ފަލަސްތީނު އޮތޯރިޓިއަށް ފާޑުކިޔަމުން އައި، އަދި ކުރިޔަށް އޮތް ފަލަސްތީނުގެ ޕާޕަމެންޓްރީ އިންތިޚާބުގައި ވާދަކުރުމަށް ތައްޔާރުވަމުން އައި ނިޒާރު ބެނެޓް، ފަލަސްތީން އޮތޯރިޓީން ހައްޔަރު ކޮށްފައި ވަނިކޮށް އޭނާ މަރުވުމާއި ގުޅިގެން ފަލަސްތީން އޮތޯރިޓީއާއި ދެކޮޅަށް ފަލަސްތީނުގެ ރާމައްލާ ސިޓީގައި އެތައް ސަތޭކަ ބަޔަކު މުޒާހިރާ ކޮށްފިއެވެ.

އަދި މުޒާހިރާތަކުގައި މުޒާހިރާ ކުރާ ފަރާތްތަކާ ފަލަސްތީން އޮތޯރިޓީގެ ސަލާމަތީ ބާރުތަކާ ދެމެދުވަނީ ހަމަނުޖެހުންތައްވެސް ހިގާފައެވެ.

ފަލަސްތީނު އޮތޯރިޓީއަށް ފާޑު ކިޔަމުންއައި، ނިޒާރު ބެނެޓް، ހައްޔަރުގައި ހުއްޓާ މަރުވިތާ ދެ ދުވަސްފަހުން، ފަލަސްތީނު އޮތޯރިޓީގެ މައި މަރުކަޒު ހުންނަ ރާމައްލާ ސިޓީއަށް، އެތައް ސަތޭކަބަޔަކު ޖަމާވެ ވަނީ، މަހުބޫދު އައްބާސްއާ ދެކޮޅަށް ޝުޢޫރު ފާޅު ކޮށްފައެވެ.

ބެނެޓްގެ އާއިލާއިން ބުނެފައިވާ ގޮތުގައި، ގިނަ އަދަދެއްގެ ސެކިއުރިޓީ އޮފިސަރުން ބެނެޓް ހައްޔަރު ކުރުމުގެ ކުރިން ދަގަޑުބުރިތަކުން އޭނާއަށް ހަމަލާދީ އަނިޔާ ކޮށްފައި ވެއެވެ. އަދި އޭނާ ހައްޔަރު ކުރުމަށްފަހު، މަދު ގަޑި އިރުތަކެއްގެ ތެރޭގައި އޭނާ ވަނީ މަރުވެފައެވެ.

ބެނެޓްގެ މަރާއިމެދި ހިންހަމަ ނުޖެހިގެން މުޒާހިރާ ކުރި ފަރާތްތަކުން ތިބީ ފަލަސްތީނުގެ ދިދަ އާއި ބެނެޓްގެ ފޮޓޯތައްވެސް ހިފައިގެންނެވެ. އަދި އެމީހުންވަނީ، އުމުރުން 85 އަހަރުގެ މަހުމޫދު އައްބާސްގެ އިސްތިއުފާއަށް ގޮވާފައެވެ.

"އަހަރެމެން ބޭނުންވަނީ މި ސަރުކާރު ބަދަލު ކުރަން،" މުޒާހިރާ ކުރި ފަރާތްތަކުން އަޑު އުފުލާފައި ވެއެވެ.

"އަހަރެމެން ބޭނުންވަނީ، ފަލަސްތީނުގެ ރައްޔިތުންގެ އިހްސާސްތައް ދަންނަ ބަޔަކު އަންނަން، ފަލަސްތީން އޮތޯރީޓިއަށް ސިޔާސީ ބަދަލު ގެންނަން،" މުޒާހިރާ ކުރަމުން ދިޔަ، އިސްމަތު މަންސޫރު ރޮއިޓާސްއާއި ވާހަކަ ދައްކަމުން ބުނެފައި ވެއެވެ.

