އަގުއޭރޯ ބާސެލޯނާއަށް ބަދަލުވެއްޖެ

މެންޗެސްޓަރ ސިޓީއަށް ކުޅެމުން އައި އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ސްޕެއިން ބާސެލޯނާއަށް ބަދަލުވެއްޖެއެވެ.

އުމުރުން 32 އަހަރުގެ އަގުއޭރޯ ބާސެލޯނާއަށް ބަދަލުވެފައިވަނީ ހިލޭ ޓްރާންސްފާއެއް ދަށުންނެވެ. އަގުއޭރޯގެ ކުރީގެ ކްލަބް ސިޓީ އާއެކު ހަދާފައިވާ އެއްބަސްވުން މި ސީޒަންގެ ނިޔަލަށް ވަނީ ހަމަވެފައެވެ. އަގުއޭރޯ ބާސެލޯނާއާއެކު ހަދާފައިވަނީ 2 އަހަރު ދުވަހުގެ ކޮންޓްރެކްޓްކެއެވެ.

ބާސެލޯނާއިން މިއަދު ވަނީ އަގުއެރޯ އެ ކްލަބުގެ މެޑިކަލް ފުރިހަމަ ކުރަމުން ދިޔަ ފޮޓޯތައްވެސް އާއްމުކޮށްފައެވެ. ރިޕޯޓްތައް ބުނާގޮތުން އަގުއޭރޯގެ ރިލީޒް ކްލޯޒް ފީގެ ގޮތުގައި ބާސެލޯނާއިން ކަނޑައަޅާފައިވަނީ 100 މިލިއަން ޔޫރޯއެވެ.

ބާސެލޯނާއަށް ބަދަލުވުމަށްފަހު ވާހަކަ ދައްކަމުން އަގުއޭރޯ ބުނީ، އަންނަ ސީޒަނުގައި މެސީ ބާސެލޯނާގައި މަޑުކުރާނެ ކަމަށް އުއްމީދު ކުރާކަމަށާއި، މެސީއާއެކު ބާސެލޯނާގައި ކުޅުމަކީ އުއްމީދެއް ކަމަށެވެ. އަދި މެސީ ވަރަށް ރަނގަޅަށް ދަންނަ ކަމަށްވެސް އަގުއޭރޯ ވަނީ ބުނެފައެވެ.

2011 ވަނަ އަހަރު މެންޗެސްޓަރ ސިޓީއާއި ގުޅުނު އަގުއޭރޯ ވަނީ އެ ކްލަބާއެކު ގިނަ ކާމިޔާބީތަކެއް ހޯދާފައެވެ. އެގޮތުން ސިޓީއާއެކު 5 ފަހަރު އިނގިރޭސި ޕްރިމިއާ ލީގު ކާމިޔާބުކޮށްފާއިރު، 1 ފަހަރު އިނގިރޭސި އެފްއޭ ކަޕް ކާމިޔާބުކޮށްފައެވެ. އަދި އިނގިރޭސި ލީގު ކަޕް 6 ފަހަރު، އިނގިރޭސި ކޮމިއުނިޓީ ޝީލްޑް 3 ފަހަރު ކާމިޔާބުކޮށްފައެވެ.

އަގުއޭރޯ އަކީ ސިޓީގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާއެވެ. އޭނާ ވަނީ އެ ޓީމަށް 257 ގޯލު ކާމިޔާބުކޮށްދީފައެވެ.

ސިޓީއާއެކު އަގުއޭރޯ އެންމެ ކާމިޔާބުކުރަން ބޭނުންވި ޗެމްޕިއަންސް ލީގު އޭނާއަށް ވަނީ ކާމިޔާބުކުރެވޭ ގޮތް ނުވެފައެވެ. އެގޮތުން ސިޓީއަށް އެންމެ ފަހުން ކުޅުނު މެޗަކަށް ވެގެން ދިޔައީވެސް ޗެމްޕިއަންސް ލީގުގެ ފައިނަލް މެޗެއެވެ. އެ މެޗުގައި 0-1 ގެ ނަތީޖާއަކުން ސިޓީ ބަލިކޮށް ޗެމްޕިއަންކަން ހޯދީ ޗެލްސީއެވެ.