ކަކުލަށް ލިބިފައިވާ އަނިޔާ އަކަށް ފަރުވާ ހޯދަމުން އަންނަ ލިވަޕޫލްގެ ނެދަލެންޑްސް ޑިފެންޑަރު ވާޖިލް ވެން ޑައިކް އަންނަ މަހު ފަށާ ޔޫރޯ ފުޓްބޯޅަ މުބާރާތުގައި ނުކުޅެވޭނެ ކަމަށް ބުނެފި އެވެ.
ލިވަޕޫލްގެ ރަސްމީ ވެބްސައިޓަށް ދިން އިންޓަވިއުއެއްގައި ވެން ޑައިކް ބުނީ އެކި ގޮތްގޮތުން ވިސްނުމަށް ފަހު މިއީ އޭނާގެ ރިހެބިލިޓޭޝަނަށް ބޮޑަށް ފޯކަސް ކުރަން ޖެހޭ ވަގުތުކަން އެނގިފައިވާ ކަމަށާއި އެހެންވެ މި ފަހަރުގެ ޔޫރޯ އަށް ނުދާން ނިންމާފައިވާ ކަމަށެވެ. ވެން ޑައިކް ކަކުލުގެ ލިގަމެންޓަށް އަނިޔާވީ މިދިޔަ އަހަރުގެ އޮކްޓޫބަރު މަހު އެވަޓަންއާ ދެކޮޅަށް ލިވަޕޫލް ކުޅުނު މެޗުގަ އެވެ. ވެން ޑައިކް, ޔޫރޯގައި ނުކުޅޭނެކަން އިއުލާނުކޮށްފައި މި ވަނީ އޭނާ ޔޫރޯގައި ކުޅުވުމާ މެދު ލިވަޕޫލާއި ނެދަލެންޑްސްގެ ދެމެދު ކޯޅުމެއް އުފެދިފައިވާ ދަނޑިވަޅެއްގަ އެވެ.
ވެން ޑައިކްގެ ކެޕްޓަންކަމުގެ ދަށުން ނެދަލެންޑަސް ވަނީ ދާދި ފަހުން ޔުއެފާ އިން ފެށި ނޭޝަންސް ލީގުގެ ފައިނަލަށް ދަތުރުކޮށްފަ އެވެ. ފައިނަލުގައި ޕޯޗުގަލް އަތުން ބަލިވީ އެވެ. ޔޫރޯގެ ކޮލިފައިން މެޗުތަކުގައި ވެސް ވެން ޑައިކް ވަނީ މޮޅު ކުޅުމެއް ދައްކައިފަ އެވެ. ސައުތެމްޓަން ދޫކޮށް 2018 ވަނަ އަހަރުގެ ޖެނުއަރީ މަހު ވެން ޑައިކް ލިވަޕޫލަށް ބަދަލުވީ 75 މިިލިއަން ޕައުންޑަށެވެ. މިއީ އޭރު ޑިފެންޑަރަކަށް ދުނިޔޭގެ ރެކޯޑް ފީ އެވެ.
ޗެމްޕިއަންސް ލީގާއި ޕްރިމިއާ ލީގުގެ އިތުރުން ޔުއެފާ ސުޕަ ކަޕް އަދި ކްލަބް ވޯލްޑް ކަޕް ހޯދި އެވެ. މީގެ އިތުރުން ލިވަޕޫލްގައި ވެން ޑައިކް ދެއްކި ކުޅުމުގެ ސަބަބުން ޕްރިމިއާ ލީގާއި ޔޫރަޕްގެ މޮޅު ފުޓްބޯޅަ ކުޅުންތެރިޔާގެ މަގާމު އޭނާ އަށް ވަނީ ލިބިފަ އެވެ. އަދި ފީފާ ބެސްޓް އެވޯޑާއި ބެލޮންޑިއޯ ގަދަ ތިނެއްގެ ތެރޭގައި ހިމެނުނެވެ.
ކޮމެންޓު ފޮނުވާ