އައްޑޫ މާރާމާރީ: ކޯޓް އަމުރެއްގެ ދަށުން މީހަކު ހައްޔަރުކޮށްފި

އައްޑޫގައި 2 ގްރޫޕަކުން ހިނގި މާރާމާރީގައި ގުޅިގެން ކޯޓް އަމުރުގެ ދަށުން މީހަކު ފުލުހުން ހައްޔަރުކޮށްފި އެވެ.

ފުލުހުން ވިދާޅުވީ މިމައްސަލާގައި ހައްޔަރުކޮށްފައިވަނީ އުމުރުން 25 އަހަރުގެ ދިވެހި ފިރިހެއްނެއްކަމަށެވެ. އައްޑޫގައި ހިނގި މިމާރާމާރީގައި ޒުވާނެއްގެ އަތުގެ އިނގިލިތައް ބުރިކޮށްލައި އޭނާގެ ގައިގެ އެކިތަންތަނަށް ވަނީ ހަމަލާދީފައެވެ.

މަންޒަރު ދުށް މީހަކު ބުނި ގޮތުގައި ވަޅިން ހަމަލާދީ އެ ޒުވާނާގެ އަތުގެ ދެ އިނގިލި ވަނީ ބުރިކޮށްލައިފައެވެ. އެމީހާގެ އުނަގަނޑާއި ފަޔަށާއި ބުރަކައްޓަށް ވެސް ހަމަލާދީފައިވާ ކަމަށްވެއެވެ. އަދި އެމީހާގެ ފައި ވެސް އޮތީ ވަރަށް ބޮޑަށް ޒަހަމްވެފައެވެ.

ފުލުހުން ވިދާޅުވީ އައްޑޫސިޓީ ހިތަދޫގައި 2 ގްރޫޕްއެއް ދެމެދުގައި ހިނގި މާރާމާރީއެއްގައި ތޫނު އެއްޗަކުން ހަމަލާދީ މީހަކު ޒަހަމް ކޮށްލާފައިވާ މައްސަލައެއް ރިޕޯޓް ކޮށްފައިވަނީ މިމަހުގެ 18 ވަނަ ދުވަހުގެރޭ 12:28 ކަންހާއިރު ކަމަށެވެ.

މިމާރާމަރީގައި އަނިޔާލިބުނު މީހާއަށް އައްޑޫ އީކުއަޓޯރިއަލް ހޮސްޕިޓަލުގައި ފަރުވާދެމުން އަންނަ ކަމަށެވެ. އަނިޔާލިބުނު މީހާއަށް ސީރިއަސް އަނިޔާތަކެއް ވެފައިވެއެވެ. މިމައްސަލަ ފުލުހުން ތަހުގީގް ކުރަމުންދާކަމަށް ވަނީ ވިދާޅުވެފައެވެ.