ސްޕެނިޝް ލީގުގައި ރެއާލް މެޑްރިޑުން އޮސަސޫނާގެ މައްޗަށް 2-0 އިން ކުރިހޯދައި ލީގު ޗެމްޕިއަންކަން ހޯދުމުގެ ރޭހުގައި މުހިއްމު މޮޅެއް ހޯދައިފިއެވެ.
ރެއާލުން ދެ ގޯލު ވެސް ޖެހީ ދެ ވަނަ ހާފުގަ އެވެ. މެޗުގެ 76 ވަނަ މިނިޓްގައި އިސްކޯ ނެގި ކޯނަރަކުން ރެއާލަށް ލީޑުނަގައިދިނީ ފަހަކަށް އައިސް ރެއާލް ފަހަތުގައި މޮޅު ކުޅުމެއް ދައްކަމުން އަންނަ ބްރެޒިލްގެ ޑިފެންޑަރު އެޑާ މިލިޓާއޯ އެވެ. އޭގެ ހަތަރު މިނިޓް ފަހުން ކަރިމް ބެންޒެމާ ދިން ބޯޅައަކުން ކަސެމީރޯ ވަނީ ރެއާލަށް ދެ ވަނަ ގޯލެއް ޖަހައިދީފަ އެވެ. ލީގުގައި ވެލެންސިއާގެ މައްޗަށް ކުރިހޯދައިގެން ބާސެލޯނާ އަށް ރެއާލާ ޕޮއިންޓުގެ ގޮތުން އެއްވަރުކުރެވޭނެ އެވެ.
ރެއާލް ދެ ވަނައިގައި އޮތީ 34 މެޗުން 74 ޕޮއިންޓާ އެކު އެވެ.
ކޮމެންޓު ފޮނުވާ