މުޒާހިރާ ކުރަމުން ދިޔަ ފަރާތްތަކުން، މަހުމޫދު އައްބާސްގެ އޮފީސް ހިމެނޭ އިމާރާތާ ދިމާލަށް ދާން ފެށުމުން، މަހުމޫދު އައްބާސްއަށް ތާއީދުކުރާ ގުރޫޕަކުން ވަނީ، މުޒާހިރާ ކުރަމުންދިޔަ ފަރާތްތަކަށް ހުރަސް އަޅާފައެވެ. އަދި ދެފަރާތުންވެސް ވަނީ އެއްބަޔަކު އަނެއް ބަޔަކަށް އަމާޒުކޮށް ގާއުކާ ހަދާފައެވެ.

ފަލަސްތީނުގެ ސެކިއުރިޓީ ފުލުހުންވަނީ، މުޒާހިރާ ކުރަމުން ދިޔަ ފަރާތްތަކާ ދެކޮޅަށް ކަރުނަ ގޭހާއި ސްޓްން ގްރެނޭޑްސް ބޭނުން ކޮށްފައެވެ.

އަދި ފަހުން އައްބާސްއަށް ތާއީދުކުރާ ފަރާތްތަކުންވަނީ، އެ ސަރަހައްދަށް އެއްވެ އައްބާސްއަށް ތާއީދުކޮށް މުޒާހިރާ ކޮށްފައެވެ.

އިސްރާއީލުން ހިފާފައިވާ ހުޅަގު އައްސޭރީގައި، ހެބްރޮން ސިޓީއަށް ފަލަސްތީން އޮތޯރިޓީން އައްޔަން ކޮށްފައި ހުންނަވާ ގަވަރުނަރު ވިދާޅުވި ގޮތުގައި ބެނެޓް ނިޔާވެފައިވަނީ، ހައްޔަރު ކުރުމަށްފަހު ކުއްލިއަކަށް ސިއްޙީ ހާލަތު ގޯސްވާން ފެށުމަށްފަހު އެވެ. ބެނެޓްގެ މަރާ ގުޅޭ އިތުރު ތަފްސީލެއް އޭނާ ދެއްވާފައެއް ނުވެއެވެ.

އުމުރުން 43 އަހަރުގެ ބެނެޓްއަކީ، ފަލަސްތީނު އޮތޯރިޓީގެ ތެރޭގައި އޮތް ކޮރަޕްޝަނަށް ފާޑު ކިއުމުގެ އިތުރުން، ދާދިފަހުން ފަލަސްތީނުގައި ބޭއްވުމަށް ނިންމި އާންމު އިންތިޚާބު ލަސްކުރި ކުރުމަށްވެސް ވަރަށް ބޮޑަށް ފާޑު ކިޔަމުން އައި، އެކްޓިވިސްޓެކެވެ. އަދި މީގެ އިތުރުން އޭނާ ގެންދިޔައީ، ދާދިފަހުން ފަލަސްތީން އޮތޯރިޓީން އިސްރާއީލާއެކު ވި ކޯވިޑް19 ވެކްސިން އެކްސްޗޭން ޕްރޮގްރާމަށްވެސް ވަރަށް ބޮޑަށް ފާޑު ކިޔަމުންނެވެ.

އޭނާ ވަނީ،  ފަލަސްތީން އޮތޯރިޓީގެ ރައީސް މަހުމޫދު އައްބާސް ދާދިފަހުން، ބޭއްވުން ލަސްކުރި، އާންމު އިންތިޚާބުގައި ފަލަސްތީނުގެ ގާނޫނު ހަދާ މަޖިލީހުގައި ވާދަކުރާނެކަންވެސް އިއުލާން ކުރައްވާފައެވެ.

