އެތުލެޓިކޯ އެއްވަނަ ދަމަހައްޓައިފި

ސްޕެނިޝް ލީގުގައި މިރޭ އެތުލެޓިކޯ މެޑްރިޑުން ރަށުންބޭރުގައި 1-0 އިން އެލްޗޭ ބަލިކޮށް އެއް ވަނައިގައި މަގާމް ދަމަހައްޓައިފިއެވެ.

އެލްޗޭ ދަނޑުގައި ކުޅުނު މެޗުގައި އެތުލެޓިކޯގެ ލުއިސް ސުއަރޭޒް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެތުލެޓިކޯގެ ހަމައެކަނި ގޯލު މެޗުގެ 23 ވަނަ މިނިޓްގައި ޖެހީ ކުރިން ރެއާލަށް ކުޅުނު މާކޯސް ލޮރެންޓޭ އެވެ. އޭނާ މި ގޯލު ޖެހީ ޔަނިކް ކަރާސްކޯ ދިން ބޯޅައަކުންނެވެ. މެޗުގެ އިތުރު ވަގުތުގައި އެލްޗޭ އަށް ނަތީޖާ ހަމަހަމަކުރަން ރަނުގެ ފުރުސަތެއް ލިބުނެވެ. ލޮރެންޓޭ ދިން ޕެނަލްޓީ އަކުން އެލްޗޭގެ ފިޑެލް ޗާވޭސް ފޮނުވާލި ބޯޅަ ބޭރުވީ ގޯލުގެ ދަނޑީގައި ޖެހިފައެވެ.

އެތުލެޓިކޯ އެއް ވަނައިގައި ދެ ޕޮއިންޓުގެ ލީޑަކާ އެކު އޮތީ 34 މެޗުން 76 ޕޮއިންޓާ އެކު އެވެ. ރެއާލް ދެ ވަނައިގައި އޮތީ 34 މެޗުން 74 ޕޮއިންޓާ އެކު އެވެ. ތިން ވަަނައިގައި ބާސެލޯނާ އޮތީ 33 މެޗުން 71 ޕޮއިންޓް ހޯދައިގެންނެވެ. ހަތަރެއްގައި އޮތް ސެވިއްޔާ އަށް ވަނީ 33 މެޗުން 70 ޕޮއިންޓް ލިބިފަ އެވެ.