އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ކުރިޔަށް ދާ ހަމަލާ ބަދަލުކުރުންތައް ހުއްޓުމެއް ނެތި ކުރިޔަށް ދާތާ 8 ދުވަސްފަހުން، އެމެރިކާގެ ރައީސް ޖޯ ބައިޑްން އެންމެ ފަހުން، ހަމަލާ ބަދަލުކުރުން ހުއްޓާލުމަށް ދެފަރާތަށްވެސް ގޮވާލައްވައިފިއެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި ފޯނުން ގުޅުއްވާ ވާހަކަ ދައްކަވަމުން ބައިޑްން ވިދާޅުވެފައިވަނީ، ހަމަލާ ބަދަލުކުރުން ހުއްޓުމަކަށް ގެނައުމަށް އެމެރިކާއިން ދަނީ މިސްރާއިއެކު މަސައްކަތް ކުރަމުންނެވެ.
އެހެންނަމަވެސް، އެމެރިކާއިން މިއަދުވެސް ވަނީ، ހަމަލާ ބަދަލުކުރުން ހުއްޓުމަކަށް ގެނެސް، ހަމަނުޖެހުންތައް ހުއްޓާލުމަށް ދެފަރާތަށް ގޮވާލުމަށް ޔޫއެންއިން ބަޔާނެއް ނެރުން ހުއްޓުމަކަށް ގެނެސްފައެވެ. އެމެރިކާއިން މިހާތަނަށް ބުނަމުން އައިސްފައިވަނީ، ދެފަރާތަށްވެސް އެންމެ މަސްލަހަތު ހުރި ގޮތަކީ، ޔޫއެން މެދުވެރި ނުކޮށް، ސީދާ ޑިޕްލޮމަސީއަށް ދިއުމެވެ.
ފަލަސްތީނުގެ ހަމާސް ޖަމާއަތާއި އިސްރާއީލާއި ދެމެދު ހިގަމުންދާ ހަމަނުޖެހުންތައް ހުއްޓުމެއް ނެތި ކުރިޔަށްދާތާ މިހާރު 2 ހަފްތާ ފާއިތުވެގެން ގޮސްފައިވާއިރު، ދެފަރާތުންވެސް ހަމަލާ ބަދަލުކުރުން ހުއްޓާލުމުގެ އެއްވެސް އިޝާރާތެއް އަދި މިހާތަނަށް ލިބިގެން ގޮސްފައެއް ނުވެއެވެ.
އިސްރާއީލް އަސްކަރިއްޔާއިން ބުނެފައިވަނީ، ރޭގެ ވަގުތުތަކުގައިވެސް ގާޒާއިން ގިނަ އަދަދެއްގެ ރޮކެޓްތަކެއް އިސްރާއީލުގެ އަވަށްތަކާ ދިމާލަށް އުދުއްސާލާފައިވާ ކަމަށެވެ. އަދި ރައްދުގައި އިސްރާއީލުންވަނީ، އަންގާރަ ދުވަހު ހެދުނު އަނެއްކާވެސް ގާޒާއަށް އަމާޒުކޮށް ވަރަގަދަ އަސްކަރީ ހަމަލާތަކެއް ދީފައެވެ.
ގާޒާގެ ހަލްތު މިނިސްޓްރީން ހާމަ ކޮށްފައިވާ ގޮތުގައި މިހާތަނަށް އައިއިރު ގާޒާއިން ފަލަސްތީނުގެ 212 މީހަކު ވަނީ އިސްރާއީލުގެ އުދުވާނީ ހަމަލާތަކުގައި ޝަހީދު ވެފައެވެ. މީގެތެރޭގައި ޝަހީދުވެފައިވާ ކުޑަކުދިންނާއި އަންހެނުންގެ އަދަދު 100އަށް އަރައެވެ. އިސްރާއީލުގެ ސިއްޙީ އިދާރާތަކުން ހާމަ ކޮށްފައިވާ ގޮތުގައި، އެގަމުގެ 10 މީހަކުވަނީ ހަމާސްގެ ރޮކެޓް ހަމަލާތަކުގައި މަރުވެފައެވެ. މީގެ 2 ކުޑަކުދިން ހިމެނެއެވެ.
ޔޫއެއިން ވަނީ، ފަލަސްތީނުގެ ހަމަނުޖެހުންތަކާ ގުޅިގެން ބާއްވާ ސެކިއުރިޓީ ކައުންސިލްގެ 4 ވަނަ އެމަޖެންސީ ބައްދަލުވުން އަންގާރަ ދުވަހު ބޭއްވުމަށް ހަމަޖައްސާފައެވެ.
