އިރާނުގެ ގާނޫނު ހަދާ މަޖިލިހުގެ މެމްބަރެއް ކަމުގައިވާ، އަދި ލުބުނާނުގެ ހިޒުބުﷲ ޖަމާއަތުގެ އެއްބާނީ ކޯވިޑް ބަލީގައި ހޯމަދުވަހު ނިޔާވެއްޖެކަމަށް އިރާނުގެ ރަސްމީ ނޫސް އޭޖެންސީން އިރްނާއިން ހާމަކޮށްފިއެވެ.
އުމުރުން 75 އަހަރުގެ އަލީ އަކްބަރު މޮޓާޝަމިޕޫރު ނިޔާވިއިރު އޭނާ ފަހަކަށް އައިސް ދިރިއުޅުއްވަމުން ގެންދެވީ އިރާގުގެ ނަޖަފް ސިޓީގައެވެ.
އެހެންނަމަވެސް އަލީ އަކްބަރު މޮޓާޝަމިޕޫރު ކޯވިޑަށް ޕޮޒިޓިވް ވުމާއިއެކު، އޭނާވަނީ އިރާނުގެ ވެރިރަށަށް ގެންދެވިފައެވެ. އަދި އޭނާ އެޑްމިޓް ކުރެވުނީ، ތެހެރާންގައި ހުންނަ އިރާންގެ ރިވޮލިއުޝަނަރީ ގާޑަށް ނިސްބަތްވާ ހޮސްޕިޓަލެއްގައެވެ.
މޮޓާޝަމިޕޫރުއަކީ، 1980 ވަނަ އަހަރު، ހިޒްބުﷲ ޖަމާއަތް އުފަންކުރުމުގައި އެންމެ އިސްކޮށް މަސައްކަތް ކުރެއްވި އިރާންގެ 5 މީހުންގެ ތެރޭގައި ހިމެނޭ އެއް ބޭފުޅެކެވެ.
މި 5 އޮފިޝަލުންގެ ތެރޭގައި ހިމެނޭ އިތުރު އެއް ބޭފުޅަކުވަނީ ކޯވިޑް ބަލީގައި ފާއިތުވެދިޔަ އަހަރު ނިޔާވެފައެވެ.
މޮޓާޝަމިޕޫރު ވަނީ 1980ވަނަ އަހަރު އިރާނުގެ ސީނިއަރ މިނިސްޓަރެއްގެ ގޮތުގައި، އަދި އެއަށްފަހު ގާނޫނުހަދާ މަޖިލިހުގެ މެމްބަރެއްގެ ގޮތުގައިވެސް މަސައްކަތް ކުރައްވާފައެވެ. އަދި މީގެ އިތުރުން 90ގެ އަހަރުތަކުގެ ފަހުކޮޅު، އިރާނުގެ ރީފޯމިސްޓް ވިނުމުގެ ރައީސެއް ކަމުގައިވާ މުހައްމަދު ޚާތަމީގެ މުޝީރެއްގެ ގޮތުގައިވެސް އޭނާ މަސައްކަތް ކުރައްވާފައި ވެއެވެ.
މެދު ފަންތީގެ ދީނީ އިލްމުވެރިއެއްގެ ގޮތުގައި ފާހަގަވެފައިވާ މޮޓާޝަމިޕޫރުއަކީ އިރާނުގެ އެސޯސިއޭޝަން އޮފް ކޮމްބަޓަންޓް ކްލެރިކްސްގެ މެމްބަރެއްވެސް މެއެވެ. މިއީ އިރާނުގައި އިސްލާހަށް މަސައްކަތްކުރާ މައި ޕާޓީއެވެ.
2020ވަނަ އަހަރުގެ ފެބްރުއަރީމަހު އިރާނުން ކޯވިޑް19 ފެނުނު ފަހުން، އެގައުމުގެ އެތަކެއް އޮފިޝަލުންނެއްވަނީ ކޯވިޑް ބަލީގައި ނިޔާވެފައެވެ.
މިހްފަތާގެ އާދީއްތަ ދުވަހާއި ހަމައަށް އިރާނުގައި 81,000 މީހުން މިބަލީގައި ވަނީ މަރު ވެފައެވެ. އަދި 3 މިލިއަން މީހުން ބައްޔަށް ޕޮޒިޓިވް ވެފައި ވެއެވެ.
