މާލެ ސަރަހައްދުގެ މިސްކިތްތައް ވަގުތީގޮތުން ބަންދުކޮށް މިސްކިތްތަކުގެ ފެންކަނޑާލުމަށް މާލެ ސިޓީ ކައުންސިލަށް އަންގާފައިވަނީ އެލްޖީއޭއިންކަން ހާމަވެއްޖެއެވެ.
މިމަހުގެ 29 ވަނަ ދުވަހު އެލްޖީއޭގެ ސީއީއޯ އަފްޝާން ލަތީފް ސޮއިކުރައްވައި މާލެ ސިޓީ ކައުންސިލުގެ މޭޔަރު ޑރ.މުހައްމަދު މުއިއްޒުއަށް ފޮނުވި ސިޓީގައި ބުނެފައިވަނީ މާލޭ ސަރަހައްދުގައި ކޯލިޑް ފެތުރޭ މިންވަރު ވަރަށް ބޮޑުތަން އިތުރުވެފައިވާތީ އަޅާފައިވާ ފިޔަވަޅުތައް ރަނގަޅަށް ތަންފީޒު ނުވެ ހުންނާތީ ޕޮލިސީ ގްރޫޕްގައި މަޝްވަރާކޮށް ބައެއް ނިންމުންތައް ވަނީ ޕޮލިސީ ގްރޫޕް ބައްދަލުވުމުގައި ނިންމާފައިކަމަށެވެ. މިގޮތުން މިސްކިތްތަކާއި މިސްކިތްތަކުގެ ފާޚާނާތަކާއި އިސްކުރުބަރިތައް ބަންދު ނުކޮށް ހުންނާތީ އަދިވެސް ގިނަބަޔަކު އެތަންތަން ބޭނުންކުރާތީ ބަލިފެތުރުން އިތުރުވުމުގެ ފުރުސަތު އޮތަތީވެ، މިސްކިތްތަކާއި މިސްކިތްތަކުގެ ފާޚާނާތައް ބޭނުންނުކުރެވޭގޮތަށް ވަގުތީގޮތުން ބަންދުކުރުމަށް ވަނީ ޕޮލިސީ ގްރޫޕް ބައްދަލުވުމުން ނިންމަވާފައިވާކަމަށެވެ.
ޕޮލިސީ ގުރޫޕްގެ ނިންމުމާ އެއްގޮތަށް މާލެ ސިޓީ ކައުންސިލްގެ ބެލުމުގެ ދަށުގައި ހުރި މިސްކިތްތައް ބަންދުކޮށް ބޭނުން ނުކުރެވޭ ގޮތަށް މިސްކިތްތަކުގެ ފެންކަނޑާލުމަށް އަދި މިސްކިތްތަކުގެ ފާޚަނާތައް ބަންދުކުރުމަށް އެލްޖީއޭއިން ވަނީ އަންގާފައެވެ.
މާލެ ސިޓީގެ މިސްކިތައް ބަންދުކޮށް ފެންކަނޑާލާފައިވާއިރު ގިނަބަޔަކު ދަނީ މިކަމުގެ ކަންބޮޑުވުން ފާޅު ކުރަމުންނެވެ. އެގޮތުން ބައެއް ގޭގޭގައި ނަމާދު ކުރެވޭނެ ގޮތެއްނެތި މިސްކިތްތަކަށް ދިއުމުންވެސް ނަމާދު ކުރެވޭނެ ގޮތެއް ނެތުމަކީ ގިނަބައެއްގެ ކަންބޮޑުވުމެކެވެ.
އިސްލާމިކް މިނިސްޓްރީން ވިދާޅުވީ، މާލޭ ސަރަޙައްދުގެ މިސްކިތްތައް ބަންދުކުރަން ނިންމީ، މިމަހުގެ 19 ވަނަ ދުވަހުގެ އެ މިނިސްޓްރީން އެންގި އެންގުމާ ޚިލާފަށް، ބައެއް ފަރާތްތަކުން އެ އެންގުންތަކަށް ތަބާނުވެ ބައެއް މިސްކިތްތަކުގައި ގައިދުރުކަމެއް ނެތި ޖަމާޢަތް ހަދަމުންދާތީއާއި، ކޯވިޑް-19ގެ ޙާލަތު މާލޭގައި ފެތުރުން އަދިވެސް ކޮންޓްރޯލްނުކުރެވޭތީކަމަށެވެ. އަދި މިމަހުގެ 26 އިން ފެށިގެން ހުއްދައާއި ނުލާ އާއްމުން ބޭރަށް ނުކުމެއުޅުން މަނާކޮށްފައިވާތީކަމަށްވެސް އެ މިނިސްޓްރީން ވިދާޅުވެފައިވެއެވެ.
ކޮމެންޓު ފޮނުވާ