ސިޔާސީ މަސައްކަތަކީ އަބަދުވެސް ހަލަބޮލި މަސައްކަތަކެވެ. ދުނިޔޭގެ ހުރިހާ ގައުމެގައިވެސް، އަދި ވަކީން ޚާއްސަކޮށް، ޑިމޮކްރަސީގެ މިންވަންކަން އޮތް ގައުމުތަކުގައި އެކަން އޮތީ އެހެންނެވެ.

ޑިމޮކްރަސީއަކީ އޭޒާތުގައި، ބިނާ ކުރަނިވި ފާޑުކިއުމާއި، ސިޔާސީ ދެކޮޅުވެރިކަމުގެ ތެރެއިންވެސް ގިނަ ކަންކަމުގެ ހައްލު ނެރެވޭ ނިޒާމެކެވެ. ޑިމޮކްރަސީގެ މައިގަޑު އަސާސްތަކުގެ ތެރޭގައި ޚިޔާލު ފާޅުކުރުމުގެ މިނިވަންކަމާ، އެއްވެ އުޅުމުގެ މިނިވަންކަން ގާނޫނު އަސާސީގައި ލިޔެވި ބަޔާންކުރެވިގައިވަނީ މި ސަބަބަށްޓަކައެވެ.

އަދި ހަމަ އެފަދައިން، ކޯޅޭ ކޯޅުންތަކާއި، ކުރެވޭ ޒުވާބުތަކަށް ރައްޔިތުންގެ މަޖިލިހުގެ ތެރޭގައި ޚާއްސަ އިމްތިޔާޒުތަކެއްގެ ތެރެއިން، ޖާގަ ދީފައި އޮންނަނީ، ޑިމޮކްރަސީއަކީ ބަހުސްކޮށްގެން، ބޮޑެތި ޚިޔާލުތަފާތުވުން ތަކުގެ ތެރެއިންވެސް ކަންކަމުގެ ހައްލު ހޯދާ ނިޒާމް ކަމަށްވާތީއެވެ. އެހެންނަމަވެސް މިދެންނެވީ ބީދައިން ގައުމަށް އެންމެ ރަގަޅު ހައްލު ޑިމޮކްރަސީގައި ލިބިގެންދާނީ، ކަންކަމުގައި ބަސް ބުނަން އިޚްލާސްތެރި، ތެދުވެރި، އަދި ވާނުވާ ރަގަޅަށް ސާފުވާވަރު އިލްމާއި ހިލްމުހުރި ބަޔަކު ތިބެގެންނެވެ.

މި ސަބަބައްޓަކާ، ވަރަށް ގިނަފަހަރު ޑިމޮކްރަސީ މަގުން ކައްސާލާ މަންޒަރު ފެނިގެން ދެއެވެ. އަދި ޑިމޮކްރަސީއަކީ، އެންމެ ރަގަޅު ގޮތް ނިންމާ ނިޒާމުކަމުގައި ވެގެން ދިއުމުގެ ބަދަލުގައި އެއީ، ހަމައެކަނި މެޖޯރީޓިއަށް ތަބާވާ ނިޒާމުކަމުގެ ބުނެ އުޅެނީވެސް މިސަބަބައްޓަކައެވެ.

މީގެ ގިނަ އިބުރަތްތަކެއް މިއަދު ވަށައިގެން ބަލާލުމުން ފެންނާން އެބަހުއްޓެވެ. މިހާރު މުޅި ދުނިޔެ ހަގުރާމަ ކުރަމުންދާ ޕެންޑަމިކަށް ބަލާލުން މީގެ އެތަކެއް މިސާލުތަކެއް އެތެރެއާއި ބޭރުން ފެންނާން އެބަހުއްޓެވެ.

ލޯކަލް ކައުންސިލް އިންތިޚާބު

މިއަހަރުގެ ލޯކަލް ކައުންސުލް އިންތިޚާބު ވެގެން މިދިޔައީ އެތައް ގޮތަކުން އާދަޔާ ޚިލާފު އިންތިޚާބަކަށެވެ. މި އިންތިޚާބަކީ، އާގާނޫނު އަސާސީއަށްފަހު ގެނެވުނު އިދާދާއިރާތައް ލާމަރުކަޒީ އުސޫލުން ހިންގުމުގެ ނިޒާމަށް ބޮޑެތި ބަދަލުތަކެއް ގެނެވި، ބާރުތައް ކައުންސިލްތަކަށް ދޫކޮށްލެވި، އަދި ދައުރުވެސް 3 އަހަރުން 5 އަހަރަށް ދިގުކުރެވި، ބޭއްވިގެން ދިޔަ ފުރަތަމަ އިންތިޚާބެވެ.

