އިސްރާއީލު ސިފައިންނާ ފަލަސްތީނުގެ ރައްޔިތުންނާ ދެމެދު ހިގަމުންދާ ހަމަ ނުޖެހުންތަކުގައި، މިއަދު އަލް-އަޤްސާ މިސްކިތަށް އިސްރާއީލުގެ ސިފައިން ދިން ހަމަލާތަކުގައި ރަބަރު ވަޒަން ބޭނުން ކުރުމުގެ ސަބަބުން ފަލަސްތީނުގެ އެތައް ބަޔަކު ޒަޚަމް ވެއްޖެއެވެ.
އެއޭފްޕީ ނޫސް އޭޖެންސީން ރިޕޯޓު ކޮށްފައިވާ ގޮތުގައި، އަޅުކަން ކުރަން އަލް-އަޤްސާ މިސްކިތައް އެއްވި ފަލަސްތީނުގެ ރައްޔިތުން އެސަރަހައްދުން ދުރަށް ޖެއްސުމަށް އިސްރާއީލު ސިފައިން ވަނީ ސްޓަން ގްރެނޭޑާއި އަދި ކަރުނަގޭސް ބޭނުން ކޮށްފައެވެ.
ފާއިތުވެދިޔަ ދުވަސްތަކުގައި އިރުމަތީ ޖެރޫސެލަމްގައި އިސްރާއީލު ސިފައިންނާ ފަލަސްތީނު ރައްޔިތުންނާ ދެމެދު ދަނީ ބޮޑެތި ހަމަނުޖެހުންތަކެއް ހިގަމުންނެވެ. މުސްލިމުންގެ އެންމެ ބަރާކާތްތެރި އެއް މައްސަރުކަމުގައިވާ ރޯދަ މަހު، ހަމަ ނުޖެހުން ހިގަމުންދާ ސަރަހައްދުތަކުގެ ތެރޭގައި، ޝެއިޚް ޖައްރާއާއި، އަރަބި-އިސްރައީލު މީހުން ދިރިއުޅެމުންދާ އަވަށެއް ކަމުގައިވާ ހައިފާވެސް ހިމެނެއެވެ.
Al Aqsa Mosque clashes, now pic.twitter.com/6dbkA3pLRs
— Local Focus – Security Alerts (@LocalFocus1) May 10, 2021
މިހާރު ހިގަމުންދާ ހަމަނުޖެހުންތައް ފެށިފައިވަނީ، 1967ގެ ހަގުރާމާގައި އިސްރާއީލުން ހިފާފައިވާ އިރުމަތީ ޖެރޫސެލަމްގެ ޝެއިޚް ޖައްރާއިން ފަލަސްތީނު ރައްޔިތުން ބޭރުކުރުމުގެ މަސައްކަތް އިސްރާއީލުން ފެށުމާއި ގުޅިގެންނެވެ.
މުސްލިމުންގެ 3 ވަނައަށް އެންމެ މުގައްދަސް އެއް ތަން ކަމުގައިވާ އަލް އަގުސާ މިސްކިތް ހިމެނޭގޮތުން، އިރުމަތީ ޖެރޫސެލަމްގައި މިހާރު ހިގަމުންދާ ހަަމަނުޖެހުންތަކާ ގުޅޭގޮތުން، ޔޫއެންގެ ސުކިއުރިޓީ ކަައުންސިލުން ސިއްރު ބައްދަލުވުމެއް މިއަދު ބޭއްވުމަށް ވަނީ ހަމަޖެހިފައެވެ.
ބައެއް ޑިޕްލޮމޭޓުން ވިދާޅުވެފައިވާ ގޮތުގައި، ސެކިއުރިޓީ ކައުންސިލްގެ މި ބައްދަލުވުން ބޭއްވުމަށް އެދިފައިވަނީ، ޔޫއެން 15 މެމްބަރުންގެ ކައުންސިލްގެ ތިންބައި ކޮށްފަ ދެބައިގެ މެމްބަރުންނެވެ. މީގެތެރޭގައި ހިމެނެނީ، ޓިއުނީޝިއާ، އަޔަރލޭންޑް، ޗައިނާ، އެސްޓޯނިއާ، ފްރާންސް، ނޯވޭ، ނިގަރ، އެސްޓީ ވިންސެންޓް، ގްރެނެޑަިންސް އަދި ވިއެޓްނާމުންނެވެ.