ނިޒާރު ބެނެޓްއާއި އެއް ގެއެއްގައި ދިރިއުޅެމުންދާ، އޭނާގެ ދެބޭންގެ ދެދަދި ކޮއްކޮއެއް ކަމުގައިވާ، އުމުރުން 21 އަހަރުގެ ހުސެއިން ބެނެޓް ރޮއިޓާސްއަށް މައުލޫމާތު ދީފައިވާ ގޮތުގައި، އެއާއިލާގެ މީހުންނަށް ރޭގަޑު ދަންވަރު ހޭލެވުނީ، ފަލަސްތީނުގެ ސަލާމަތީ ބާރުތަކުން އެގޭގެ ދޮރުތަކާއި ކުޑަ ދޮރުތައް ފަޅާލުމަށްފަހު ގޭތެރެއަށް ވަދެގަތް އަޑުފައްގަޑާއެކުއެވެ.

އަދި ވަނުމަށްފަހު، އޭނާ ހައްޔަރު ކުރުމަށް އައި ފަރާތްތަކުން ބެނެޓަށް ވަގުތުން އަނިޔާ ކުރަން ފެށިކަމަށްވެސް އޭނާ މައުލޫމާތު ދީފައި ވެއެވެ.

ނިޒާރު ބެނެޓްގެ އާއިލާގެ އެހެން ބޭފުޅަކު ބުނެފައިވަނީ، އޭނާ ހައްޔަރު ކޮށްގެން ގެންދިޔައިރު މަރު ނުވާކަމުގައެވެ. އަދި އަނިޔާ ކުރަމުން ދިޔައިރު އޭނާ ހަޅޭ ލައްވަމުން ދިޔަކަމަށްވެސް އޭނާ ބުނެފައި ވެއެވެ.

ހެބްރޮންގެ ގަވަރުނަރު ޖިންރިން އަލް-ބަކްރި ވިދާޅުވެފައިވަނީ، ބެނެޓް ހައްޔަރު ކޮށްފައިވަނީ، ފަލަސްތީން އޮތޯރިޓީގެ އެޓާރނީ ޖެނެރަލްގެ އޯޑަރަށް ކަމަށެވެ.

އެހެންނަނަމެވެސް، އޮފިޝަލުން އޭނާ ހައްޔަރުކުރި ސަބަބު ހާމަކޮށްފައެއް ނުވެއެވެ.

ބެނެޓް ހައްޔަރު ކޮށްގެން ގެންދިއުމާއެކު، “އޭނާގެ ސިއްހީ ހާލަތު ދައްވާން ފެށި، އަދި ވަގުތުން ހެބްރޮންގެ ހޮސްޕިޓަލަށް ގެންދެވުނު. އަދި ޑޮކްޓަރުން ބަލާފަ ބުނެފައިވަނި އޭނާ މަރުވެފައިވާ ކަމަށް،” ބަކްރި ނެރެފައިވާ ބަޔާނުގައި ބުނެފައި ވެއެވެ.

ނިޒާރު ބެނެޓްގެ ހައްޔަރާއި ގުޅިގެން ފަލަސްތީން އޮތޯރިޓީން އަދި މިހާތަނަށް މީޑިއާތަކަށް އެއްވެސް މައުލޫމާތެއް އާންމު ކޮށްފައެއް ނުވެއެވެ.

ނިޒާރު ބެނެޓްގެ މަރާ ގުޅިގެން، ޔޫއެންގެ ފަރާތުން މެދުއިރުމައްޗަށް ކަނޑައަޅާފައި ހުންނަވާ ޚާއްސަ މަންދޫބު ޓޯރ ވެނެސްލޭންޑް ވިދާޅުފައިވަނީ، ބެނެޓް މަރު ހާދިސާގެ ޚަބަރު ލިބިވަޑައިގެންފާ ކަމަށާއި، އަދި އެކަމާ ވަރަށް ހިތާމަ ކުރައްވާ ކަމަށެވެ. އަދި އޭނާވަނީ ދެފުށްފެންނަ ތަހުގީގެއް ކުރުމަށްވެސް ގޮވާލައްވާފައެވެ.