅުވެފައިވާ ގޮތުގައި، އެތައް އަހަރެއް ވަންދެން ކުރިޔަށް ގޮސްފައިވާ މެދު އިރުމަތީގެ ހަމަނުޖެހުންތަކުގައި، ހިފާފައިވާ ހުޅަގު އައްސޭރިއާއި އަދި އިސްރާއީލުގައި ހިންގާފައިވާ އިންސާނިއްޔަތާ ޚިލާފް އަމަލުތައް ތަހުގީގު ކުރުމަށް އެކަށައެޅި 3 މީހުންގެ ތަހުގީގީ ޓީމުގެ އެންމެ އިސްފަރާތެއްގެ ގޮތުގައި ހުންނަވާނީ ނަވީ ޕިއްލޭއެވެ.

މި ތަހުގީގަކީ، މި އަހަރުގެ މޭމަހު އިސްރާއީލާ ފަލަސްތީނާ ދެމެދު ހިނގި ހަމަނުޖެހުންތަކަށްފަހު، މި ހަމަނުޖެހުންތަކުގައި ދެފަރާތުންވެސް ހިންގާފައިވާ އިންސާނިއްޔަތާ ޚިލާފު ޖަރީމާތައް ތަހުގީގު ކުރުމަށް އެދި ޔޫއެންގެ ހިއުމަން ރައިޓްސް ކައުންސިލްއިން ނިންމާފައިވާ ނިންމުން ތަންފީޒު ކުރުމުގެ ގޮތުން ކުރިޔަށް ގެންދިއުމަށް ހަމަޖެހިފައިވާ ތަހުގީގެކެވެ.

ކޮމިޝަން އޮފް އިންކުއަރީ (COI)އަކީ ޔޫއެންގެ ހިއުމަން ރައިޓްސް ކައުންސިލްއިން، މައްސަލައެއް ތަހުގީގު ކުރުމަށް އަންގާ އެންމެ މަތީ އެންގުމެވެ.

ޖެނީވާގައި ގާއިމްވެފައި އޮންނަ މި ކައުންސިލްގެ ޚާއްސަ ބައްދަލުވުން ބޭއްވިފައިވަނީ މިއަހަރުގެ މޭމަހުގެ 27ވަނަ ދުވަހުއެވެ.

މި ކައުންސިލްއިން ނިންމާފައިވަނީ، ބައިނަލްއަގުވާމީ ގާނޫނުތަކާ ޚިލާފަށް، އިސްރާއީލުގައާއި، ހިފާފައިވާ ބިންތަކުގައި، އިރުމަތީ ޖެރޫސެލަމްވެސް ހިމެނޭގޮތުން، މި ތަންތަނުގައި ހިންގަމުންދާ އިންސާނިއްތާ ޚިލާފު ހުރިހާ އަމަލްތަކެއް ތަހުގީގު ކުރުމަށް މިނިވަން، އިންޓަރނޭޝނަލް ކޮމިޝަން އޮފް އިންކުއަރީއެއް އުފެއްދުމަށެވެ.

ޖެނީވާ ފޯރަމްގައި ފާއިތުވެދިޔަ މަހު ފާސްކުރެވުނު މި ރިޒޮލިއުޝަންއާއި އިސްރާއީލުންވަނީ ދެކޮޅު ހަދާފައެވެ. އަދި ބުނެފައިވަނީ، މި ތަހުގީގީ ޓީމަށް އެގައުމުން އެއްވެސް ކަހަލަ އެއްބާރުލުމެއް ނުދޭނެ ކަމަށެވެ.

ނަވީ ޕިއްލޭއަކީ ދެކުނު އެފްރިކާގެ ކުރީގެ ފަނޑިޔާރެކެވެ. އޭނާވަނީ، 2008 އިން 2014އަށް ޔޫއެންގެ ހައިކޮމިޝަނަރ ފޯރ ހިއުމަންރައިޓްސް މަގާމް އަދާ ކުރައްވާފައެވެ.

އޭނާއާއެކު މި ޓީމުގައި ހަރަކާތްތެރިވާނީ އިންޑިއާގެ މިލޫން ކޯތަރިއާއި، ގެދޮރިވެރިކަމުގެ ހައްގުތަކާ ގުޅޭގޮތުން ޔޫއެންއިން އެންމެ ފުރަތަމަ ކަޑައެޅި މަންދޫބު އަދި އޮސްޓްރޭލިއާގެ ބައިނަލްއަގުވާމީ އިންސާނީ ހައްގުތަކާބެހޭ ގާނޫނީ ތަޖުރިބާކާރެއް ކަމުގައިވާ ކްރިސް ސިޑޯޓީ އެވެ.