އެފްއޭއެމް ތިންވަނަ ޑިވިޝަން ފުޓްބޯޅަ މުބާރާތް މެދުކަނޑާލަން ނިންމައިފިއެވެ.
މުބާރާތް މެދުކަނޑާލަން އެފްއޭއެމުން ނިންމީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ އިއުލާނުކުރި ފިޔަވަޅުތަކާ އެއްގޮތަށް އަމަލުކުރުމުގެ ގޮތުންނެވެ.
މާލެ ސަރަހައްދުގައި ކޯވިޑް-19 ގެ ކޭސްތައް އަނެއްކާ ވެސް އިތުރުވަމުން ދާތީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ފިޔަވަޅުތައް ވަރުގަދަކޮށް، ކުޅިވަރު މުބާރާތްތައް ހުއްޓާލަން ވަނީ އަންގައިފައެެވެ.
ތިންވަނަ ޑިވިޝަން ފުޓްބޯޅަ މުބާރާތް މެދުކަނޑާލަން ނިންމިއިރު، މި މުބާރާތުގައި މިރޭ ޓެންޓް ސްޕޯޓްސް ކްލަބާއި ތުޅާދޫ އެވެންޗާސް ސްޕޯޓްސް ކުޅޭ މެޗު އޮތީ ޝެޑިއުލްކޮށްފައެވެ.
އެންމެ ފުރަތަމަ މި މުބާރާތް ފެށުމަށް އެފްއޭއެމުން ތާވަލުކުރީ ފެބްރުއަރީ އެއްވަނަ ދުވަހުއެވެ. އެކަމަކު ފަހުން މި މުބާރާތް ފަށަން ފެބްރުއަރީ މަހުގެ ހަތަރުވަނަ ދުވަހަށް ތާވަލުކުރިއިރު، އަދި އޭގެ ފަހު ވަނީ ފެބްރުއަރީ މަހުގެ 10 ވަނަ ދުވަހު މުބާރާތް ފަށަންވެސް ތާވަލްކޮށްފައެވެ. މުބާރާތް އެކިފަހަރު މަތިން ފަސްކުރަން ޖެހުނީ މާލެ ސަރަހައްދުގައި ކޯވިޑް-19 ގެ ކޭސްތައް އިތުރުވަމުން ދިއުމުންނެވެ. މުބާރާތް އަލުން ފެށުނީ މިދިޔަ މަހުގެ 18 ވަނަ ދުވަހު އެވެ. ސާދަ ޓީމާ އެކު ކުރިއަށްދާ މި މުބާރާތުގައި މިހާތަނަށް 12 މެޗެއް ވަނީ ކުޅެފައެވެ.
މި އަހަރު ތިންވަނަ ޑިވިޝަން ފުޓްބޯޅަ މުބާރާތް ބާއްވާއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.
ކޮމެންޓު ފޮނުވާ