ކޯވިޑް-19ގެ ހާލަތު އިންތިހާއަށް ގޯސްވެ އާންމުންގެ އެހީތެރިކަމަށް ހުޅުވާލި ފުރުސަތުގައި އެހީތެރިވުމަށް، ވޮލެންޓިއަރުންގެ ގޮތުގައި 1،000 އަށްވުރެ ގިނަ މީހުން ކުރިމަތި ލާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނެފައިވަނީ ވޮލެންޓިއަރުންނަށް އެދި ހުޅުވާލި ފުރުސަތުގައި މިހާތަނަށް ބޮޑު ތަރުހީބެއް ލިބިފައިވާކަމަށެވެ. އަދި މިހާރު މި ފޯމްތައް އެންޓަކޮށް، މީހުންނަށް ގުުޅުުމުގެ މަސައްކަތް ކުރަމުންދާކަމަށެވެ. އެޗްޕީއޭއިން ބުނެފައިވަނީ މިހާރު ފޯމްތައް ބަލައިގަތުން މެދު ކަނޑާލާފައިވާކަމަށެވެ. ކޯވިޑް-19ގެ ހާލަތު އިންތިހާއަށް ގޯސްވެ ޕޮޒިޓިވްވާ މީހުންނާއި، މަރުވާ މީހުންގެ އަދަދު އިތުރުވަމުން ދިއުމާއި ގުޅިގެން ސަރުކާރުން ވޮލެންޓިއަރުންގެ އެހީއަށް އެދިފައިވަނީ މިމަހުގެ ކުރީކޮޅުއެވެ.
އެޗްޕީއޭއިން ވަނީ މިހާ ގިނަ އަދަދެއްގެ ބަޔަކު މިފަދަ ހާލަތެއްގައި މަސައްކަތް ކުރުމަށް ޝައުގުވެރިކަން ފާޅު ކުރެއްވި ކަމަށްޓަކައި ޝުކުރު އަދާކޮށްފައެވެ.
We are extremely grateful for the hundreds of selfless people who responded to our call for volunteers.
We have received over a 1000 submissions and are processing the list. Submissions have been temporarily halted.
Thank you for your tremendous support. #EkugaiEmmen
— Health Protection Agency (@HPA_MV) May 28, 2021
ވޮލެންޓިއަރުންގެ ގޮތުގައި މިހާރު ވެސް ބައެއް މީހުން، އެތަނުގެ އެޗްޕީއޭގެ ކޯލް ސެންޓަރުގެ މަސައްކަތް ކުރެ އެވެ. އެތަނުގެ އިތުރުން ބަލި މީހުންނަށް އަޅާލުމަށް ކޮވިޑް ފެސިލިޓީތަކަށާއި ސާމްޕަލް ނެގުން ފަދަ ކަންކަމަށް ވެސް ވޮލެންޓިއަރުން ވަރަށް ބޮޑަށް ބޭނުންވެއެވެ.
ކޯވިޑް-19 ގެ ހާލަތު ގޯސްވެ ފަރުވާދޭ މީހުންގެ އަދަދު އިތުރުވެފައިވުމާއި ގުޅިގެން އެކަށީގެންވާ ފަރުވާނުދެވި ގިނަ ކަންބޮޑުވުންތަކެއް ގިނަ ބަޔަކު ދަނީ ފާޅު ކުރަމުންނެވެ. މިހާތަނަށް ރާއްޖެއިން ކޯވިޑް-19އަށް ޕޮޒިޓިވްވި މީހުންގެ ޢަދަދުވަނީ 61،844 އަށް އަރާފައެވެ. ފަރުވާ ހޯދާ މީހުންގެ ޢަދަދުވެސް މިހާރުވަނީ 24،818އަށް އަރާފައެވެ. ކޯވިޑް ބަލީގައި ރާއްޖެއިން މިހާތަނަށް 155 މީހުންވަނީ ނިޔާވެފައެވެ.
ކޮމެންޓު ފޮނުވާ