އިސްރާއީލުން 11 ދުވަސް ވަންދެން ގާޒާއަށް ދެމުންދިޔަ އުދުވާނީ ހަމަލާތައް ހުޓާލުމަށް އެއްބަސްވުމާއުއެކު، ދުނިޔޭގެ އެކި ގައުމުތަކުން ގާޒާއަށް އިންސާނީ އެހީތެރިކަން ފޯރު ކޮށްދޭން ފަށައިފިއެވެ.
މިގޮތުން ގާޒާއަށް ފޯކޮށްދިން އިންސާނީ އެހީތެރިކަމުގެ އެންމެ ފުރަތަމަ ގާފިލާ ގާޒާއަށް ވަދެފައިވަނީ ހަމަލާ ބަދަލުކުރުން ހުއްޓާލިތާ މަދު ގަޑިއިރުތަކެއްގެ ތެރޭގައެވެ.
އިސްރާއީލުން ގާޒާއަށް ދީފައިވާ ވަރުގަދަ ހަމަލާތަކުގައި އެތަކެއް އިމާރާތްތަކެއް ބިމާ ހަމަވެ، ފަލަސްތީނުގެ އެތަކެއް ހާސް ރައްޔިތުންނެއް ވަނީ އަމިއްލަ ގެދޮރު ދޫކޮށް ދާންޖެހިފައެވެ. އަދި ހަމަލާ ބަދަލުކުރުން ހުއްޓާލުމާއެކު، އަމިއްލަ ގެދޮރުން ބޭރުވާންޖެހުނު މީހުން އެބުރި ގާޒާއަށް އައިސް، ދިރިއުޅޭނެ ގޮދޮރު ނެތުމުގެ ސަބަބުން އެތައް ބަޔަކަށް ވަނީ ވަގުތީ ބޯހިޔާވަހިކަންވެސް ހަމަޖައްސަން މަޖުބޫރު ވެފައެވެ.
ބައިނަލް އަގުވާމީ ފަރާތްތަކުން ބުނަމުންދަނީ، ގާޒާ އަލުން އާރާސްތުކުރުމަށް އެތައް އަހަރެއް ހޭދަވެގެން ދާނެކަމުގައެވެ.
ދުނިޔޭގެ ސިއްހަތު ޖަމިއްޔާ WHOއިން ވަނީ، ބަލިމީހުން ގާޒާއިން ބޭރަށް ގެންދެވޭ ޚާއްސަ އިންތިޒާމެއް ހަމަޖެއްސުމަށް ގޮވާލާފައެވެ.
އިސްރާއީލުން ގާޒާއަށް ދިން ހަމަލާތަކުގައި ފަލަސްތީނުގެ 250 މީހަކުވަނީ ޝަހީދު ވެފައެވެ. މި ހަމަލާ ބަދަލުކުރުންތައް ހުއްޓާލަމުން އިސްރާއީލާއި ހަމާސްއިންވެސް ވަނީ ހަގުރާމާގައި ކާމިޔާބު ލިބިފައިވާ ކަމަށް ބުނެފައެވެ.
އުތުރު އިސްރާއީލުގައިވެސް ވަނީ، ހަމަލާ ބަދަލުކުރުން ހުއްޓާލުމަށް އެއްބަސްވުމާއި ގުޅިގެން އުފާ ފާޅުކޮށްފައެވެ. އެހެންނަމަވެސް ގިނަބަޔަކު ގަބޫލުކުރާ ގޮތުގައި، އަލުން ހަމަނުޖެހުންތައް ފެށިގެން ދިއުމަކީ މަދު ދުވަސްކޮޅެއްގެ ކަމެކެވެ.
ޔޫއެން އޭޖެންސީ އޮފް ޕަލެސްޓީނިއަން ރެފިއުޖީސް (Unwra)އިން ބުނެފައިވަނީ، މިވަގުތު އެންމެ އިސްކަމެއް ދެވެމުންދަނީ، ގެދޮރު ނެތިފައި ތިބި މީހުން ދެނެގަނެ އެމީހުންނަށް އެހީތެރިކަން ފޯރު ކޮށްދިނުމަށެވެ. އަދި ގެދޮރު ނެތިފައިތިބި މީހުންނަށް އެހީތެރިކަން ފޯރުކޮށްދިނުމަށް މިހާރުން މިހާރަށްވެސް 38 މިލިއަން ޑޮލަރުގެ އެހީތެރިކަން ބޭނުންވާ ކަމަށްވެސް އެ އޭޖެންސީން ބުނެފައި ވެއެވެ.
ގާޒާގެ ހައުސިންގެ މިނިސްޓްރީން ބުރާސްފަތި ދުވަހު ބުނެފައިވަނީ، ގާޒާގެ 1،800 ގެއެއް ވަނީ، މީހުންމ ދިރިއުޅެން ކަމުނުދާ ގެތަކުގެ ގޮތުގައި ފާހަގަ ކުރެވިފައެވެ. އަދި އިތުރު 1،000 ގެއެއްވަނީ އެއްކޮށް ބިމާ ހަމަކުރެވިފައެވެ.