އަދި ހަމައެއާއެކު، ގާނޫނު އަސާސީގައި ކަޑައެޅި ބަޔާން ކުރެވިފައިވާ ތާރީޚަށް އިންތިޚާބު ބޭއްވުމުގެ ފުރުސަތު ލިބިގެން ނުދިއުމުގެ ސަބަބުން، އަހަރެއްހާ ދުވަހަށް އިންތިޚާބު ލަސްވެސް ކުރަން ޖެހުނެވެ.

އަދި މިހުރިހާ ސަބަބުތަކެއް މިގޮތަށް ހުރެމެ، ބޭއްވިގެން ދިޔަ މިއިންތިޚާބު ޚާއްސަވެގެން ދިޔަ އެހެން ސަބަބެއްވެސް އެބައޮތެވެ.

ކޯވިޑް ކާރިސާގެ ހާލަތު ރާއްޖޭގައި އާދަޔާ ޚިލާފަށް ގޯސްވެގެން ދިއުމާ ގުޅިގެން، ރޭ ރައީސްގެ ޚާއްސަ ޕްރެސް ކޮންފަރެންސެއް އޮންލައިންކޮށް ބޭއްވިގެން ދިޔައެވެ. މި ޕްރެސް ކޮންފަރެންސްގައި ރައީސް ވިދާޅުވެފައިވަނީ، ކޯވިޑްގެ ހާލަތު ގޯސްވެގެން ދިޔަ އެއް ސަބަބަކީ، އިންތިޚާބާއި ދިމާކޮށް ދެވުނު ލުއިތައް ކަމަށް ގަބޫލު ކުރައްވާ ކަމުގައެވެ.

ކޯވިޑްގެ ހާލަތުގައި ކައުންސިލް އިންތިޚާބު ބޭއްވުމަށް މަޖިލީހާއި ސަރުކާރުން ބާރުއަޅަމުން ދިއުމުގެ ސަބަބުން އިންތިޚާބު ބޭއްބުމަށް އެޗްޕީއޭއިން ވަނީ ގިނަ ލުއިތަކެއް ދީފައެވެ. އޭފްރީލް މަހުގެ ތެރޭގައި ދިން ގިނަ ލުއިތަކާއިއެކު ބަލި ފެތުރުމަށް ގިނަ މަގުތަކެއް ހުޅުވިގެންދިޔަކަމަށް ގިނަ ބަޔަކު އޭރުވެސް ދިޔައީ ބުނަމުންނެވެ.

މި ޕްރެސްގައި ރައީސް ޞާލިހު ވިދާޅުވީ އިންތިޚާބާއި ދިމާކޮށް، އޭޕްރީލް މަހުގެ ތެރޭގައި ސަރުކާރުން ދިން ލުއިތަކަކީ ހެދުނު ގޯހެއްކަމަށް މިއަދު ގަބޫލު ކުރައްވާކަމަށެވެ. ނަމަވެސް އެކަމުން އަރައިގަތުމަށް މިއަދު މަސައްކަތް ކުރުމަކީ އެންމެން ގުޅިގެން ކުރަންޖެހޭ ކަމެއްކަމަށާއި، މިއަދު އަޅާފައިވާ ފިޔަވަޅުތަކަކީ ކުރިމަތިވެފައިވާ ބަލި މަޑުކަމުން އަރައި ގަތުމަށް އަޅާފައިވާ ފިޔަވަޅުތަކެއް ކަމަށްވެސް މި ޕްރެސް ކޮންފަރެސްގައި ރައީސް ވިދާޅުވެފައި ވެއެވެ.

މީގެއިތުރަށް އެމަނިކުފާނު ވިދާޅުވީ މިގޯސްތައް ދުނިޔޭގެ ބޮޑެތި ހުރިހާ ޤައުމުތަކަކުވެސް ހެދިކަމަށާއި، ނަމަވެސް އެޤައުމުތަކުގައިވެސް ހަރުދަނާ ފިޔަވަޅުތަކާއިއެކު ބަލިމަޑުކަމުން އަރައި ގަންނަމުންދާތަން ފެންނަކަމަށެވެ.

