މެންޗެސްޓާ ސިޓީއަށް ކުޅެމުން އަންނަ އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ އާއި ލިޔޯނަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި ބާސެލޯނާއަށް ބަދަލުވާން އެއްބަސްވެފައިވާ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން ދާދި ފަހުން އަގުއޭރޯ ވަނީ ސްޕެއިނުގައި ބާސާއަށް ބަދަލުވާ ގުޅޭ ގޮތުން މަޝްވަރާ ބައްދަލުވުންތަކެއް ބާއްވާފައެވެ. އަދި މި މަޝްވަރާތަކަށްފަހު ބާސާއާއެކު ދެ އަހަރުގެ އެއްބަސްވުމެއްގައި ސޮއިކުރަން އަގުއޭރޯ ނިންމާފައިވާ ކަމަށް ރިޕޯޓުތައް ބުނެއެވެ. އަދި ރަސްމީކޮށް އެކަން އިއުލާންކުރާނީ މި މަހުގެ 29 ވަނަ ދުވަހު ސިޓީން ކުޅޭ ޔުއެފާ ޗެމްޕިއަންސް ލީގު ފައިނަލް މެޗަށްފަހު ކަމަށް ރިޕޯޓުތައް ބުނެއެވެ.
އަގުއޭރޯ ސިޓީއާއެކު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެހެންކަމުން އެއްބަސްވުން އާކުރުމުގެ ބަދަލުގައި، ސިޓީ ދޫކޮށްލަން ނިންމާފައިވާކަން ދާދި ފަހުން އަގުއޭރޯ ވަނީ ހާމަކޮށްފައެވެ. ޑީޕާއިވެސް ބާސާއަށް ބަދަލުވާއިރު، އޭނާއަށް ބާސާއިން ދޭއް ނުވަތަ ތިން އަހަރުގެ އެއްބަސްވުމެއް ހުށަހަޅާފައިވާ ކަމަށް ރިޕޯޓުތައް ބުނެއެވެ. ޑިޕާއި އަކީ ބާސާގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. ކޫމަނުގެ އެދުމުގެ މަތިން ބާސާއިން މި ނިމުނު ޓްރާންސްފާގައިވެސް ޑިޕާއި ހޯދުމަށް ވަނީ މަސައްކަތް ކޮށްފައެވެ.
ބާސާއި އަންނަ ސީޒަނަށް އަގުއޭރޯ އާއި ޑިޕާއި ގެންނައިރު، އެ ޓީމުން ވަނީ މިދިޔަ ސީޒަނުގައި އުރުގުއޭގެ ފޯވާޑް ލުއިސް ސުއަރޭޒް އެތުލެޓިކޯ މެޑްރިޑަށް ވިއްކާލާފައެވެ.
ކޮމެންޓު ފޮނުވާ