ގިނަ ޢަދަދެއްގެ ބަޔަކު ހިފާ ހައްޔަރު ކުރަންޖެހޭކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައިސް މުޙައްމަދު ނަޝީދު ވިދާޅުވުމުން، އިދިކޮޅު ޕްރޮގްރެސިވް ކޮންގްރެސް ކޯލިޝަނުން ކަންބޮޑުވުން ފާޅުކޮށްފި އެވެ.
ޕްރޮގްރެސިވް ކޮންގްރެސް ކޯލިޝަނުން ނެރުނު ބަޔާނެއްގައި ބުނެފައި ވަނީ ސިޔާސީ މަންފާއެއް ޙާސިލްކުރުމަށްޓަކައި އެއްވެސް އަސާސެއްނެތި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާއި ޚިލާފަށް މީހުން ހިފާ ހައްޔަރު ކުރުމަކީ އެއްވެސް ޙާލެއްގައި ކޮށްގެންވާނެ ކަމެއް ނޫންކަމަށެވެ.
އެއްވެސް މީހަކު ހިފާހައްޔަރުކޮށްފައި ބެހެއްޓޭނެ ގޮތްތައް ޤާނޫނުއަސާސީގެ 49 ވަނަ މާއްދާގައްޔާއި ޖިނާޢީ އިޖުރާއަތުގެ ޤާނޫނުގެ 58 ވަނަ މާއްދާއާއި 59ވަނަ މާއްދާއާއި 60 ވަނަ މާއްދާގައި ވަރަށް ސާފުކޮށް ބަޔާންކުރެވިފައި ވާކަމަށްވެސް އިދިކޮޅު ކޯލިޝަނުން ބުނެއެވެ.
"އެހެންކަމުން ގިނަ ޢަދަދެއްގެ ބަޔަކު ހިފާ ހައްޔަރު ކުރަންޖެހޭކަމަށް އެމްޑީޕީގެ ރައީސް އަދި ކުރީގެ ރައިސް މުޙައްމަދު ނަޝީދު ވިދާޅުވެފައިވާތީ އެކަމާ މި ކޯލިޝަނުން ކަންބޮޑުވުން ފާޅުކުރަމެވެ."
– ޕްރޮގްރެސިވް ކޮންގްރެސް ކޯލިޝަން
މިއާއެކު ޓެރަރިޒަމް ހުއްޓުވުމަށްޓަކައި ޤާނޫނީ އިމުގެ ތެރެއިން މަސައްކަތްކުރުމަކީ ކުރަންޖެހޭ ކަމެއްކަމަށްވެސް ކޯލިޝަނުގެ ބަޔާނުގައި ވަނީ ފާހަގަކޮށްފަ އެވެ. އަދި ޓެރަރިޒަމް ހުއްޓުވުމަށްޓަކައި ރައީސް ޢަބްދުﷲ ޔާމީން ޢަބްދުލްޤައްޔޫމްގެ ޒަޢާމަތުގައި ގިނަ މަސައްކަތްތަކެއް ކުރެވިފައިވާކަންވެސް އެ ބަޔާނުގައި ފާހަގަކޮށްފައި ވެއެވެ.
އިދިކޮޅު ކޯލިޝަނުން ބުނީ ޤާނޫނުއަސާސީއާ ޚިލާފަށް އެއްވެސް މީހަކު ހިފާ ހައްޔަރުކުރުމަކީ ކޮށްގެންވާނެ ކަމެއް ނޫންކަމަށެވެ. އެއީ ޤާނޫނުއަސާސީގެ ރޫޙާއި ޑިމޮކްރެސީގެ ހަމަތަކާއި މުޅިން ޚިލާފުކަމެއް ކަމަށްވެސް ކޯލިޝަންގެ ބަޔާނުގަިއ ވަނީ ބުނެފައެވެ.
"އެއްވެސް މީހަކު ހައްޔަރު ކުރަންވާނީ އެމީހެއްގެ މައްޗަށް ކުރެވޭ ތުހުމަތުތަކަށް ބާރުލިބޭ އިތުރު ހެކިތައް ހުރެގެންނެވެ. އަދި މީހަކު ހިފާ ހައްޔަރުކޮށްފައި ބެހެއްޓޭނީ މުޖްތަމަޢުގެ ސަލާމަތަށް ނުރައްކާވާ ޙާލަތެއް އޮވެގެންނެވެ."
– ޕްރޮގްރެސިވް ކޮންގްރެސް ކޯލިޝަން
އެހެންކަމުން ކުށެއްނެތް މައުސޫމް މީހުން ސިޔާސީ މަޤްސަދެއް ޙާސިލްކުރުމަށްޓަކައި ހިފާ ހައްޔަރުކޮށް އަނިޔާވެރިކަން އިސްނުކުރުމަށް އިދިކޮޅު ކޯލިޝަންގެ ފަރާތުން ސަރުކާރަށް ވަނީ ގޮވާލާފައެވެ.
އެމްޑީޕީގެ އަހަރީ ދުވަހާއި ގުޅުވައިގެން އެ ޕާޓީގެ ކްލަބްހައުސް ޖަގަހަ ހުޅުވުމަށް ރޭ ބޭއްވި އޮންލައިން ބައްދަލުވުމުގައި ރައީސް ނަޝީދު ވަނީ، ރާއްޖެއަށް އޮތް ޓެރެރިޒަމްގެ ބިރުވެރިކަމުން ސަލާމަތްކުރުމަށް ގިނަ އަދަދެއްގެ ބަޔަކު ހައްޔަރުކުރަން ޖެހުނު ނަމަވެސް އެކަން ކުރުމަށް ގޮވާލާފައެވެ. އަދި ރާއްޖެ ސަލާމަތްކުރުމަސް ސަރުކާރުން ފަހަތުފަޔަށް ބުރަ ނުވުމަށް ނަޝީދުވަނީ ރައީސުލްޖުމްހޫރިއްޔާ އަށާއި ސަރުކާރަށް ގޮވާލާފައެވެ.