ފާއިތުވެދިޔަ ލޯކަލް ކައުްންސިލް އިންތިޚާބުގައި، ކެމްޕޭނަށް އެމްޑީޕީގެ ލީޑަރޝިޕުން ރަސްދޫއަށް ދަތުރު ކޮށްފައިވަނީ، ބޮޑު ސަފާރީއެއްގައި، ލަވައާއި މިއުޒިކާއި، ކުޅި މަޖަލުގައެވެ. އަދި ރަސްދޫގައި ޖަލްސާ ބާއްވާފައިވަނީ، ގައިދުރުކަމެއްނެތި، އާންމު ހާލަތުގައި ޖަލްސާ ބާއްވާ އުސޫލުން، ވަރަށް ޖޯޝާއި ފޯރީގައެވެ.

އެމްޑީޕީން މި ޖަލްސާ ބާއްވާ، އެޕާޓީގެ ކެމްޕޭންގެ ނިމުން ފާހަގަ ކޮށްފައިވަނީ، ކޯވިޑާއި ދެކޮޅަށް އަޅާފައިވާ ފިޔަވަޅުތަކަށް އެޗްޕީއޭއިން ކުއްލި ލުއިތަކެއް ދިނުމާއެކުއެވެ.

ކޮންމެއަކަށް އެދުވަހަށް މިއަދު އެބުރި ބަލާލާއިރު ފާހަގަވާން އޮތް ކަމަކީ، އެއީ ކޮށްގެންވާނެ ކަމެއް ނޫންކަމެވެ. އަދި އެޗްޕިއޭއީން އެ ދުވަސްވަރު ކުއްލި ކުއްލިއަށް، ފިޔަވަޅުތަކަށް ގެންނަމުން ދިޔަ ލުއިތަކާ ބަދަލު ތަކަށް ބަލާއިރު، އެޗްޕީއޭގެ ތެރެއަށް އޭރު އިންތިހާއަށް ސިޔާސީ ނުފޫޒު ވަދެފައި އޮތްކަމަށްވެސް އެތައްބަޔަކު ދިޔައީ ބުނަމުންނެވެ.

މިއަދު ރައީސުލްޖުމްހޫރިއްޔާ، އޭރު ދެވުނު ލުއިތަކާ، ފިޔަވަޅުތަކަށް ގެނެވުނު ބަދަލުތަކަކީ ހަގީގަތުގައިވެސް ގޯސްކޮށް ދެވުނު ލުއިތަކެއް ކަމަށް ގަބޫލު ކުރެއްވުމަކީ އެމަނިކްފާނު ދެއްކެވި ހިތްވަރުގަދަ ނަމޫނާއެއްކަމުގައި ދެންނެވިދާނެއެވެ. އަދި އެއީ، ކަންކަން އިސްލާހު ކުރުމަށް އެމަނިކްފާނުގެ ހިތްފުޅުގައި އޮތް ޝައުގެއްގެ ބޮޑުކަން ހާމަވެގެންދާ ކަމެއްވެސް މެއެވެ.

އެހެންނަމަވެސް، މުޅި ދުނިޔެއަށްވެސް ކުރިމަތިވެފައިވާ މި ބިރުވެރި ކާރިސާގެ ތެރޭގައިވެސް، ޒިންމާދާރު ނޫންގޮތުގައި، ސިޔާސީ ކުޅިވަރު ކުޅުއްވާ، ކުޅިފަސް ހޯއްދެވުމަށް މަސައްކަތް ކުރައްވާ ބޭފުޅުން އެންމެ ބޮޑު ދެޕާޓީގެ ލީޑަރޝިޕްގައިވެސް އެބަ ތިއްބެވިއެވެ.

އެމްޑީޕީގެ ރައީސާއި، އެޕާޓީގެ އެހެން ބައެއް މަޖިލިސް މެމްބަރުންވެސްވަނީ، ޕެންޑަމިކްގެ ކުރީކޮޅުގައި ލޮކްޑައުން ކުރުމާއި ދެކޮޅަށްވެސް ފާޅުގައި ވާހަކަ ދައްކަވާފައެވެ. ބައެއް ބޭފުޅުން ކޯވިޑް19 އަކަކީ ނުރައްކާތެރި ބައްޔެއް ނޫންކަމުގައި ވިދާޅުވެ، ވާހަކަ ދައްކަވާފައި އެބަހުއްޓެވެ.

