ސްޕެއިން ރެއާލް މެޑްރިޑްގެ ކޯޗުކަމުން ވަކިވާން ޒައިނުއްދީން ޒިދާން ނިންމައިފިއެވެ.
މީގެ ކުރިންވެސް ރެއާލްއަށް ކޯޗުކޮށްދީ، ތިން ފަހަރަށް ޗެމްޕިއަންސް ލީގު ކާމިޔާބު ކޮށްދިނުމަށްފަހު ޒިދާން ވަނީ މަގާމުން އެއްފަރާތް ވެލައިފައެވެ. އޭނާ އަލުން މިފަހަރު ކުލަބާ ހަވާލުވީ 19-2018 ވަނަ އަހަރުގެ ސީޒަންގެ ފަހުކޮޅުގައެވެ.
ޒިދާން އެ މަގާމު ދޫކޮށްލަން ނިންމި ވަކި ސަބަބެއް އަދި ހިއްސާ ކޮށްފައިނުވާ އިރު، ބެލެވޭ ގޮތުގައި ރެއާލްގެ ކޯޗުކަމުން ޒިދާން ވަކިވެފައިވަނީ މި ސީޒަން ހުސްއަތާ ނިންމާލަން ޖެހުމުންނެވެ.
ލީގުގެ ދެވަނަ މަގާމުގައި ސީޒަން ނިންމާލި އިރު، ޒިދާން ވަނީ ޗެމްޕިއަންސް ލީގުގެ ސެމީ ފައިނަލަށް ވެސް ރެއާލް ގެންގޮސްދީފައެވެ.
ދެން ޒިދާނަށް އޮތް ފުރުސަތަކީ ޔުވެންޓަސްގެ ކޯޗުކަން ކަމަށްވެސް ބައެއް ރިޕޯޓުތަކުން ބުނެފައިވެއެވެ. އަންދްރޭ ޕިރްލޯއާއެކު ޔުވެންޓަސްއިން ނާކާމިޔާބު ސީޒަނެއް ނިންމާލާފައިވާ އިރު، ގިނަ ބަޔަކު ބުނަނީ ޔުވެންޓަސްއިން ޒިދާން ގެންދަން ބޭނުންވާ ކަމަށެވެ.
ކޮމެންޓު ފޮނުވާ