މެޗަކުން ބަލިނުވެ ރޭންޖާސް ޗެމްޕިއަންކަން ހޯދައިފި

ސްކޮޓްލެންޑް ލީގުގައި 4-0 އިން އެބަޑީން ބަލިކޮށް ސްޓީވެން ޖެރާޑްގެ ކޯޗުކަމުގައި ކުޅޭ ރޭންޖާސް އިން މެޗަކުން ބަލިނުވެ ލީގުގެ ޗެމްޕިއަންކަން ހޯދައިފި އެވެ.

ރޭންޖާސް އިން ލީޑުނެގީ ފަސް ވަނަ މިނިޓްގައި އެބަޑީންގެ ޖޯ ލެވިސް އަތުން ބައިކޮޅަށް ވަން ގޯލަކުންނެވެ. މެޗުގެ 34 ވަނަ މިނިޓްގައި ކެމާ ރޫފް ވަނީ ރޭންޖާސް އަށް ލީޑުފުޅާކޮށްދީފަ އެވެ. ރޭންޖާސްގެ ތިން ވަނަ ގޯލު ޖެހީ ވެސް ރޫފް އެވެ. އޭނާ މި ގޯލު ޖެހީ 60 ވަނަ މިނިޓްގަ އެވެ. މެޗު ނިމެން ދެ މިނިޓަށް ވެފައި ވަނިކޮށް ރޭންޖާސްގެ ފަހު ގޯލު ޖެހީ އިނގިރޭސި ގިނަ ކްލަބްތަކަކަށް ކުޅުނު ޖަމެއިން ޑެފޯ އެވެ. މި މޮޅާ އެކު ރޭންޖާސް އިން ވަނީ މި ފަހަރު ލީގުގައި އަމިއްލަ ދަނޑުގައި ކުޅުނު 19 މެޗުން ވެސް މޮޅުވެފަ އެވެ.

ޖެހިޖެހިގެން 10 އަހަރު ސްކޮޓްލެންޑްގެ ޗެމްޕިއަންކަން ހޯދަން ނުކުތް ސެލްޓިކް ހުއްޓުވައި ރޭންޖާސް އިން އެއް ވަނައިގައި ލީގު ނިންމާލީ 38 މެޗުން 102 ޕޮއިންޓާ އެކު އެވެ. ދެ ވަނައިގައި އޮތް ސެލްޓިކަށް 38 މެޗުން ލިބުނީ 77 ޕޮއިންޓެވެ. މިއީ ސެލްޓިކާ އެކު 2016-2017 ވަނަ އަހަރުގެ ސީޒަނުގައި މެޗަކުން ބަލިވެ ބްރެންޑަން ރޮޖާސް ސްކޮޓްލެންޑްގެ ލީގު ޗެމްޕިއަންކަން ހޯދި ފަހުން ސްކޮޓިޝް ޕްރިމިއާ ލީގުގެ ތަށި މެޗަކުން ބަލިވެ އެހެން ޓީމަކުން އުފުލާލި ފުރަތަމަ ފަހަރެވެ.

ޖެރާޑްގެ ކޯޗުކަމުގައި ރޭންޖާސް އިން ސްކޮޓްލެންޑްގެ ޗެމްޕިއަންކަން ހޯދިއިރު، އެ ޓީމުން އެންމެ ފަހުން ލީގު ކާމިޔާބުކުރީ 2011 ވަނަ އަހަރު އެވެ. ރޭންޖާސް އިން ލީގު ކަށަވަރުކުރީ ބާކީ ހަ މެޗު އޮއްވައި މިދިޔަ މާޗް މަހު އެވެ.