ސްޕެނިޝް ލީގުގެ ފަހު މެޗުގައި ހޮނިހިރު ދުވަހުގެރޭ އެއިބާއާ ދެކޮޅަށް ބާސެލޯނާ ކުލުނު މެޗުގައި ނުކުޅެ، ޗުއްޓީއަކަށް ދާން އެ ޓީމުގެ ކެޕްޓަން ލިއޮނެލް މެސީ ނިންމައިފިއެވެ.
މި ސީޒަން ނިމުމުން ހިލޭ ޓްރާންސްފާއެއްގެ ދަށުން ކުލަބު ބަދަލުކުރުމުގެ ފުރުސަތު މެސީއަށް ލިބޭއިރު، މިދިޔަ އަހަރުގެ ހޫނު މޫސުމުގެ ޓްރާންސްފާ ބާޒާރުގައި މެސީ ވަނީ ބާސާ ދޫކޮށްލަން ނިންމާފައެވެ. އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެ ފަހަރު އެއްބަސްނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް މި ސީޒަނުގައި ބާސާގައި މަޑުކޮށްފައެވެ. މެސީ އެއިބާއާ ދެކޮޅަށް ކުޅުނުު ބާސާގެ ޓީމުގައި ބައިވެރިނުވަން އެދުނީ އަމިއްލައަށެވެ.
މެސީއަށް އެ ހުއްދަދިނުމަށް ބާސާގެ ކޯޗު ރޮނާލްޑް ކޫމަން ވަނީ ނިންމާފައެވެ. ރިޕޯޓުތައް ބުނާ ގޮތުން އެއިބާއާ ދެކޮޅަށް ނުކުޅެ ޗުއްޓީއަކަށް ދާން މެސީ ނިންމީ އަންނަ މަހު އާޖެންޓީނާގައި ބާއްވަން ތާވަލުކޮށްފައިވާ ކޮޕާ އެމެރިކާއަށް ތައްޔާރުވުމުގެ ގޮތުންނާއި، މުސްތަގުބަލާ މެދު ގޮތެއް ނިންމުމުގެ ކުރިން އަރާމްކޮށްލުމުގެ ބޭނުމުގައެވެ.
ރިޕޯޓުތައް ބުނާ ގޮތުން މެސީ ހޯދުމަށް ދާދި ފަހުން ޕީއެސްޖީން ވަނީ ބޮޑު މުސާރަ ލިބޭ އެއްބަސްވުމެއް ހުށަހަޅާފައެވެ. އަދި އޭނާ ހޯދަން މެންޗެސްޓާ ސިޓީންވެސް އަންނަނީ މަސައްކަތް ކުރަމުންނެވެ. އެކަމަކު ސްޕެއިނުގެ މީޑިއާތަކުން ރިޕޯޓުކުރާ ގޮތުގައި މެސީގެ ވިސްނުން ހުރީ 2023 ވަނަ އަހަރުގެ ނިޔަލަށް ބާސާގައި މަޑުކުރުމަށެވެ. އަދި ބާސާގެ އައު ރައީސް ޖޮއާން ލަޕޯޓާއާއެކު އެއްބަސްވުން އާކުރުމާ ގުޅޭ ގޮތުން މެސީ ވަރަށް އަވަހަށް މަޝްވަރާކުރާނެ ކަމަށްވެސް ރިޕޯޓުތައް ބުނެއެވެ.
ކޮމެންޓު ފޮނުވާ