ޖަރުމަން ކަޕުގެ ޗެމްޕިއަންކަން ޑޯޓްމަންޑް ހޯދައިފި

އާރްބީ ލައިޕްޒީގް ބަލިކޮށް ޖަރުމަން ކަޕުގެ ޗެމްޕިއަންކަން ބޮރޫޝިއާ ޑޯޓްމަންޑުން ހޯދައިފިއެވެ.

ޑޯޓްމަންޑުން ޗެމްޕިއަންކަން ހޯދީ ފައިނަލުގައި 1-4 ގެ ނަތީޖާއަކުން ލައިޕްޒީގް ބަލިކޮށްގެންނެވެ.

ފައިނަލް މެޗު ފަށައިގެން ފުރަތަމަ ހާފުގައި ޑޯޓްމަންޑުން ވަނީ ތިން ލަނޑު ޖަހާފައެވެ. އެގޮތުން މެޗު ފަށައިގެން މާގިނައިރުތަކެއް ނުވަނީސް ޖޯޑަން ސަންޗޯ ވަނީ ލަނޑެއް ޖަހާ އެޓީމަށް ލީޑު ނަގައިދީފައެވެ. ސަންޗޯ މި ލަނޑު ޖަހާފައިވަނީ މެޗުގެ 5 ވަނަ މިނެޓުގައެވެ. އަދި މެޗުގެ 28 ވަނަ މިނެޓުގައި އާލިން ބްރައުޓް ހާލަންޑް ވަނީ ޑޯޓްމުންޑުގެ ލީޑު ފުޅާކޮށްދީފައެވެ. ޑޯޓްމަންޑުން ޖެހި ތިންވަނަ ލަނޑު ފުރަތަމަ ހާފްގެ އިތުރު ވަގުތުގެ ތެރޭގައި އެޓީމަށް ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި ސަންޗޯއެވެ. މިއީ ސަންޗޯ މި މެޗުގައި ޖެހި ދެވަނަ ލަނޑެއެވެ.

ދެވަނަ ހާފް ފަށައިގެން 71 ވަނަ މިނެޓުގައި ލައިޕްޒީގުން ވަނީ ލަނޑެއް ޖަހައި، ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑަނިއެލް އޮލްމޯއެވެ. ނަމަވެސް 87 ވަނަ މިނެޓުގައި ހާލަންޑް ވަނީ ޑޯޓްމަންޑުގެ ހަތަރު ވަނަ ލަނޑު ޖަހާ އެޓީމަށް ޗެމްޕިއަންކަން ކަށަވަރުކޮށްދީފައެވެ. މިއީ މި މެޗުގައި ހާލަންޑްވެސް ޖެހި 2 ވަނަ ލަނޑެއެވެ.

މިއީ ޑޯޓްމަންޑުން މި މުބާރާތުގެ ޗެމްޕިއަންކަން ހޯދި ފަސް ވަނަ ފަހަރެވެ. އެ ޓީމުން އެންމެ ފަހުން މި މުބާރާތުގެ ތަށި އުފުލާލީ 2017 ވަނަ އަހަރު އެވެ.