އިދިކޮޅު ޕީޕީއެމްއިން މިއޮށްބޮޑު ކާރިސާގެ ތެރޭގައި ބޮޑެތި މުޒާހިރާތައް ކޮށްފައި އެބަހުއްޓެވެ. ގިނަ މުޒާހިރާތައް ކުރިޔަށް ގޮސްފައިވަނީ އެޗްޕީއޭގެ ގައިޑްލައިންތަކަށްވެސް ބެލުމެއް ނެތިއެވެ. މިއިން ކޮންމެ ހަރަކާތަކީވެސް، ސިޔާސީ ކުޅިވަރުތައް ކުރިޔަށްނެރެ، ގައުމުގެ މިއަދުގެ ހާލަތަށް ބެލުމެއްނެތި، ޕާޓީތަކުގެ ލީޑަރޝިޕްތަކުން ކުރިޔަށް ގެންގޮސްފައި ހުރި ޒިންމާދާރުކަން ކުޑަ ހަރަކާތްތަކެކެވެ.

ފިލާވަޅެއް

ކޯވިޑް19ގެ ހާލަތު މިއަދު ރާއްޖޭގައި މިއޮތީ ކޮންޓްރޯލުން ނެއްޓިފައެވެ. ކޮންމެ ދުވަހަކުވެސް އެތައްސަތޭކަ ބަޔަކު، މިބައްޔަށް ޕޮޒިޓިވްވެ، އަދި އެތައްބައެއްގެ ފުރާނަ މިވަނީ ނުރައްކަލަކަށް ހުށަހެޅިފައެވެ. އަދި މި ބަލީގައި މީހުން މަރުވަމުންދާ ނިސްބަތް މިވަނީ އެތައް ގުނައަކަށް އިތުރުވެގެން ގޮސްފައެވެ.

ރާއްޖޭގައި ކޯވިޑްގެ ނުރައްކާ އިންތިހާއަށް އިތުރުވެގެން ދާއިދިއުން ހަމައެކަނި ގުޅި ލާމެހިގެންދަނީ، ލޯކަލް ކައުންސިލް އިންތިޚާބާއި އެކަނި ކަމުގައި ނުވިނަމަވެސް، އެޗްޕީއޭއިން ފިޔަވަޅުތަކަށް ބޮޑެތި ލުއިތައް ދޭން ފަށާފައިވަނީ ލޯކަލް ކައުންސިލް އިންތިޚާބާ ދިމާކޮށެވެ.

އަދި އެޗްޕީއޭގެ މިނިންމުންތަކަށް ސިޔާސީ ނުފޫޒު ފޯރާފައިވާ ކަމުގެ އެތަކެއް ތުހުމަތުތަކެއް ގިނަ ބަޔަކު އޭރުއްސުރެ ކޮށްފައިވާއިރު، މިއަދު ގައުމަށް ކުރިމަތިވެފައި މިވާ ބޮޑެތި ގޮންޖެހުންތަކުގައި، ބަޔަކު ސިޔާސީގޮތުން ކުރިފަސް ހޯދުމަށް ގުރުބާންކުރި އެތައްކަމެއްގެ ދައުރު އޮތް ކަމުގައި ދަންނަވަން ޖެހެއެވެ.

މިއީ އިންތިހާއަށް ހިތާމަހުރި ކަމެކެވެ. ރައްޔިތުންނަށް ނަމޫނާ ދައްކަވަންޖެހޭ އެތައް ބަޔަކު، ވަގުތާއި ހާލަތުގެ ނާޖާއިޒު ފައިދާ ނަގާ، ހަމައެކަނި ސިޔާސީ ވިސްނުމުގައި ކުރިޔަށް ދާދިއުމަކީ ހައްލު ހޯދަން ޖެހިފައިވާ ބޮޑު މައްސަލައެކެވެ.

ސިޔާސީ ކުޅިވަރު ހުންނަންވާނީ، ކޮންމެވެސް ހައްދެއްގެ ތެރޭގައެވެ. ސިޔާސީ މަސްލަހަތުގެ މައްޗަށް ގައުމު އިސްކުރެވެން އެބަޖެއެވެ. އެހެންނޫނީ އަދިވެސް ގައުމުގެ ހާލަތު ދާނީ ދަށްވަމުންނެވެ. ބިކަ ވެގެންދާނީ ރައްޔިތުންނެވެ.