ހައްޔަރުގައި ހުއްޓާ މަރުވެފައިވާ، ފަލަސްތީނު އޮތޯރިޓީއަށް ފާޑު ކިޔަމުންދިޔަ އެކްޓިވިސްޓް ނިޒާރު ބެނެޓްގެ މަރަކީ ގުދުރަތީ މަރެއް ނޫންކަމަށާއި އޭނާ މަރުވުމުގެ ކުރިން އޭނާއަށް ވަރަށް ބޮޑަށް އަނިޔާ ކޮށްފައިވާކަމަށް، މަރުގެ މައްސަލަ ބެލުމަށް ފަލަސްތީން އޮތޯރިޓީން އެކުލަވާލާފައިވާ ޚާއްސަ ކޮމިޓީގެ އިސްވެރިޔާ، ފަލަސްތީނު އޮތޯރިޓީގެ ޖަސްޓިސް މިނިސްޓަރ ވިދާޅު ވެއްޖެއެވެ.
މުހައްމަދު އަލް-ޝަލާލްދޭ ފަލަސްތީނުގެ ރަސްމީ ޓީވީއަށް މައުލޫމާތު ދެމުން ވިދާޅުވެފައިވަނީ މިހާތަނަށް ހޯދު ހޯދުންތަކުން އެގެން އޮތީ، ފާއިތުވި ޖޫން މަހުގެ 24ވަނަ ދުވަހު މަރުވި އުމުރުން 43 އަހަރުގެ ބެނެޓަށް އަނިޔާ ކޮށްފައިވާ ކަންކަމުގައެވެ.
ނިޒާރު ބެނެޓް މަރުވެފައިވަނީ، ހުޅަގު އައްސޭރީގެ ހެބްރޯންގައި، ފަލަސްތީނުގެ ސަލާމަތީ ބާރުތަކުން އޭނާ ހައްޔަރު ކުރަން އުޅުމުގެ ތެރޭގައެވެ.
އަލް-ޝަލާލްދޭ ވިދާޅުވި ގޮތުގައި، ފަލަސްތީން އޮތޯރިޓީގެ ޕްރިވެންޓިވް ސެކިއުރިޓީ ސެންޓަރަށް ބަދަލު ކުރަން އުޅެނިކޮށް ބެނެޓް ހޭނެތިފައި ވާކަމަށެވެ.
އަލް-ޝަލާލްދޭ އިތުރަށް ވިދާޅުވި ގޮތުގައި، ސަލާމަތީ ބާރުތަކުން، ބެނެޓްގެ ހެޔަށް ގޮތްވުމާއެކު، އޭނާ ހެބްރޯންގައި ހުންނަ އާލިއާ ސަރުކާރު ކޮސްޕިޓަލަށް އެމީހުންގެ އުޅަދެއްގައި ވަގުތުން ގެންގޮސްފައިވާ ކަމަށެވެ. އަދި ހޮސްޕިޓަލަށް ދެވުނުއިރު އޭނާ މަރުވެފައިވާ ކަމަށް އަލް-ޝަލާލްދޭ ވިދާޅުވިއެވެ. އޭނާ އިތުރަށް ވިދާޅުވި ގޮތުގައި ހައްޔަރުކުރި އިރު އޭނާ ދިރިހުރިކަން ހެކިބަހުން ސާބިތުވާން ހުރި ކަމަށެވެ.
ޖަސްޓިސް މިނިސްޓަރު ވިދާޅުވި ގޮތުގައި، ފަލަސްތީނުގެ ސަރުކާރަށް އެންމެ ބޮޑަށް ފާޑުކިޔަމުން އައި ބެނެޓް މަރުވެފައިވަނީ، ހިތް ހުއްޓިގެންކަމަށް ޑޮކްޓަރުން ނިންމާފައިވާ ކަމަށެވެ.
އަލް-ޝަލާލްދޭ ވިދާޅުވި ގޮތުގައި ބެނެޓްގެ މަރުގެ ހާދިސާއަކީ މުޅިން ތަފާތުކޮށް ހިގާފައިވާ ހާދިސާއެއް ކަމަށާއި، އެއީ އެއްގޮތަކަށްވެސް ފަލަސްތީން އޮތޯރިޓީއަށް ފާޑުކިޔާ މީހުންނާ ދޭތެރޭ އެ އޮތޯރިޓީން އަމުލުކުރާ އުސޫލެއް ނޫން ކަމަށެވެ.
