ރޭ ހުޅުމާލެއިން ބާރުގަދަ އަޑެއް އިވުނީ ވެލްޑިން ކުރުމުގެ ތެރޭގައި އެއްޗެއް ގޮވުވުމުންކަމަށް ފުލުހުން ބުނެފިއެވެ.
ހުޅުމާލޭގައި ބާރު އަޑަކާއެކު އެއްޗެއް ގޮވުމުގެ ސަބަބުން ނުރައްކަލެއް އޮތްތޯ ބެލުމުގެ މަސަކަތް ފުލުހުން ރޭ ފަށާފައިވެއެވެ. ފުލުހުން މިއަދު ބުނީ، ހުޅުމާލެ ބޯގަންވިލާ މަގުގައި ރޭ 00:35 ހާއިރު ބާރުގަދަ އަޑެއް ގޮވުމާއިގުޅިގެން ފުލުހުން އެ ސަރަހައްދުގައި ހަރަކާތްތެރިވެ އެސަރަހައްދުގައިތިބި މީހުންނާއި ސުވާލުކޮށް ބަލަންޖެހޭ ކަންކަން ބަލާފައިވާކަމަށެވެ.
މިހާތަނަށް ބެލިބެލުމުން ބާރުގަދަ އަޑެއް ގޮވާފައިވަނީ ހުޅުމާލެ ލޮޓް ނަންބަރު 1138ގެ ޓެރެސްމަތީ ވެލްޑިންކުރުމުގައި ހަރަކާތްތެރިވުމުގެ ތެރޭގައި ހިނގި އިންސިޑެންޓަކުންކަން އެނގިފައިވާކަމަށެވެ. މިހާދިސާގައި މީހަކަށް އަނިޔާވެފައިނުވާކަމަށްވެސް ފުލުހުން ބުންޏެވެ.
ރޭ ހުޅުމާލޭގައި އެއްޗެއް ގޮވިއަޑު ބޮޑު ސަރަހައްދަކަށް އިވުނެވެ. އަދި ރޭ އެ ހާދިސާހިނގި ސަރަހައްދު ފުލުހުން ވަނީ މީހުންނަށް ނުވަދެވޭގޮތަށް އެ އެއްކޮށް ބަންދުކޮށްފައެވެ.
