ހަރުކަށި ފިކުރާއި ދެކޮޅަށް ހިންގި އޮޕަރޭޝަންގައި ހައްޔަރުކުރި ތިން މީހަކު ކްރިމިނަލް ކޯޓުން ދޫކޮށްލުމުން، އޭގެތެރެއިން 2 މީހަކު އަނެއްކާވެސް ހައްޔަރުކޮށްފިއެވެ.
އެދެމީހުން ހައްޔަރުކޮށްފައިވަނީ ކޯޓް ޢަމުރެއްގެ ދަށުން ރޭކަމަށް ފުލުހުން ބުންޏެވެ. އެމީހުން ހައްޔަރުކުރީ އައު ތުހުމަތުތަކަކާއެކުއެވެ. ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ދިން ހަމަލާއާއި ގުޅިގެން ހިންގި ޚާއްޞަ އޮޕަރޭޝަންގައި ހައްޔަރުކުރި ތިން މީހުންނަކީ ރައީސް ނަޝީދަށް ދިންހަމަލާއާއި ސީދާ ގުޅުންހުރި ބައެއް ނޫނެވެ.
އެ ތިން މީހުން ދޫކޮށްލުމަށް ކްރިމިނަލް ކޯޓްގެ ކާޟީ ޙަސަންސަޢީދު ޢަމަރުކުރެއްވުމުން ޕީޖީ އޮފީހުން ވަނީ އެ މައްސަލަ އިސްތިއުނާފްކުރުމަށް ނިންމާފައެވެ. ފުލުހުން ރޭ ހައްޔަރުކުރި އެ ތިން މީހުންނާއި ގުޅޭ މަޢުލޫމާތު ފުލުހުން ޢާންމުކޮށްފައެއް ނުވެއެވެ.
ހަރުކަށި ފިކުރާ ދެކޮޅަށް ފުލުހުންނާއި ސިފައިން ގުޅިގެން މާލެއާއި ރާއްޖޭގެ ބައެއް ހިސާބުތަކުގައި ހިންގީ މިދިޔަ މަހުގެ 6 ވަނަ ދުވަހުގެރޭ ރައީސް ނަޝީދަށް ދިން ހަމަލާގެ ފަހުންނެވެ. ރައީސް ނަޝީދު ދިރިއުޅުއްވާ ގ.ކެނެރީގެއިން ނުކުމުވަޑައިގެން ނީލޯފަރު ހިނގުމުން މަޖީދީމަގާވީ ކޮޅަށް ހިންގަވާފައި ވަޑައިގެން ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލުމާ ގުޅިގެން އެމަނިކުފާނަށް ވަނީ ބޮޑެތި އަނިޔާތަކެއް ލިބިފައެވެ.
ނަޝީދަށް ހަމަލާ ދިން މައްސަލާގައި މިހާތަނަށް އަށް މީހަކު ހައްޔަރުކޮށް އޭގެ ތެރެއިން ފަސް މީހެއްގެ ވަނަވަރު ފުލުހުން ވަނީ ހާމަކޮށްފައެވެ. ވަނަވަރު ހާމަކުރި މީހުނަކީ މުޖާޒް އަހުމަދު، ތަހުމީން އަހުމަދު، އަދުހަމް އަހުމަދު ރަޝީދު، އަހުމަދު ފާތިހު އަދި އަލީ ހައިޝަމެވެ.
