ޖަޕާނުގެ ޓޯކިޔޯގައި ޖުލައި މަހު ފަށަން ތާވަލުކޮށްފައިވާ އޮލިމްޕިކްސްގައި ވާދަކުރުމުގެ ފުރުސަތު ގައުމީ ސްވިމިން ޓީމުގެ އައިޝަތު ޝައުސަން އާއި އަލީ އިމްއާން ހޯދައިފި އެވެ.
އާންމު ގޮތެއްގައި އޮލިމްޕިކްސްގައި ވާދަކުރާ ފެތުންތެރިންގެ ނަންތައް މުބާރާތައް ފޮނުވުމުގެ ކަންތައްތައް ކުރިއަށް ގެންދާނީ ދުނިޔޭގެ ސްވިމިން މައި ފެޑެރޭޝަން ފީނާ އިންނެވެ. ފީނާ އިން ފެތުންތެރިން ހޮވަނީ އެ އިދާރާއިން ކަނޑައަޅާފައިވާ އުސޫލުތަކަށް ފެތޭ މުބާރާތްތަކުގައި ވާދަކޮށް އެންމެ ރަނގަޅަށް ޕާފޯމްކުރާ ބައިވެރިން ބަަލައިގެންނެވެ. އެކަމަކު މިދިޔަ އަހަރު ކޮވިޑް-19އާ ހެދި ބައިނަލްއަގުވާމީ މުބާރާތްތައް ކުރިޔަށް ނުގެންދެވޭތީ ހާއްސަ އުސޫލުތަކެއް މި ފަހަރުގެ އޮލިމްޕިކްސް އަށް ކަނޑައެޅީ އެވެ.
ފެތުންތެރިން ހޮވާފަައިވަނީ މިދިޔަ އެޕްރީލް މަހުގެ 23 ން މެއި މަހުގެ ފަސް ވަނަ ދުވަހުގެ ނިޔަލަށް ބޭއްވުނު ޓްރަޔަލްގެ ނަތީޖާތަކަށް ބަލައިގެންނެވެ. ސައުޝަން އަށް 2997 ޕޮއިންޓް ލިބުނުއިރު، އައިޝަތު ސާޖިނާ އަށް ލިބުނީ 2905 ޕޮއިންޓެވެ. އިމްއާން ވަނީ 3140 ޕޮއިންޓް ހޯދައިފަ އެވެ. އޭނާއާ ވާދަކުރި މުބާލް އައްޒާމަށް ލިބުނީ 3024 ޕޮއިންޓެވެ.
ރާއްޖޭގައި ތަމްރީން ފުރިހަމަކުރަމުން އަންނަ ފެތުންތެރިއަކީ ސައުޝަން އެވެ. އޭނާ އަކީ ބައިނަލްއަގުވާމީ މުބާރާތްތަކުގައި ތަޖުރިބާ ބޮޑު ފެތުންތެރިއެކެވެ. އޭނާގެ ތަމްރީންތަކަށް ވެސް ވަނީ އަސަރުކޮށްފަ އެވެ. އެންމެ ފަހު ފަހަރެކޭ އެއްގޮތަށް މި ފަހަރުގެ އޮލިމްޕިކްސް އިންވެސް ރާއްޖެ އަށް ފުރުސަތު ލިބިފައިވަނީ އެތުލެޓިކްސް އާއި ފެތުމަށެވެ.
އެންމެ ފަހުން 2016 ވަނަ އަހަރު ރިއޯ ޑި ޖަނެއިރޯގައި ބޭއްވި އޮލިމްޕިކްސްގައި ރާއްޖޭގެ ދިދަ އުފުލީ ފެތުންތެރިޔާ އައިމިނަތު ސަޖަން އެވެ. ދެން އޮލިމްޕިކްސްގައި ބައިވެރިވީ ފިރިހެން ފެތުންތެރިޔާ ނިޝްވާން އިބްރާހިމާއި ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު އަދި އަފާ އިސްމާއިލް އެވެ.
އެތުލެޓިކްސް އިން ފޮނުވަން ނިންމާފައިވާ ދުވުންތެރިން ކަނޑައަޅާނީ އަންނަ މަހު ބާއްވާ ޓައިމް ޓްރަޔަލުންނެވެ. އެ ޓްރަޔަލް އަށް ކަނޑައަޅާފައިވާ ހަ ދުވުންތެރިންނަކީ އެންމެ ފަހުން އޮލިމްޕިކްސްގައި ދުވެ ރަނގަޅު ކުރިއެރުމެއް ހޯދި ސާއިދުގެ އިތުރުން އިބާދުﷲ އާދަމް، އަހްމަދު ނަޖްދާން އަބްދުﷲ އާއި ކުރިއެރުން ހޯދަމުން އަންނަ އަންހެން ދުވުންތެރިޔާ އައިޝަތު ހިމްނާ ހަސަން، އައިޝަތު ޝަބާ ސަލީމް އަދި މަރްޔަމް ރޫޔާ އަލީ އެވެ.
ކޮމެންޓު ފޮނުވާ