ޔުނައިޓެޑާއެކު ކަވާނީ ހަދާފައިވާ އެއްބަސްވުން އާކޮށްފި

މެންޗެސްޓާ ޔުނައިޓެޑާއެކު ހަދާފައިވާ އެއްބަސްވުން އެ ޓީމުގެ އުރުގުއޭގެ ތަރި އެޑިންސަން ކަވާނީ އާކޮށްފިއެވެ.

މި ސީޒަނަށްފަހު އޭނާ ދޫކޮށްލަން އުޅޭކަމަށް ވާހަކަތައް ދެކެވުނު ނަމަވެސް ޔުނައިޓެޑާއެކު އޭނާ ހަދާފައިވަނީ އިތުރު އެއް އަހަރުދުވަހުގެ އެއްބަސްވުމެކެވެ. މިދިޔަ އަހަރުގެ ހޫނު މޫސުމުގެ ޓްރާންސްފާ ބާޒާރުގައި އުމުރުން 34 އަހަރުގެ ކަވާނީ ޔުނައިޓެޑާ ގުޅުނީ ހިލޭ ޓްރާންސްފާއެއްގެ ދަށުންނެވެ.

ޔުނައިޓެޑުގެ އެއްބަސްވުން އާކުރުމަށްފަހު ކަވާނީ ބުނީ ޔުނައިޓެޑާ ގުޅުނު ފަހުން އެ ޓީމާއެކު ވަރަށް ގާތް ގުޅުމެއް އުފެދިފައިވާ ކަމަށާއި، އެހެންކަމުން ޔުނައިޓެޑުގައި މަޑުކުރަން ބޭނުންވީ ކަމަށެވެ. އަދި ޔުނައިޓެޑުގެ ސަޕޯޓަރުން ކުރިމަތީ މެޗެއް ކުޅެލުމަކީ ހުވަފެނެއް ކަމަށްވެސް ކަވާނީ ވަނީ ބުނެފައެވެ.

ކަވާނީ އެއްބަސްވުން އާކުރުމުން އެ ޓީމުގެ ކޯޗު ސޯލްޝެއާ އަށް ލިބުނީ ހާއްސަ އުފަލެކެވެ. ސޯލްޝެއާ ބުނީ ކަވާނީ އަކީ އަބަދުވެސް ދަނޑުމަތީގައި ލީޑަޝިޕް ދައްކާ މޮޅު ކުޅުންތެރިއެއް ކަމަށާއި އުއްމީދުކުރާ ހުރިހާ ކަމެއް ކަވާނީގެ ކިބައިން ފެންނަ ކަމަށެވެ. މިއީ ޔުނައިޓެޑަށް ލިބުނު ބޮޑު ހިތްހަމަޖެހުމެއް ކަމުގައިވެސް ސޯލްޝެއާ ފާހަގަކުރި އެވެ.

ކުރިން ނަޕޯލީ އާއި ޕީއެސްޖީ އަށް ކުޅުނު ކަވާނީ މި ސީޒަނުގައި މިހާތަނަށް ކުޅުނު 35 މެޗުން ވަނީ 15 ގޯލު ޖަހައިފަ އެވެ. މީގެ ތެރެއިން އެންމެ ފަހުން ކުޅުނު ހަތް މެޗުގައި ޖެހި އަށް ގޯލު ހިމެނެ އެވެ.