އޭނާ ވިދާޅުވި ގޮތުގައި، ބެނެޓްގެ މަރުގެ ހާދިސާ ހިގާފައިވާ ގޮތް ތަހުގީގުކުރަން އުފެއްދި ކޮމިޓީން ވަރަށް އިންސާފުވެރިކަމާއެކު، މިމައްސަލަ ތަހުގީގު ކުރުމަށްފަހު، ތަހުގީގު ރިޕޯޓު މިހާރު، ފަލަސްތީން އޮތޯރިޓީގެ ބޮޑުވަޒީރު، މުހައްމަދު ޝަތާޔޭގެ އަތްޕުޅަށް އަރުވާފައި ވާކަމަށެވެ. ބޮޑުވަޒީރު މި ރިޕޯޓު ދެން އަރުވާނީ، ފަލަސްތީން އޮތޯރިޓީގެ މިލިޓަރީ ޖުޑީޝަރީގެ އެންމެ އިސްވެރިޔާގެ އަތްޕުޅަށެވެ. އަދި އެއަށްފަހު، ކުށްވެރިވާ ފަރާތްތަކާމެދު ފިޔަވަޅު އެޅުމަށް ވަނީ ހަމަޖެހިފައެވެ.
ނިޒާރު ބެނެޓްގެ އާއިލާއިން ހާމަ ކޮށްފައިވާ ގޮތުގައި، ކުރީރޭ، ހެބްރޮންގައި ހުންނަ އޭނާގެ ގެއަށް ގަދަކަމުން ވަދެ، އޭނާ ހައްޔަރު ކުރި ކުރުމުގައި، އޭނާއަށް ފަލަސްތީނުގެ ސަލާމަތީ ބާރުތަކުން ވަނީ ވަރަށް ބޮޑަށް އަނިޔާ ކޮށްފައެވެ.
އިސްރާއީލުން ހިފާފައިވާ ހުޅަގު އައްސޭރީގައި، ހެބްރޮން ސިޓީއަށް ފަލަސްތީން އޮތޯރިޓީން އައްޔަން ކޮށްފައި ހުންނަވާ ގަވަރުނަރު ވިދާޅުވި ގޮތުގައި ބެނެޓް ނިޔާވެފައިވަނީ، ހައްޔަރު ކުރުމަށްފަހު ކުއްލިއަކަށް ސިއްޙީ ހާލަތު ގޯސްވާން ފެށުމަށްފަހު އެވެ. ބެނެޓްގެ މަރާ ގުޅޭ އިތުރު ތަފްސީލެއް އޭނާ ދެއްވާފައެއް ނުވެއެވެ.
އުމުރުން 43 އަހަރުގެ ބެނެޓްއަކީ، ފަލަސްތީނު އޮތޯރިޓީގެ ތެރޭގައި އޮތް ކޮރަޕްޝަނަށް ފާޑު ކިއުމުގެ އިތުރުން، ދާދިފަހުން ފަލަސްތީނުގައި ބޭއްވުމަށް ނިންމި އާންމު އިންތިޚާބު ލަސްކުރި ކުރުމަށްވެސް ވަރަށް ބޮޑަށް ފާޑު ކިޔަމުން އައި، އެކްޓިވިސްޓެކެވެ. އަދި މީގެ އިތުރުން އޭނާ ގެންދިޔައީ، ދާދިފަހުން ފަލަސްތީން އޮތޯރިޓީން އިސްރާއީލާއެކު ވި ކޯވިޑް19 ވެކްސިން އެކްސްޗޭން ޕްރޮގްރާމަށްވެސް ވަރަށް ބޮޑަށް ފާޑު ކިޔަމުންނެވެ.
އޭނާ ވަނީ، ފަލަސްތީން އޮތޯރިޓީގެ ރައީސް މަހުމޫދު އައްބާސް ދާދިފަހުން، ބޭއްވުން ލަސްކުރި، އާންމު އިންތިޚާބުގައި ފަލަސްތީނުގެ ގާނޫނު ހަދާ މަޖިލީހުގައި ވާދަކުރާނެކަންވެސް އިއުލާން ކުރައްވާފައެވެ.
