ފަލަސްތީނު އޮތޯރިޓިއަށް ފާޑުކިޔަމުން އައި، އަދި ކުރިޔަށް އޮތް ފަލަސްތީނުގެ ޕާޕަމެންޓްރީ އިންތިޚާބުގައި ވާދަކުރުމަށް ތައްޔާރުވަމުން އައި ނިޒާރު ބެނެޓް، ފަލަސްތީން އޮތޯރިޓީން ހައްޔަރު ކޮށްފައި ވަނިކޮށް އޭނާ މަރުވުމާއި ގުޅިގެން ފަލަސްތީން އޮތޯރިޓީއަށް ބައިނަލްއަގުވާމީ ފާޑު ކިއުން ވަރަށް ބޮޑަށް އަމާޒު ވެއްޖެއެވެ.
ނިޒާރު ބެނެޓްގެ އާއިލާއިން ހާމަ ކޮށްފައިވާ ގޮތުގައި، ކުރީރޭ، ހެބްރޮންގައި ހުންނަ އޭނާގެ ގެއަށް ގަދަކަމުން ވަދެ، އޭނާ ހައްޔަރު ކުރި ކުރުމުގައި، އޭނާއަށް ފަލަސްތީނުގެ ސަލާމަތީ ބާރުތަކުން ވަނީ ވަރަށް ބޮޑަށް އަނިޔާ ކޮށްފައެވެ.
އިސްރާއީލުން ހިފާފައިވާ ހުޅަގު އައްސޭރީގައި، ހެބްރޮން ސިޓީއަށް ފަލަސްތީން އޮތޯރިޓީން އައްޔަން ކޮށްފައި ހުންނަވާ ގަވަރުނަރު ވިދާޅުވި ގޮތުގައި ބެނެޓް ނިޔާވެފައިވަނީ، ހައްޔަރު ކުރުމަށްފަހު ކުއްލިއަކަށް ސިއްޙީ ހާލަތު ގޯސްވާން ފެށުމަށްފަހު އެވެ. ބެނެޓްގެ މަރާ ގުޅޭ އިތުރު ތަފްސީލެއް އޭނާ ދެއްވާފައެއް ނުވެއެވެ.
އުމުރުން 43 އަހަރުގެ ބެނެޓްއަކީ، ފަލަސްތީނު އޮތޯރިޓީގެ ތެރޭގައި އޮތް ކޮރަޕްޝަނަށް ފާޑު ކިއުމުގެ އިތުރުން، ދާދިފަހުން ފަލަސްތީނުގައި ބޭއްވުމަށް ނިންމި އާންމު އިންތިޚާބު ލަސްކުރި ކުރުމަށްވެސް ވަރަށް ބޮޑަށް ފާޑު ކިޔަމުން އައި، އެކްޓިވިސްޓެކެވެ. އަދި މީގެ އިތުރުން އޭނާ ގެންދިޔައީ، ދާދިފަހުން ފަލަސްތީން އޮތޯރިޓީން އިސްރާއީލާއެކު ވި ކޯވިޑް19 ވެކްސިން އެކްސްޗޭން ޕްރޮގްރާމަށްވެސް ވަރަށް ބޮޑަށް ފާޑު ކިޔަމުންނެވެ.
އޭނާ ވަނީ، ފަލަސްތީން އޮތޯރިޓީގެ ރައީސް މަހުމޫދު އައްބާސް ދާދިފަހުން، ބޭއްވުން ލަސްކުރި، އާންމު އިންތިޚާބުގައި ފަލަސްތީނުގެ ގާނޫނު ހަދާ މަޖިލީހުގައި ވާދަކުރާނެކަންވެސް އިއުލާން ކުރައްވާފައެވެ.
ނިޒާރު ބެނެޓްއާއި އެއް ގެއެއްގައި ދިރިއުޅެމުންދާ، އޭނާގެ ދެބޭންގެ ދެދަދި ކޮއްކޮއެއް ކަމުގައިވާ، އުމުރުން 21 އަހަރުގެ ހުސެއިން ބެނެޓް ރޮއިޓާސްއަށް މައުލޫމާތު ދީފައިވާ ގޮތުގައި، އެއާއިލާގެ މީހުންނަށް ރޭގަޑު ދަންވަރު ހޭލެވުނީ، ފަލަސްތީނުގެ ސަލާމަތީ ބާރުތަކުން އެގޭގެ ދޮރުތަކާއި ކުޑަ ދޮރުތައް ފަޅާލުމަށްފަހު ގޭތެރެއަށް ވަދެގަތް އަޑުފައްގަޑާއެކުއެވެ.
