ބެޑްމިންޓަން އެސޯސިއޭޝަން އިން މި އަހަރުގެ ކަލަންޑަރު އެކުލަވާލިއިރު ދުނިޔޭގެ ފެޑެރޭޝަން ބީޑަބްލިއުއެފް އިން ރުހުންދީފައިވާ ދެ ބައިނަލްއަގުވާމީ މުބާރާތެއް ބާއްވަން ހިމެނި ނަމަވެސް މިހާރު ރާއްޖޭގެ ހާލަތު މި ބަދަލުވާ ގޮތުން އެ މުބާރާތްތައް ބޭއްވުމާ މެދު އިތުރަށް ވިސްނަން ޖެހިފައިވާ ކަމަށް ބެޑްމިންޓަން އެސޯސިއޭޝަންގެ ރައީސް މޫސާ ނާޝީދު (މޫސަ) ވިދާޅުވެއްޖެ އެވެ.
ރާއްޖޭން ބޭއްވި ފުރަތަމަ ބައިނަލްއަގުވާމީ ބެޑްމިންޓަން މުބާރާތަކީ 2019 ވަނަ އަހަރުގެ ސެޕްޓެމްބަރުގައި މޯލްޑިވްސް ބޭއްވި ފިއުޗާ ސީރީސް އެވެ. އޭގެ ފަހުން އެ އަހަރު ބެޑްމިންޓަން ޗެލެންޖްގެ ނަމުގައި އިތުރު ބައިނަލްއަގުވާމީ މުބާރާތެއް ބޭއްވުމަށް ފަހު އައްޑޫގައި ދެކުުނު އޭޝިއާގެ 21 އަހަރުން ދަށުގެ މުބާރާތް ވެސް ހޯސްޓްކުރި އެވެ. މިއީ މާލެ އިން ބޭރުގައި ބައިނަލްއަގުވާމީ މުބާރާތެއް ހޯސްޓްކުރި ފުރަތަމަ ފަހަރެވެ.
ދުނިޔޭގެ ފެޑެރޭޝަން ބީޑަބްލިއުއެފްގެ ކައުންސިލް މެމްބަރުކަމާއި ބެޑްމިންޓަން އޭޝިއާ އާއި ދެކުނު އޭޝިއާގެ ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ މަގާމު ފުރުއްވަމުން އަންނަ މޫސަ ވިދާޅުވީ ހާލަތު ބަދަލުވަމުން އަންނަ ގޮތަށް ބަލާއިރު އެ ދެ މުބާރާތް ބޭއްވުން ވަރަށް ބޮޑަށް އުނދަގޫވެފައިވާ ކަމަށެވެ.
ބެޑްމިންޓަން އެސޯސިއޭޝަންގެ ކަލަންޑަރުގައި ގައުމީ އަދި ބައިނަލްއަގުވާމީ މުބާރާތްތަކުގެ ގޮތުގައި މި އަހަރަށް 18 މުބާރާތް ހިމަނާފައިވެ އެވެ. އޭގެ ތެރެއިން ތާރީހެއް ފައިނަލް ކޮށްފައި އޮތީ ހަމައެކަނި ދެ އިންޓަނޭޝަނަލް މުބާރާތައް އެކަންޏެވެ. އެއީ އޮކްޓޫބަރު 4-10 އަށް ކުރިއަށް ގެންދާ މޯލްޑިވްސް އިންޓަނޭޝަނަލް ފިއުޗާ ސީރީސް އާއި 11-17 އޮކްޓޫބަރުގައި ބާއްވަން ނިންމި މޯލްޑިވްސް އިންޓަނޭޝަނަލް ސީރީސް އެވެ.
ރާއްޖޭގައި 2010 އިން 2013 އަށް އިންޓަނޭޝަނަލް ބެޑްމިންޓަން މުބާރާތެއް ގަވާއިދުން ކުރިއަށްގެންދިޔަ އެވެ. ދުނިޔޭގެ ރޭންކިން ރަނގަޅު ލެވަލެއްގެ ކުޅުންތެރިން އެ މުބާރާތްތަކުގައި ކުޅުނެވެ. އެ މުބާރާތް 2013 ވަނަ އަހަރު ބޭއްވުމަށް ފަހު ހުއްޓުނީ އެވެ. އެއީ 2014 ވަނަ އަހަރު ކުޅިވަރު އެކުވެނި އިމާރާތަށް ލިބުނު ގެއްލުމެއްގެ ސަބަބުންނެވެ.
ކޮމެންޓު ފޮނުވާ