މުޅިން އަލަށް ފަށަން މަސައްކަތްކުރި ޔޫރަޕިއަން ސުފަ ލީގުގައި ބާސެލޯނާ އާއި ރެއާލް މެޑްރިޑްގެ އިތުރުން ޔުވެންޓަސް ބައިވެރިވެފައިވާތީ އެ ޓީމްތަކާ ދެކޮޅަށް ފިޔަވަޅު އެޅުމަށް ކުރަންޖެހޭ މަސައްކަތްތައް ޔޫރަޕްގެ ފުޓްބޯޅައިގެ މައި އިދާރާ ޔޫއެފާ އިން ފަށައިފިއެވެ.
މިދިޔަ އޭޕްރީލް މަހުގެ 18 ވަނަ ދުވަހު ސުޕަ ލީގު އިއުލާންކުރީ ފައުންޑާ 12 ކުލަބަކާއެކުއެވެ. އޭގެ ތެރޭގައި ހިމެނުނީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި، ލިވަޕޫލާއި، ޗެލްސީ އާއި، މެންޗެސްޓާ ސިޓީ އާއި، އާސެނަލް އަދި ޓޮޓެންހަމް ހޮޓްސްފާ އާއި، ސްޕެނިޝް ލީގުގެ ރެއާލާއި، ބާސާ އަދި އެތުލެޓިކޯ މެޑްރިޑުގެ އިތުރުން އިޓާލިއަން ލީގުގެ އިންޓަ މިލާނާއި، އޭސީ މިލާން އަދި ޔުވެންޓަސްއެވެ.
މި ލީގު ވުޖޫދުވިތާ މާގިނައިރުތަކެއް ނުވަނީސް ކުލަބުތަކުގެ ސަޕޯޓަރުންގެ ފާޑުކިޔުންތަކާއި، އެހެނިހެން ޕްރެޝަރުތަކާ ހެދި ބައެއް ކުލަބުތަކުން ވަނީ ލީގުން ވަކިވެފައެވެ. އެގޮތުން ސުޕަ ލީގު ދޫކޮށްލިކަން އެންމެ ފުރަތަމަ ރަސްމީކޮށް އިއުލާނުކުރި ކްލަބަކީ ސިޓީ އެވެ. އޭގެ ފަހުން ދެން އޮތް އިނގިރޭސި ފަސް ކްލަބުވެސް ވަނީ މުބާރާތުން ވަކިވިކަން އިޢުލާންކޮށްފައެވެ.
ޔޫއެފާއިން އިއްޔެ ނެރުނު ބަޔާނެއްގައި ބުނެފައިވަނީ ޔޫއެފާއިން ކަނޑައަޅައިފައިވާ ގާނޫނީ ހަމަތަކާއި ތިން ކްލަބުން ހިލާފުވެފައިވާކަމަށް ބެލެވޭތީ އެ ކްލަބްތަކާ މެދު ފިޔަވަޅު އެޅުމަށް ކުރަންޖެހޭ މަސައްކަތްތައް މިހާރު ފަށައިފައިވާ ކަމަށެވެ. މި މަސައްކަތް ޔޫއެފާއިން ފަށައިފައިވަނީ ސުލޫކީ އަދި އަހްލާގީ މައްސަލަތައް ބަލާ އެ އިދާރާގެ އިންސްޕެކްޓަރުން ކަމާ ގުޅޭގޮތުން ހިންގި ތަހުގީގަކަށް ފަހު ކަމަށެވެ.
ސުޕަ ލީގުން ވަކި ނުވެ ތިބި ތިން ޓީމަށް ހަރުކަށި އަދަބު ދޭނެ ކަމަށް ޔޫއެފާ އިން ތަކުރާރުކޮށް ބުނެފައިވާ އިރު، ޔޫއެފާ އިން ދޭނެ ވަކި އަދަބެއް އަދި އިއުލާން ކޮށްފައެއް ނުވެއެވެ.
ކޮމެންޓު ފޮނުވާ