ރާއްޖޭގެ އެކި ސަރަހައްދުތަކުން 16 ރަށެއްގައި ފެންވަރު ރަނގަޅު ޓާފް ފުޓްބޯޅަ ދަނޑު އަޅަން ފުޓްބޯޅަ އެސޯސިއޭޝަނުން ނިންމައިފިއެވެ.
މިކަން ހާމަކުރެއްވީ މިއަދު އެފްއޭއެމް އާއި ޔޫތް މިނިސްޓްރީ ގުޅިގެން ރަސްމީ ފުޓްބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލްއެވެ.
ރާއްޖޭގައި 100 ބޮޑު ފުޓްބޯޅަ ދަނޑު އެޅުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ރިޔާސީ ވަޢުދެކެވެ. މިހާރުވެސް ރާއްޖޭގައި 75 ފުޓްބޯޅަ ދަނޑެއްގެ މަސައްކަތް ކުރިޔަށްދާކަމަށް ޔޫތް މިނިސްޓްރީން މަޢުލޫމާތުދެއެވެ.
ޔޫތް މިނިސްޓަރ އަޙުމަދު މަހްލޫފްވެސް ބައިވެރިވެވަޑައިގެންނެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، ސަރުކާރުގެ ސިޔާސަތާއި އެއްގޮތަށް 100 ރަށެއްގައި ދަނޑު އަޅަމުންދާތީ އެކަމަށް އެހީވުމުގެ ގޮތުން އެފްއޭއެމުގެ ހަރަދުގައި 16 ރަށެއްގައި ޓާފް ދަނޑު އެޅުމަށް ނިންމާފައިވާ ކަމަށެވެ. އަދި އަދި މި ކޮންމެ ދަނޑަކީވެސް ފީފާ އެޕްރޫވްޑް ޓާފް ދަނޑެއް ކަމަށާއި، އަދި މި ދަނޑުތައް ވަށައިގެން ފެންސް ޖެހިގެންދާއިރު، ރޭގަނޑު ކުޅެވޭ ގޮތަށް ލައިޓް ހަރުކުރުމާއި، ދަނޑުގައި އިލެކްޓްރޯނިކް ސްކޯ ބޯޑެއް ހަރުކުރެވިގެންދާނެ ކަމަށްވެސް ބައްސާމް ވިދާޅުވިއެވެ.
ޓާފް ފުޓްބޯޅަ ދަނޑު އަޅަން އެފްއޭއެމުން ނިންމާފައިވާ ރަށްތަކަކީ، ހއ. ކެލާ، ށ. ކޮމަންޑޫ، ރ. އިނގުރައިދޫ، ބ. ކަމަދޫ، ކ. ހުރާ، އއ. އުކުޅަސް، އއ. މާޅޮސް، އދ. ދަނގެތި، މ. ނާލާފުށި، ފ. ބިލެއްދޫ، ތ. ގުރައިދޫ، ތ. ވަންދޫ، ލ. މާބައިދޫ، ގއ. ގެމަނަފުށި، ގއ. ކޮލަމާފުށި އަދި ގދ. ނަޑެއްލާއެވެ.
އެފްއޭއެމުން މަސައްކަތްކުރަނީ 2023-2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލުމަށެވެ. ހޯމް އެންޑް އަވޭ އުސޫލުން މުޅި ރާއްޖެއަށް ހުޅުވާލައިގެން ލީގު ބާއްވަން މަސައްކަތް ކުރާއިރު މިހާރުވެސް ރާއްޖޭގެ އެކި ހިސާބުތަކުގައި ދަނޑުތައް އެޅުމުގެ މަސައްކަތް ދަނީ ކުރިޔަށެވެ.
ކޮމެންޓު ފޮނުވާ