ކުރީގެ ޓޫރިޒަމް މިނިސްޓަރ ޢަލީ ވަހީދުގެ ޝަރީޢަތް އޮންލައިންކޮށް ކުރިއަށްގެންދަން ނިންމި މައްސަލައިގައި ހައިކޯޓަށް ހުށައެޅި އިސްތިއުނާފު މައްސަލަ އެކޯޓުން ބާޠިލުކުރުމާއި ގުޅިގެން ސުޕްރީމް ކޯޓުގައި އިސްތިއުނާފް ކޮށްފިއެވެ.
ޕްރޮސެކއިޓާ ޖެނެރަލް އޮފީހުން ދެންމެ ބުނެފައިވަނީ ޢަލީ ވަހީދު މައްސަލާގައި 08 ޖުލައި 2021 ގައި ދިވެހިރާއްޖޭގެ ހައިކޯޓުން ނިންމެވި ނިންމެވުން ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްފައިވާކަމަށެވެ.
އޮންލައިންކޮށް ޝަރީއަތް ކުރިޔަށް ގެންދިޔުމަކީ ޤާނޫނާއި ހިލާފުކަމެއްކަމަށް ބުނެ ދަޢުލަތުން ހައިކޯޓުގައި މިމައްސަލަ އިސްތިއުނާފުކުރުމުން މައްސަލަ ބެއްލެވި ހައިކޯޓުގެ ފަނޑިޔާރުންވަނީ މިފަދަ މައްސަލަތަކަކީ ހައިކޯޓުން 7 ދުވަސްތެރޭ ނިންމަންޖެހޭ މައްސަލައެއްކަން އެނގޭއިރު، އަދި ޢާލީ ވަހީދު ހުރީ ރާއްޖެއިން ބޭރުގައިކަން އެނގޭއިރު މައްސަލަ ހައިކޯޓަށް ހުށައެޅީ ކޮން މަޤްސަދެއްގައިތޯ ސުވާލުކުރައްވާފައެވެ.
ރައްދުގައި ދަޢުލަތުގެ ވަކީލުން ވިދާޅުވީ ކޯޓުތަކުގެ އިޚްތިސާސް އޮންނަ ސަރަހައްދަށް މައްސަލައިގައި ހިމެނޭ މީހުން ގެނައުމުގެ ބާރު ލިބިގެންވަނީ ކޯޓުތަކަށްކަމަށެވެ. އެހެންކަމުން އަލީ ވަހީދު ރާއްޖެ ގެނެސްގެން މައްސަލައިގެ އަޑުއެހުންތައް ހައިކޯޓުގައިވެސް ކުރިއަށް ގެންދިއުމަށް ދަޢުލަތުން އެދޭކަމަށެވެ.
ޢަލީ ވަޙީދު، މިނިސްޓަރ އޮފް ޓޫރިޒަމްގެ މަޤާމުގައި ހުންނެވި އިރު އޭނާގެ މައްޗަށް ތުހުމަތު ކުރެވުނު ޖިންސީ ފުރައްސާރަކުރުމާއި، ޖިންސީ ގޯޯނާކުރުމުގެ މައްސަލަތަކުގައި ހަތް ދައުވާއެއް އުފުލާ އެ މައްސަލަތަކުގެ ޝަރީއަތްތައް މީގެ ކުރިން ވަނީ އަލީ ވަހީދު ހާޒިރުކޮށްގެން ކުރިޔަށްގެންގޮސްފައެވެ. ނަމަވެސް ކްރިމިނަލް ކޯޓުން އަލީ ވަހީދުގެ ޕާސްޕޯޓް ދޫކޮށްލުމާއެކު، އޭނާ ވަނީ ރާއްޖެއިން ބޭރަށް ވަޑައިގެންފައެވެ. އެމައްސަލައިގައި އޭނާގެ ޕާސްޕޯޓް އަލުން ހިފަހައްޓައި ދިނުމުގެ އަމުރެއް ނެރެ ދިނުމަށް ފުލުހުން ކްރިމިނަލް ކޯޓަށް ހުށައެޅިނަމަވެސް ކޯޓުން އަމުރު ނެރުމަށް ވަނީ ދެކޮޅު ހަދާފައެވެ.
One Response
މީގެ ކުރިންވެސް މީހުން ރާއްޖެއިން ބޭރަށްދޭ ތިގޮތަށް .އެކަމަކު ތިޔަކަހަލަ ޑުރާމާއެއް ނުކުޅޭ.
* މިހާރު ވާންވީ ގޮތަކީ ޢަލީ ވަހީދު އަށް ތިޔަ ދަޢުވާ ކުރާތީ އޭނާއަށް ނަފުސާނީ ގޮތުންނާއި ޖިސްމާނީ އަދި މާލީގޮތުން އޭނާއަށް ލިބުނު ގެއްލުމުގެ ބަދަލުގެ ގޮތުގަ ވިހި މިލިޔަން ރުފިޔާވަރު ދިނުން.