ހާއްސަ ޖާޒީއެއްގަ ކުޅެ އިންޓަ މޮޅުވެއްޖެ

އިޓާލިއަން ލީގުގައި އެއް ވަނައިގައި ޗެމްޕިއަންކަން ކަށަވަރުކޮށްގެން އޮތް އިންޓަ މިލާނުން ވަނީ ރޭ 3-1 އިން ރޯމާ ބަލިކޮށްފައެވެ.

ޗެމްޕިއަންކަން ލިބުމުން ހާއްސަ ޖޯޒީއެއްގައި ކުޅުނު އިންޓަ އިން ވަނީ މިރޭގެ މެޗުގައި ފުރަތަމަ ދެ ގޯލު ޖަހައިފަ އެވެ. އެ ޓީމުގެ ގޯލުތައް ކާމިޔާބުކުރީ މާސެލޯ ބްރޮޒޮވިޗާއި މަޓިއަން ވެސީނޯ އެވެ. ހެންރިކް މިކިތާރްޔަން ވަނީ ފުރަތަމަ ހާފު ނިމުމުގެ ކުރިން ރޯމާ އަށް ލަނޑެއް ޖަހައިދީފަ އެވެ. މެޗުގެ އިތުރު ވަގުތުގައި އަޝްރަފް ހަކީމީ ދިން ބޯޅައަކުން މިލާންގެ ފަހު ގޯލު ޖެހީ ރޮމެލޫ ލުކާކޫ އެވެ.

އިންޓަ އަށް 36 މެޗުން ލިބިފައިވަނީ 88 ޕޮއިންޓް ލިބިފަ އެވެ. ދެ ވަނައިގައި އޮތީ ރޭ ބެނެވެންޓޯ އަތުން 2-0 އިން މޮޅުވި އެޓަލަންޓާ އަށެވެ. އެޓަލަންޓާ އާއި ތިން ވަނައިގައި އޮތް މިލާނަށް 36 މެޗުން 75 ޕޮއިންޓް ލިބިފައިވާއިރު، އެޓަލަންޓާ އަށް ކުރި ލިބެނީ ހެޑް ޓު ހެޑް ގަވާއިދުންނެވެ.