އަދި ވަނުމަށްފަހު، އޭނާ ހައްޔަރު ކުރުމަށް އައި ފަރާތްތަކުން ބެނެޓަށް ވަގުތުން އަނިޔާ ކުރަން ފެށިކަމަށްވެސް އޭނާ މައުލޫމާތު ދީފައި ވެއެވެ.
"އެމީހުން ދަގަޑު ބުރިތަކުން އޭނާގެ ބޮޑުގައި ތަޅަންފެށި، އެއީ އެމީހުން ގޭގެ ދޮރުތައްވެސް ހަލާކު ކުރުމަށް ބޭނުންކުރި ތަކެތި،" އާ ބުނެފައި ވެއެވެ. "އެމީހުންވަނީ 8 މިނިޓެއްހާއިރު ވަންދެން ހުއްޓުމެއްނެތި އޭނާއަށް އަނިޔާ ކުރަމުން ގޮސްފައި. އޭނާ ހައްޔަރު ކުރުމަށް އައި ބަޔަކު އޭނާ ހައްޔަރު ކޮށްގެން ނުގެންދިޔައީ ކީއްވެ؟ ކީއްކުރަން އަނިޔާކުރަންވީ؟"
ނިޒާރު ބެނެޓްގެ އާއިލާގެ އެހެން ބޭފުޅަކު ބުނެފައިވަނީ، އޭނާ ހައްޔަރު ކޮށްގެން ގެންދިޔައިރު މަރު ނުވާކަމުގައެވެ. އަދި އަނިޔާ ކުރަމުން ދިޔައިރު އޭނާ ހަޅޭ ލައްވަމުން ދިޔަކަމަށްވެސް އޭނާ ބުނެފައި ވެއެވެ.
ހެބްރޮންގެ ގަވަރުނަރު ޖިންރިން އަލް-ބަކްރި ވިދާޅުވެފައިވަނީ، ބެނެޓް ހައްޔަރު ކޮށްފައިވަނީ، ފަލަސްތީން އޮތޯރިޓީގެ އެޓާރނީ ޖެނެރަލްގެ އޯޑަރަށް ކަމަށެވެ.
އެހެންނަނަމެވެސް، އޮފިޝަލުން އޭނާ ހައްޔަރުކުރި ސަބަބު ހާމަކޮށްފައެއް ނުވެއެވެ.
ބެނެޓް ހައްޔަރު ކޮށްގެން ގެންދިއުމާއެކު، "އޭނާގެ ސިއްހީ ހާލަތު ދައްވާން ފެށި، އަދި ވަގުތުން ހެބްރޮންގެ ހޮސްޕިޓަލަށް ގެންދެވުނު. އަދި ޑޮކްޓަރުން ބަލާފަ ބުނެފައިވަނި އޭނާ މަރުވެފައިވާ ކަމަށް،" ބަކްރި ނެރެފައިވާ ބަޔާނުގައި ބުނެފައި ވެއެވެ.
ނިޒާރު ބެނެޓްގެ ހައްޔަރާއި ގުޅިގެން ފަލަސްތީން އޮތޯރިޓީން އަދި މިހާތަނަށް މީޑިއާތަކަށް އެއްވެސް މައުލޫމާތެއް އާންމު ކޮށްފައެއް ނުވެއެވެ.
ނިޒާރު ބެނެޓްގެ މަރާ ގުޅިގެން، ޔޫއެންގެ ފަރާތުން މެދުއިރުމައްޗަށް ކަނޑައަޅާފައި ހުންނަވާ ޚާއްސަ މަންދޫބު ޓޯރ ވެނެސްލޭންޑް ވިދާޅުފައިވަނީ، ބެނެޓް މަރު ހާދިސާގެ ޚަބަރު ލިބިވަޑައިގެންފާ ކަމަށާއި، އަދި އެކަމާ ވަރަށް ހިތާމަ ކުރައްވާ ކަމަށެވެ. އަދި އޭނާވަނީ ދެފުށްފެންނަ ތަހުގީގެއް ކުރުމަށްވެސް ގޮވާލައްވާފައެވެ.
Alarmed & saddened by the death of activist, former parliamentary candidate, Nizar Banat following his arrest by PSF in Hebron. My deepest condolences to his family & loved ones. I call for a swift, independent & transparent investigation. Perpetrators must be brought to justice.
— Tor Wennesland (@TWennesland) June 24, 2021
